សូមក្រឡេកមើលតួលេខកំណើននៃអ្នកប្រើប្រាស់អ៊ីនធឺណិតទូទាំងពិភពលោកពីឆ្នាំ 1990 ដល់ឆ្នាំ 2025។ តើជឿឬមិនជឿ នៅឆ្នាំ 2025 ក្នុងយុគសម័យនៃ AI មានមនុស្សចំនួន 5.6 ពាន់លាននាក់បានប្រើប្រាស់អ៊ីនធឺណិត ក្នុងចំណោមប្រជាជន 8.2 ពាន់លាននាក់របស់ពិភពលោក។

ក្នុងរយៈពេលជាង 30 ឆ្នាំ អ៊ីនធឺណិតបានផ្លាស់ប្តូរពីបណ្តាញពិសេសនៅក្នុងរង្វង់សិក្សា ទៅជាមូលដ្ឋានគ្រឹះដ៏សំខាន់សម្រាប់ការទំនាក់ទំនង ពាណិជ្ជកម្ម និងចំណេះដឹងនៅក្នុងពិភពទំនើប។

ទោះបីជាអ៊ីនធឺណិតត្រូវបានប្រើប្រាស់យ៉ាងទូលំទូលាយនាពេលបច្ចុប្បន្ននេះក៏ដោយ តើផ្លូវរីកចម្រើនរបស់វាមើលទៅដូចអ្វី? ហើយបច្ចុប្បន្នមានមនុស្សប៉ុន្មាននាក់កំពុងប្រើប្រាស់អ៊ីនធឺណិត?

ចំនួនអ្នកប្រើប្រាស់អ៊ីនធឺណិតទូទាំងពិភពលោកពីឆ្នាំ 1990 ដល់ឆ្នាំ 2025 ដោយផ្អែកលើរបាយការណ៍ឌីជីថលឆ្នាំ 2025 ដោយ DataReportal និងទិន្នន័យចំនួនប្រជាជនពីអង្គការសហប្រជាជាតិ។

ទោះបីជាអ៊ិនធឺណិតត្រូវបានបង្កើតនៅឆ្នាំ 1983 ក៏ដោយ វាត្រូវបានបញ្ចេញជាសាធារណៈតែនៅក្នុងឆ្នាំ 1989 នៅពេលដែល Tim Berners-Lee បានបង្កើត World Wide Web ។

ដើមទសវត្សរ៍ឆ្នាំ 1990 គឺជាការចាប់ផ្តើមនៃការប្រើប្រាស់អ៊ីនធឺណិត។ គេហទំព័រដំបូងគេរបស់ពិភពលោកត្រូវបានបោះពុម្ពក្នុងឆ្នាំ 1991 ហើយត្រូវបានប្រើប្រាស់ត្រឹមតែ 0.1% នៃចំនួនប្រជាជនពិភពលោកនៅពេលនោះ។

ខាងក្រោមនេះគឺជាតួលេខអ្នកប្រើប្រាស់អ៊ីនធឺណិតទូទាំងពិភពលោកពីឆ្នាំ 1990 ដល់ឆ្នាំ 2025 រួមជាមួយនឹងចំណែកនៃចំនួនប្រជាជនពិភពលោកដែលប្រើប្រាស់អ៊ីនធឺណិតជារៀងរាល់ឆ្នាំ៖

ឆ្នាំ 1990: មនុស្ស 2.6 លាននាក់បានចូលប្រើអ៊ីនធឺណិត (0.05% នៃចំនួនប្រជាជនពិភពលោក)

1995: មនុស្ស 39.2 លាននាក់បានចូលប្រើអ៊ីនធឺណិត (0.7% នៃចំនួនប្រជាជនពិភពលោក)

2000: មនុស្ស 361 លាននាក់បានចូលប្រើអ៊ីនធឺណិត (6% នៃចំនួនប្រជាជនពិភពលោក)

2005: 1 ពាន់លាននាក់បានចូលប្រើអ៊ីនធឺណិត (15% នៃចំនួនប្រជាជនពិភពលោក)

2010: មនុស្ស 1.9 ពាន់លាននាក់បានចូលប្រើអ៊ីនធឺណិត (27% នៃចំនួនប្រជាជនពិភពលោក)

2015: មនុស្ស 3 ពាន់លាននាក់បានចូលប្រើអ៊ីនធឺណិត (40% នៃចំនួនប្រជាជនពិភពលោក)

2020: មនុស្ស 4.5 ពាន់លាននាក់បានចូលប្រើអ៊ីនធឺណិត (57% នៃចំនួនប្រជាជនពិភពលោក)

2025: មនុស្ស 5.6 ពាន់លាននាក់បានចូលប្រើអ៊ីនធឺណិត (68% នៃចំនួនប្រជាជនពិភពលោក)

អ៊ីនធឺណែតបានដើរតួនាទីយ៉ាងសំខាន់ក្នុងការផ្លាស់ប្តូរបច្ចេកវិទ្យាក្នុងរយៈពេល 30 ឆ្នាំចុងក្រោយនេះ ហើយការអភិវឌ្ឍន៍ឧបករណ៍ដូចជាស្មាតហ្វូនបានធ្វើឱ្យមនុស្សមានភាពងាយស្រួលក្នុងការប្រើប្រាស់អ៊ីនធឺណិត។ នៅឆ្នាំ 2025 អ្នកប្រើប្រាស់អ៊ីនធឺណេត 96% នឹងចូលប្រើអ៊ីនធឺណិតតាមរយៈទូរស័ព្ទដៃ។ ទោះយ៉ាងណាក៏ដោយ មនុស្សប្រហែល 2.6 ពាន់លាននាក់នៅតែមិនមានលទ្ធភាពប្រើប្រាស់អ៊ីនធឺណិត។

ក្នុងយុគសម័យ AI ការចូលប្រើអ៊ីនធឺណិតកាន់តែមានសារៈសំខាន់ ព្រោះវាក្លាយជាច្រកទ្វារចម្បងសម្រាប់ឧបករណ៍ដែលដំណើរការសេវាកម្មជាច្រើនដែលមាននៅលើអ៊ីនធឺណិត។

រលកបន្ទាប់នៃអ្នកប្រើប្រាស់ទំនងជាមកពីតំបន់ដែលមិនទាន់មានការអភិវឌ្ឍន៍ ដែលការបែងចែកឌីជីថលនៅតែធំទូលាយ។ ជាឧទាហរណ៍ នៅទ្វីបអាហ្រ្វិក មានតែ 38% នៃចំនួនប្រជាជនដែលប្រើប្រាស់អ៊ីនធឺណេត បើធៀបនឹង 87% នៅអាមេរិក និង 91% នៅអឺរ៉ុប។

តាមក្រុមចំណូល ភាពខុសគ្នាគឺកាន់តែច្បាស់៖ 93% នៃបណ្តាប្រទេសដែលមានប្រាក់ចំណូលខ្ពស់មានការប្រើប្រាស់អ៊ីនធឺណិត ខណៈដែល 27% នៅក្នុងប្រទេសដែលមានចំណូលទាបមានលទ្ធភាពប្រើប្រាស់។

ប្រភព visualcapitalist telefonica Internet Day

ដោយ លោក សាវុឌ្ឍ