អទ្ថបទ ម៉ារ៉ា៖
រដ្ឋាភិបាលស្រមោលរបស់ NLD បានប្រកាសទិញយន្តហោះគ្មានមនុស្សបើក (ដ្រូន) ជាង ៤០០ គ្រឿងសម្រាប់កងកម្លាំង PDF នៅទូទាំងប្រទេស ដើម្បីប្រើប្រាស់ក្នុងការបំផ្លិចបំផ្លាញ និងវាយប្រហារទាហានមីយ៉ាន់ម៉ា(ភូមា) រួមទាំងការអនុវត្តបេសកកម្មស៊ើបការណ៍ ដើម្បីទទួលបានប្រៀប ។
កាលពីថ្ងៃទី ២៣ សីហា ផេកក្រសួងការពារជាតិ រដ្ឋាភិបាលរួបរួមជាតិ (NUG) ដែលជារដ្ឋាភិបាលស្រមោលរបស់អតីតសមាជិកគណបក្ស NLD បានចេញសេចក្តីថ្លែងការណ៍មួយដោយនិយាយអំពីរឿងនេះថា រដ្ឋាភិបាលស្រមោលកំពុងត្រៀមបញ្ជូនយន្តហោះគ្មានមនុស្សបើក ឬដ្រូនជាង ៤០០ គ្រឿងដល់កងកម្លាំងប្រដាប់អាវុធ (PDF) ដែលរដ្ឋាភិបាលស្រមោលបានបង្កើតនៅក្នុងតំបន់ជាច្រើន នៃតំបន់រដ្ឋជនជាតិភាគតិចទាំងអស់នៅទូទាំងប្រទេសមីយ៉ាន់ម៉ា ។
ការទិញ និងចែកចាយយន្តហោះគ្មានមនុស្សបើកទាំងនេះ ដើម្បីឱ្យកងកម្លាំងប្រដាប់អាវុធរដ្ឋាភិបាលស្រមោលអាចប្រើប្រាស់ក្នុងការបំផ្លិចបំផ្លាញ វាយប្រហារអង្គភាពយោធាភូមាដែលមានទីតាំងនៅតាមតំបន់ផ្សេងៗ រួមទាំងការប្រើប្រាស់បេសកកម្មស៊ើបការណ៍ និងចិត្តវិទ្យាប្រតិបត្តិការ បង្កើតគុណសម្បត្តិមួយនៅក្នុងការតស៊ូរវាងរដ្ឋាភិបាលស្រមោល និងរដ្ឋាភិបាលយោធា។
សព្វថ្ងៃនេះ កងកម្លាំងប្រដាប់អាវុធរបស់រដ្ឋាភិបាលស្រមោល មានអង្គភាពវិស្វកម្ម ដែលឧទ្ទិសដល់ការផលិតយន្តហោះគ្មានមនុស្សបើក ស្ថិតនៅក្នុងរដ្ឋការ៉េន (Karen) និង កាយ៉ាស(Kayah) ជារដ្ឋជនជាតិភាគតិចពីរនៅភាគខាងកើត ដោយពឹងផ្អែកលើតំបន់ព្រៃតាមបណ្តោយព្រំដែនប្រទេសចំនួន២ ដែលមានប្រវែងជាង២.០០០គីឡូម៉ែត្រ ជាច្រកសម្រាប់ដឹកជញ្ជូនឧបករណ៍ គ្រឿងចក្រ និងគ្រឿងបន្លាស់ពីប្រទេសថៃ។ សម្រាប់ប្រើក្នុងការផលិតយន្តហោះដ្រូន ដើម្បីប្រយុទ្ធនឹងយោធាភូមា ។
កងកម្លាំងប្រដាប់អាវុធរបស់រដ្ឋាភិបាលស្រមោល បានចាប់ផ្តើមដាក់ពង្រាយយន្តហោះគ្មានមនុស្សបើក rotary-wing សម្រាប់បាញ់ថ្នាំជី និងសារធាតុគីមីក្នុងវិស័យកសិកម្ម បង្ខំឱ្យហោះហើរទៅកាន់កងទ័ពភូមា ចាប់តាំងពីខែឧសភា ឆ្នាំ ២០២១ មក វាបានចាប់ផ្តើមអភិវឌ្ឍដោយផ្អែកលើបច្ចេកវិទ្យាខ្ពស់ ក្នុងរយៈពេលប៉ុន្មានខែចុងក្រោយនេះ។ អង្គភាពផលិតយន្តហោះគ្មានមនុស្សបើកទាំងនៅក្នុងរដ្ឋការ៉េន និង កាយ៉ាស បានប្រកាសថានឹងផលិតយន្តហោះគ្មានមនុស្ស បើកស្លាបថេរ ដើម្បីបង្កើនសមត្ថភាពវាយប្រហារ និងបំផ្លិចបំផ្លាញ ដោយសារតែវាជា ដ្រូន អាចហោះហើរបានឆ្ងាយជាង ដ្រូន ស្លាបបង្វិល ៕