អត្ថបទ សូរ្យសែង៖

កាលពីចុងខែមិថុនា ឆ្នាំ ២០២១ នៅលើបណ្តាញសង្គមហ្វេសប៊ុក ទាំង Tik Tok មានរឿងផ្ទុះកក្រើកដូចគ្រាប់បរមាណូ ក្រោយពីមន្ត្រីអភិរក្សចាប់យកសត្វតោមួយក្បាលពីគេហដ្ឋានជនជាតិចិនកណ្តាលរាជធានីភ្នំពេញ ។

តាមពិត រូបភាពសត្វតោនេះ ត្រូវម្ចាស់ជាជនជាតិចិនបានផុសនៅលើបណ្តាញសង្គម Tik Tok ជារូបភាពវាកំពុងដេកនៅលើផ្លូវដើរ និងមានសុនខមួយក្បាលលេងនៅក្បែរនោះ ក្នុងនោះក៏មានវីដេអូមួយរបស់សត្វតោដែលត្រូវបានគេបាញ់​​ទឹកជាមួយនឹងទុយោ ។ ឃើញដូច្នោះ មន្ត្រីអភិរក្សសត្វព្រៃបានចាប់ផ្តើមស៊ើបអង្កេតសត្វតោមួយក្បាលនេះ ចាប់តាំងពីបានឃើញរូបភាពរបស់វានៅក្នុង Tik Tok កាលខែមេសា ឆ្នាំ ២០២១» ហើយបាននិយាយថា ប្រជាជនគ្មានសិទ្ធិរក្សាសត្វព្រៃដ៏កម្រជាសត្វចិញ្ចឹមទេ ទើបសម្រេចរឹបអូសយកសត្វតោមួយក្បាលនេះទៅដាក់នៅមជ្ឈមណ្ឌលចិញ្ចឹមសត្វ«ភ្នំតាម៉ៅ»  និងឆ្លៀត «ពិន័យ» ជាប្រាក់ដ៏សន្ធឹកសន្ធាប់ទៅទៀត គឺ ៣០.០០០ ដុល្លារ , ពេលនោះហើយ ដែលមហាជន និងអ្នកលេងបណ្តាញសង្គម ចាប់ផ្តើម Comment រិះគន់ដូចព្យុះសង្ឃរា ។

ក្រោយរឿងនេះបានកន្លងទៅ ៤ ថ្ងៃ ម្ចាស់សត្វតោដែលមានទឹកមុខស្រពាប់ស្រពោន ណាមួយនឹកសត្វតោរបស់ខ្លួនដែលបានចិញ្ចឹម និងមានមនោសញ្ចេតនាដូចសត្វចិញ្ចឹមដទៃទៀត ណាមួយគេ«ផាកពិន័យ» ៣០.០០០ ដុល្លារទៀត ក៏បានសរសេរនៅលើហ្វេសប៊ុករបស់ខ្លួនឈ្មោះ « Qi Xiao» ដូចខាងក្រោម ៖

«ក្នុងរយៈមួយឆ្នាំនេះ សត្វតោមិនដែលចេញពីខ្លោងទ្វារផ្ទះម្ដងទេ ហើយក៏មិនដែលលេចមុខនៅទីសាធារណៈដែរ  ខ្ញុំគ្រាន់តែស្រឡាញ់សត្វប៉ុណ្ណោះ មិនមែនត្រឹមតែជាសត្វតោ និងឆ្កែទេ នៅមានសត្វពពែទៀតចិញ្ចឹមជាមួយសត្វតោជាមួយគ្នា ។ ដើម្បីកុំអោយសត្វតោបំភ័យប្រជាជន ខ្ញុំបានធ្វើរបងរនាំងខ្ពស់បាំង ហើយវាមានសុខភាពល្អ មិនដែលត្រូវបានគេធ្វើបាប រំលោភបំពាន ។ សាច់គោឆ្អិន ៦ គីឡូក្រាមក្នុងមួយថ្ងៃ ទឹកដោះគោ ១ គីឡូក្រាម ប្រសិនបើខ្ញុំប្រើប្រាស់តោដើម្បីរកប្រាក់ចំណេញ ខ្ញុំគ្រាន់តែស្រឡាញ់សត្វប៉ុណ្ណោះ ខ្ញុំមិនចង់អោយពួកគេស្លាប់ទេ ថែរក្សាពួកគេដោយក្តីស្រឡាញ់របស់ខ្ញុំ  វាត្រូវបានខ្ញុំចិញ្ចឹមតាំងពីនៅតូចហើយក៏មានមនោសចេតនា ខ្ញុំទទួលយកការពិន័យដែលរដ្ធដាក់ពិន័យលើខ្ញុំ ហើយ នឹងធ្វើច្បាប់ចិញ្ចឹមដោយស្របច្បាប់ដែលពាក់ព័ន្ធដោយគ្រាន់តែសង្ឃឹមថារដ្ឋាភិបាលអាចបើកចិត្តហើយឱ្យខ្ញុំទទួលយកតោខ្ញុំត្រលប់មកវិញ ពីមុនខ្ញុំក៏ធ្លាប់ធ្វើសប្បុរសធម៌ដែរ ប៉ុន្តែការតបស្នងមកខ្ញុំវិញគឺបែបនេះ ចឹងថ្ងៃក្រោយអ្នកដែលធ្វើល្អក្លាយជាអាក្រក់ ធ្វើឱ្យមនុស្សដែលមានទឹកចិត្តល្អក្លាយជាឈាមត្រជាក់ » ។

