អតីតឯកអគ្គរាជទូតថៃម្នាក់ សរសេរអត្ថបទមួយថា រុស្ស៊ីបរាជ័យអស់អាវុធ នៅសល់តែអាវុធនុយក្លេអ៊ែរប៉ុណ្ណោះ

ព័ត៌មានអន្តរជាតិថ្ងៃពុធ ទី14 ខែកញ្ញា ឆ្នាំ2022 ម៉ោង 7:15 នាទី ល្ងាច

អត្ថបទ សូរ្យរិទ្ធ៖

ពីវេបសាយ matichon៖

ថ្ងៃទី១៤ ខែកញ្ញា លោក រ៉ាត់ ឆាលីច័ន្ទ អតីតឯកអគ្គរាជទូតថៃ បានសរសេរអត្ថបទមួយ «ស្តីអំពីផ្លូវបំបែករុស្ស៊ី» ដោយវិភាគថា ខាងវិស័យយោធារបស់រុស្ស៊ី ម្នាក់ៗសុទ្ធតែប្រមើលមើលថា រុស្ស៊ី«ខ្លាំង, សព្វាវុធទំនើប» ថែមទាំងមានឥទ្ធិពលលើសង្គ្រាមជាមួយអ៊ុយក្រែនខ្ពស់ណាស់ ប៉ុន្តែវាមិនអ៊ីចឹងឯណា ប្រយុទ្ធរយៈពេល ៦ ខែកន្លងមក ពិភពលោកឃើញច្បាស់នឹងភ្នែក អ៊ុយក្រែនវាយបានទឹកដីប្រមាណ ៦.០០០ គីឡូម៉ែត្រក្រឡាមកវិញ ហើយថែមទាំងអាចដណ្តើមតំបន់ចាស់គ្រីមៀមកវិញក៏ថាបាន ។

ឥឡូវគេនិយាយពេញមាត់ទៅហើយ ថារុស្ស៊ីបរាជ័យពិតប្រាកដ ដោយសារសព្វាវុធដ៏ទំនើបៗរបស់សហរដ្ឋអាមេរិក និងប្រទេសលោកខាងលិច ដែលជួយអ៊ុយក្រែនវាមានប្រសិទ្ធភាពខ្ពស់ជាងរុស្ស៊ីឆ្ងាយ ។ មើលមកលោកប្រធានាធិបតី ពូទីន ហាក់ស្ងៀមស្ងាត់មិនចេញសម្តីអ្វីឲ្យពិភពលោកឮសោះ ។

តើនឹងមានអ្វីកើតឡើងបន្ទាប់ពីបរាជ័យនេះ? រឿងមួយដែលប្រាកដជានឹងកើតឡើង គឺការរង្គោះរង្គើអំណាចនៅក្នុងប្រធានាធិបតី ពូទីន ខ្លួនឯង ដែលខ្ញុំសង្ឃឹមថា ពូទីន និងសហការីរបស់គាត់នឹងចេញពីអំណាចនៅទីបំផុត ហើយសង្ឃឹមថា ប្រទេសរុស្ស៊ីនឹងមានឱកាសអភិវឌ្ឍទៅជាសង្គមស៊ីវិល័យ និងប្រជាធិបតេយ្យពិតប្រាកដ ក៏ដូចក្លាយជាកម្លាំងវិជ្ជមានដ៏ធំបំផុតរបស់ពិភពលោក ដូចដែលអតីតប្រធានាធិបតី Gorbachev បានសុបិនពីមុន ។

ទោះបីជាមានការប្រឆាំងបច្ចុប្បន្នក៏ដោយ ការមិនពេញចិត្តនឹងនាយកប្រតិបត្តិរបស់ប្រទេសនៅរុស្ស៊ីនឹងកាន់តែច្រើនឡើង ប៉ុន្តែអ្វីដែលគួរឲ្យបារម្ភជាងនេះ គឺសំឡេងពីក្រុមស្តាំនិយមជ្រុលដែលធ្លាប់គាំទ្ររដ្ឋាភិបាលជ្រុលនិយម ប៉ុន្តែឥឡូវមានការមិនពេញចិត្តនឹងការបរាជ័យនៅអ៊ុយក្រែន ហើយបានអំពាវនាវឲ្យរុស្ស៊ីប្រើអាវុធនុយក្លេអ៊ែរសម្លាប់ជនជាតិអ៊ុយក្រែនដោយគ្មានមេត្តាណាមួយក្នុងការឈ្នះសង្រ្គាម ។

អ្វីដែលអ្នកវិភាគព្រួយបារម្ភនោះ គឺអ្វីដែលកំពុងកើតឡើងស្រដៀងគ្នានឹងសង្គមអាល្លឺម៉ង់ក្រោយសង្គ្រាមលោកលើកទី១ ដែលជាកន្លែងដែលអាល្លឺម៉ង់ត្រូវចាញ់ ហើយបានរួមចំណែកដល់ការងើបឡើងនៃលទ្ធិជ្រុលនិយមជ្រុលនិយម ដូចណាស៊ីដើម្បីឡើងកាន់អំណាច ដែលបង្កឱ្យមានគ្រោះមហន្តរាយដ៏ធំសម្រាប់ពិភពលោកទាំងមូលមិនយូរប៉ុន្មាន ។

បើក្រុមស្តាំនិយមជ្រុលរបស់រុស្ស៊ីចូលចិត្តប្រើអំពើហិង្សាដណ្តើមអំណាច ជោគវាសនារបស់រុស្ស៊ីទំនងជាកាន់តែងងឹតទៅៗ ។ ទោះជាយ៉ាងណាក៏ដោយ អំណាចយោធារបស់រុស្ស៊ីឥឡូវនេះគឺស្ទើរតែគ្មានអ្វីសោះ វានឹងក្លាយជាការវិលត្រឡប់ដ៏វែងឆ្ងាយ និងពិបាកឲ្យដូចប្រទេសលោកខាងលិច ម្យ៉ាងដោយសារការដាក់ទណ្ឌកម្មរារាំងប្រទេសរុស្ស៊ីពីការចូលទៅកាន់ការអភិវឌ្ឍន៍បច្ចេកវិទ្យាទំនើប អ្វីដែលចង់និយាយ គឺនៅសល់តែអាវុធនុយក្លេអ៊ែរ នៅពេលប្រើវា អ្នកដែលនឹងស្លាប់ច្រើនជាងគេ ប្រហែលជាមិនមែនរុស្ស៊ីខ្លួនឯងទេ ៕

ហាមធ្វើការចម្លងអត្ថបទ ដោយមិនមានការអនុញ្ញាត្តិ។

ភ្ជាប់ទំនាក់ទំនងជាមួយយើងឥឡូវនេះ

អត្ថបទប្រហាក់ប្រហែល