បកប្រែពី khaosod:
ដោយ សូរ្យរិទ្ធ៖
រៀងរាល់ឆ្នាំនៅក្នុងទស្សនាវដ្តី The Economist ដែលជាទស្សនាវដ្តីឈានមុខគេរបស់ប្រទេសអង់គ្លេស បានធ្វើការវិភាគ និងវាយតម្លៃអំពីស្ថានការណ៍ពិភពលោកទាំងមូល មាននយោបាយ សេដ្ឋកិច្ច កិច្ចការបរទេស និងបច្ចេកវិជ្ជា ។
បណ្ណាធិការ Tom Standage បើកឡើងអំពីការពិតដែលថាជីវិតនឹងផ្លាស់ប្តូរជានិច្ច ថាតើមានការកើនឡើងនៃជម្លោះប្រដាប់អាវុធ កិច្ចខិតខំប្រឹងប្រែងស្វែងរកថាមពលថ្មីជុំវិញពិភពលោក ឬការរីកចម្រើនយ៉ាងឆាប់រហ័សនៃបញ្ញាសិប្បនិម្មិត (AI) ពិភពលោកកំពុងផ្លាស់ប្តូរក្នុងល្បឿនមិនគួរឱ្យជឿ។
អត្ថបទនេះជួយឲ្យអ្នកអានតាមទាន់ពិភពលោក ទៅលើរឿងរ៉ាវ 10 ចំណុចសំខាន់ៗដូចខាងក្រោម៖
១. បោះឆ្នោតទូទាំងពិភពលោក
នៅឆ្នាំ 2024 មានការបោះឆ្នោតជាង 70 លើក នៅក្នុងប្រទេសនានាជុំវិញពិភពលោក ដែលមានចំនួនប្រជាជនសរុបប្រមាណ 4.2 ពាន់លាននាក់ ឬច្រើនជាងពាក់កណ្តាលនៃចំនួនប្រជាជនពិភពលោក។ ជាលទ្ធផលឆ្នាំនេះនឹងមានអ្នកមានសិទ្ធិបោះឆ្នោតច្រើនមិនដែលមានពីមុន ។
រួមទាំងការលើកឋានៈលទ្ធិប្រជាធិបតេយ្យជុំវិញពិភពលោកឱ្យកាន់តែលេចធ្លោ ទោះបីចំនួនបោះឆ្នោតមានច្រើន ប៉ុន្តែនេះមិនធានាថាលទ្ធិប្រជាធិបតេយ្យនឹងពង្រឹងបាននោះទេ ព្រោះអាចនឹងមិនយុត្តិធម៌ សេរី និងតម្លាភាព ។
២. ជម្រើសសកលរបស់អាមេរិក
ឆ្នាំនេះ ពិភពលោកចាប់ភ្នែកមើលលើចលនាអ្នកមានសិទ្ធិបោះឆ្នោតនៅសហរដ្ឋអាមេរិក រួមទាំងតុលាការដែលគ្រោងនឹងសម្រេចលើបណ្តឹងរបស់លោក ដូណាល់ ត្រាំ អតីតប្រធានាធិបតីសហរដ្ឋអាមេរិក ដែលមានឱកាស ១ ក្នុង ៣ ក្នុងការទទួលបានតំណែងជាមេដឹកនាំប្រទេសឡើងវិញ ។
លទ្ធផលអាចអាស្រ័យលើអ្នកមានសិទ្ធិបោះឆ្នោត មិនប៉ុន្មានម៉ឺននាក់នៅក្នុងរដ្ឋ Swing State ឬរដ្ឋដែលគាំទ្ររបស់គណបក្សធំៗទាំងពីរដែលបានទទួលសំឡេងស្មើគ្នា ប៉ុន្តែផលដែលតាមមក នឹងប៉ះទង្គិច រួមទាំងជះឥទ្ធិពលទៅលើទិសដៅ និង លទ្ធភាពជុំវិញពិភពលោក។ ពីគោលនយោបាយអាកាសធាតុ ដល់ការគាំទ្រយោធាសម្រាប់អ៊ុយក្រែន រួមទាំងជោគវាសនារបស់ប្រធានាធិបតីរុស្ស៊ី លោក វ្ល៉ាឌីមៀ ពូទីន ក្នុងការបោះឆ្នោត ។
៣. អម្រែកអឺរ៉ុប