កំសត់ណាស់! សត្វតោគ្រាន់តែឃើញម្ចាស់វាទៅដល់ភ្លាម វាស្ទុះមកលិឍមុខ លោតកញ្ជ្រោល…សប្បាយ​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​រីករាយ ជាមួយសុនខរត់ទៅណា ទៅជាមួយគ្នាត្រសងនៅក្នុងទីធ្លាព័ទ្ធសំណាញ់នាភ្នំតាម៉ៅ ដូចកាលនៅក្នុងផ្ទះដូចកូនបានជួបម៉ែឪក្រោយបែកគ្នា ។

ដោយទើសភ្នែក ទើសត្រចៀកនឹងរឿងរឹបអូសសត្វតោពេក សម្តេចតេជោនាយករដ្ឋមន្ត្រី ក៏បានសរសេរនៅលើហ្វេសប៊ុកសម្តេចថា «ក្រោយក្តាប់បានរឿងសត្វតោ។ ល្ងាចនេះខ្ញុំបានពិភាក្សាជាមួយរដ្ឋមន្ត្រីក្រសួងកសិកម្ម និងបានឯកភាពគ្នាថា អនុញ្ញាតឲ្យម្ចាស់យកទៅចិញ្ចឹមវិញក្នុងលក្ខខណ្ឌម្ចាស់ត្រូវធ្វើទ្រុងឲ្យបានត្រឹមត្រូវ ដើម្បីធានាសុវត្ថិភាព ទាំងមនុស្សក្នុងផ្ទះ និងអ្នករស់នៅជិតខាង ។ អរគុណបងប្អូនជនរួមជាតិ ទាំងក្នុង និងក្រៅប្រទេស ដែលបានផ្តល់យោបល់ និងអាណិតដល់សត្វតោ»។

មិនបង្អង់យូរ ម្ចាស់សត្វតោ ដែលកំពុងមានអារម្មណ៍អរនឹងបានសត្វតោវិលជាកម្មសិទ្ធិរបស់ខ្លួនវិញផង ភ្លាមៗម្ចាស់គណនីសត្វតោបានសរសេរទាំងញ័រផង អរផងថា «ជាបឋមខ្ញុំបាទសូមថ្លែងអំណរគុណយ៉ាងខ្ពង់ខ្ពស់ដល់សម្ដេចតេជោ ហ៊ុន​ សែន នាយករដ្ឋមន្រ្តីនៃព្រះរាជាណាចក្រកម្ពុជាដែលបានយកចិត្តទុកដាក់ចំពោះបញ្ហានេះ ហើយ​​ក៏សូមអរគុណដល់ថ្នាក់ដឹកនាំគ្រប់ជាន់ថ្នាក់ផងដែរ នឹងពុកម៉ែបងប្អូនប្រជាជនកម្ពុជាទាំងអស់ដែលបានជួយនិងគាំទ្រដល់“ហ៊ីម៉ា” របស់យើងខ្ញុំផងដែរ ធ្វើឱ្យខ្ញុំបាទរស់នៅក្នុងប្រទេសកម្ពុជាយ៉ាងមានអារម្មណ៍កក់ក្តៅ ជាចុងក្រោយសុំជូនពរឱ្យ​កម្ពុជា​នឹង​ចិនជាមិត្តដែកថែបជារៀងរហូត»។

តែប៉ុនណេះរឿងសត្វត្រូវចប់អេហ្វាំង ស្ងប់ទាំងម្ចាស់ ស្ងប់ទាំងអ្នកប្រើអ៊ិនធើណេត ដែលជួយផ្តល់យោបល់ល្អៗ និងដូចនាំសារឲ្យដល់នាយករដ្ឋមន្ត្រីចេញមកអន្តរាគមន៍ ៕

ម្ខាស់សត្វតោ និងក្រុមការងារគាត់ ចែកអាំងប៉ាវ