អត្ថបទ សូរ្យសែង៖
លោក ហារ វ៉ារដាន (Harsh Vardhan) រដ្ឋមន្ត្រីក្រសួងសុខាភិបាល និងសុខុមាលភាពគ្រួសាររបស់ឥណ្ឌា បានប្រកាសលាលែងពីតំណែងកាលពីថ្ងៃទី ៧ កក្កដា ចំស្ថានការណ៍គូវីដ-១៩ កំពុងរាតត្បាតខ្លាំង ដែលមិនបានបន្ធូរបន្ថយការឆ្លងទាល់តែសោះ ។ ការសម្រេចចិត្តនេះ កើតឡើងនៅពេលដែលរដ្ឋាភិបាលក្រុងញូវដែលីបានរងការរិះគន់ចំពោះការខក ខានមិនបានគ្រប់គ្រងវីរុសនេះធ្វើឲ្យប៉ះពាល់ដល់ទំនុកចិត្តសាធារណជណ លើសពីនេះ ប្រព័ន្ធសេវាសុខភាពសាធារណៈមិនមានលក្ខណៈគ្រប់គ្រាន់ទេ ដូចជា ខ្វះគ្រែ ខ្វះអុកស៊ីហ្សែន ។
សម្រាប់លោក វ៉ារដាន គ្រប់គ្រងតំណែងរដ្ឋមន្ត្រីក្រសួងសុខាភិបាល និងសុខុមាលភាពគ្រួសារតាំងពីឆ្នាំ ២០១៤ ក្រោមរដ្ឋាភិបាលរបស់លោក ណារេនដ្រា ម៉ូឌី (Narendra Modi) នាយករដ្ឋមន្ត្រីឥណ្ឌា រហូតដល់ចប់អាណត្តិដំបូងរបស់លោក ម៉ូឌី គឺនៅឆ្នាំ ២០១៩ ។ លោក វ៉ារដាន បានចូលរួមជាមួយរដ្ឋាភិបាលម្តងទៀត បន្ទាប់ពីអាណត្តិទី ២ របស់លោក ម៉ូឌី លោកបានបម្រើការជារដ្ឋមន្រ្តីក្រសួងសុខាភិបាល ។
ក្នុងស្ថានការណ៍ប្រទេសជួបការរាលដាលកូវីដខ្លាំង គណៈរដ្ឋមន្ត្រីរបស់លោក ម៉ូឌី ត្រូវរិះគន់មិនសំចៃថា រដ្ឋាភិបាលគ្រប់គ្រងកូវីដបរាជ័យក្នុងរលកទី ២ ស្របពេលដែលប្រព័ន្ធសុខាភិបាលជាច្រើនកន្លែង មិនអាចរ៉ាប់រងអ្នកជំងឺបាន ប្រទេសប្រឈមនឹងការខ្វះគ្រែអ្នកជំងឺ ខ្វះអុកស៊ីហ្សែន និងសាកសពជាច្រើនរង់ចាំបច្ឆាមរណៈ ។
ប៉ុន្មានម៉ោងក្រោយលោក វ៉ារដាន លាចេញ លោកនាយករដ្ឋមន្ត្រី ម៉ូឌី បានតែងតាំងលោក ម៉ាន់សុខ ឡាក់ម៉ាន ម៉ានដាវិទ្យា(Mansukh Laxman mandaviya) ជារដ្ឋមន្ត្រីក្រសួងសុខាភិបាលជំនួស ៕