អឺរ៉ុបត្រូវតែបង្កើន និងផ្តល់ការគាំទ្រផ្នែកយោធា និងសេដ្ឋកិច្ចដល់អ៊ុយក្រែន ដែលខ្លួនត្រូវការនៅក្នុងការតស៊ូដ៏យូរអង្វែង ដើម្បីរក្សាអធិបតេយ្យភាពរបស់ខ្លួន។ ក្នុងពេលជាមួយគ្នានេះ មាគ៌ារបស់អ៊ុយក្រែនទៅកាន់សមាជិកភាពសហភាពអឺរ៉ុបត្រូវតែត្រូវបានដាក់ចេញ។ នេះគឺជារឿងត្រឹមត្រូវដែលត្រូវតែធ្វើឲ្យបាន ដែលនឹងការពារជាមុនប្រឆាំងនឹងហានិភ័យនៅក្នុងព្រឹត្តិការណ៍ដែលលោក ដូណាល់ ត្រាំ ឡើងកាន់អំណាចជាប្រធានាធិបតីសហរដ្ឋអាមេរិក ចំពោះការដកការគាំទ្ររបស់គាត់ចំពោះអ៊ុយក្រែន ។
៤. ភាពវឹកវរនៅមជ្ឈិមបូព៌ា
ភាពវឹកវរនៅមជ្ឈិមបូព៌ាពីជម្លោះបង្ហូរឈាមរវាងអ៊ីស្រាអែល និងក្រុមហាម៉ាស តើវាពិតជាអាចបង្វែរតំបន់ជុំវិញ និងលុបបំបាត់គំនិតដែលថា ពិភពលោកអាចនឹងនៅព្រងើយកន្តើយនឹងស្ថានភាពរបស់ប្រជាជនប៉ាឡេស្ទីនស្លូតត្រង់ដែរឬទេ?
នេះអាចក្លាយជាជម្លោះក្នុងតំបន់កាន់តែរីករាលដាល តែក៏ជាឱកាសថ្មីសម្រាប់បង្កើតសន្តិភាពដែរ ។ សម្រាប់សហរដ្ឋអាមេរិក ជាមហាអំណាចដែលបានសាយភាយឥទ្ធិពលខ្លាំងពេក បញ្ហានេះអាចជាការសាកល្បង ថាតើយើងអាចសម្របខ្លួនទៅនឹងពិភពលោកដែលកាន់តែស្មុគស្មាញ និងគំរាមកំហែងខ្លាំងឡើងដែរឬទេ?
៥. ភាពវឹកវរផ្សេងទៀតកំពុងកើតឡើង
ផែនការសំខាន់ៗរបស់អាមេរិកនៅអាស៊ី ផ្តោតលើការប្រកួតប្រជែងជាមួយចិន ប្រទេសដ៏មានឥទ្ធិពលនៅក្នុងតំបន់នេះ ត្រូវបានបំផ្លាញដោយសង្គ្រាមនៅអ៊ុយក្រែន និងតំបន់ហ្គាហ្សាស្ទ្រីប។ ទន្ទឹមនឹងនេះ រុស្ស៊ីក៏កំពុងបាត់បង់ឥទ្ធិពលផងដែរ។ ជម្លោះដ៏ត្រាំត្រែងកំពុងរលាយបន្តិចម្តងៗ ហើយសង្គ្រាមត្រជាក់ក្នុងតំបន់កំពុងផ្ទុះឡើងជុំវិញពិភពលោក។
អស្ថិរភាពក្នុងតំបន់ Sahel តំបន់ព្រំដែនបែងចែកអាហ្រ្វិក ទៅជាខាងជើង និងខាងត្បូង វាបានកើនឡើងយ៉ាងច្បាស់ក្រឡែត ។ ពិភពលោកកំពុងរៀបចំសម្រាប់ជម្លោះកាន់តែច្រើន ហើយឥឡូវនេះ «សម័យកាលអំណាចតែមួយ» របស់សហរដ្ឋអាមេរិកបានបញ្ចប់ ។
៦. សង្គ្រាមត្រជាក់លើកទីពីរ
