ដោយ ម៉ារ៉ា៖
នៅថ្ងៃទី 19 ខែកុម្ភៈម្សិលមិញ ទីភ្នាក់ងារព័ត៌មាន Bloomberg រាយការណ៍ថា លោក ហាសយីម ហាយ៉ារី ប្រធានគណៈកម្មការរៀបចំការបោះឆ្នោតឥណ្ឌូនេស៊ីបានបង្ហើបថា ចាប់តាំងពីថ្ងៃទី 14 ខែកុម្ភៈឆ្នាំ 2024 នៅពេលដែលឥណ្ឌូនេស៊ីរៀបចំការបោះឆ្នោតទូទៅរហូតដល់ថ្ងៃទី 18 ខែកុម្ភៈ មន្ត្រីបោះឆ្នោតចំនួន 71 នាក់បានស្លាប់ ពីការនឿយហត់ពេលបំពេញភារកិច្ច លើសពីនេះទៅទៀត មនុស្សប្រហែល ៤ ពាន់នាក់បានធ្លាក់ខ្លួនឈឺ។
ការបោះឆ្នោតទូទៅរបស់ប្រទេសឥណ្ឌូនេស៊ី គឺជាការបោះឆ្នោតតែមួយថ្ងៃដ៏ធំបំផុតរបស់ពិភពលោក មានអ្នកបោះឆ្នោតជាង 200 លាននាក់ ដោយមានអ្នកស្ម័គ្រចិត្ត 5 លាននាក់ និងអ្នកធ្វើការនៅការិយាល័យបោះឆ្នោត 800,000 នៅទូទាំងប្រទេស។ ពួកគេធ្វើការប្រហែល 6 ម៉ោង ខណៈពេលដែលការបោះឆ្នោតបើកចំហ ប៉ុន្តែរួមបញ្ចូលពេលវេលាធ្វើការនៅក្នុងដំណើរការទាំងមូល ចាប់ពីមុនពេលចាប់ផ្តើម រហូតដល់ការរាប់សន្លឹកឆ្នោត ចំណាយពេលលើសពី 12 ម៉ោង។
ទោះបីជារដ្ឋាភិបាលបានកំណត់អាយុសម្រាប់អ្នកស្ម័គ្រចិត្តការិយាល័យបោះឆ្នោត និងទាមទារការពិនិត្យសុខភាពសម្រាប់បុគ្គលិកទាំងអស់ក៏ដោយ ក៏មានមន្ត្រីបោះឆ្នោតជាង 500 នាក់បានស្លាប់កាលពីបោះឆ្នោតក្នុងឆ្នាំ 2019 ៕