ទន្ទឹមនឹងនេះ កំណើនសេដ្ឋកិច្ចរបស់ប្រទេសចិនបានធ្លាក់ចុះ ភាពតានតឹងនៅតៃវ៉ាន់កំពុងកើនឡើងខ្ពស់ ឯសហរដ្ឋអាមេរិកបន្តដាក់កម្រិតការចូលដល់បច្ចេកវិទ្យាទំនើបរបស់ចិន ។ យុគ «សង្រ្គាមត្រជាក់ថ្មី» កើនឡើងទ្វេដង។ ក្រុមហ៊ុនលោកខាងលិចដែលព្យាយាមកាត់បន្ថយការពឹងផ្អែកលើប្រទេសចិននៅក្នុងខ្សែចង្វាក់ផ្គត់ផ្គង់ នឹងរកឃើញថា នេះគឺជាការនិយាយងាយស្រួល ជាងការធ្វើ ។
៧. ភូមិសាស្ត្រថាមពលថ្មី
ការផ្លាស់ប្តូរខាងថាមពលស្អាត កំពុងបង្កបង្កើតមហាអំណាចបៃតង និងកំណត់ធនធានថាមពលថ្មី Lithium ទង់ដែង និងនីកែល មានតម្លៃជាងពេលណាៗទាំងអស់ ខណៈដែលប្រេង ឧស្ម័នធម្មជាតិ និងតំបន់ដែលគ្រប់គ្រងការផ្គត់ផ្គង់របស់ពួកគេកាន់តែមិនសូវសំខាន់ ។ ការប្រកួតប្រជែងសម្រាប់ធនធានបៃតងកំពុងផ្លាស់ប្តូរភូមិសាស្ត្រនយោបាយ និងពាណិជ្ជកម្ម បង្កើតអ្នកឈ្នះ និងអ្នកចាញ់ដែលមិននឹកស្មានដល់។
៨. ភាពមិនប្រាកដប្រជានៃសេដ្ឋកិច្ច
សេដ្ឋកិច្ចលោកខាងលិចនឹងធ្វើបានល្អជាងការរំពឹងទុកកាលពីឆ្នាំ 2023 តែអត្រាការប្រាក់នៅខ្ពស់ជាងនេះ នឹងធ្វើឱ្យប៉ះពាល់ដល់ក្រុមហ៊ុន និងអ្នកប្រើប្រាស់ ទោះបីជាវិបត្តិសេដ្ឋកិច្ចខ្លះអាចជៀសវាងបានក៏ដោយ។ ឯប្រទេសចិនអាចធ្លាក់ចូលទៅក្នុងបរិត្តផរណា ( ការដកចំនួនរូបិយវត្ថុមួយភាគ ចេញពីទីផ្សារដែលលើសចំនួនត្រូវការចរាចរណ៍របស់សាច់ប្រាក់ ដើម្បីធ្វើឲ្យចំនួនរូបិយវត្ថុសមាមាត្រនិងតម្រូវការចាំបាច់សម្រាប់ចរាចរណ៍) ។
៩. មុងងារ AI
ធុរកិច្ចផ្សេងៗកំពុងទទួលយក AI មកប្រើ ។ និយតករ (វត្ថុ ឬអ្វីៗដែលអាចត្រួតពិនិត្យ ឬកែតម្រូវអ្វីមួយជាប្រចាំ) ក៏កំពុងធ្វើនិយតកម្មផងដែរ ហើយផ្នែកអភិវឌ្ឍន៍បច្ចេកវិទ្យាបន្តកែលម្អ។ ការជជែកវែកញែកនឹងកាន់តែខ្លាំងឡើងអំពីវិធីល្អបំផុតដើម្បីគ្រប់គ្រង AI រួមទាំងហានិភ័យដែលនៅតែមាន ។ ក្នុងចំណោមកង្វល់ជាច្រើនគឺផលប៉ះពាល់នៃ AI លើការងារ និងការជ្រៀតជ្រែកការបោះឆ្នោត ។
១០. ពិភពលោកបញ្ចូលគ្នា?
ប្រហែលជាភាពខុសគ្នាខាងមនោគមវិជ្ជានឹងត្រូវទុកមួយឡែកសិន នៅពេលដែលពិភពលោករីករាយនឹងការប្រកួតកីឡាអូឡាំពិកឆ្នាំ 2024 នៅទីក្រុងប៉ារីស ប្រទេសបារាំង ឬចូលរួមជាមួយអវកាសយានិកដែលនឹង «អាច» ធ្វើដំណើរក្នុងរង្វង់ព្រះច័ន្ទ ប៉ុន្តែវាក៏អាចទៅរួចដែរ ដែលក្តីសង្ឃឹមសម្រាប់ការឯកភាពជាសកលនឹងសំយ៉ុងចុះ ៕