ស្រង់ពី AP

ដោយ សូរ្យសែង៖

មន្ត្រីក្រសួងការបរទេសចិនបានឲ្យដឹងថា ប្រទេសចិនបានបែងចែកវ៉ាក់សាំងការពារកូវីដ-១៩ ទៅប្រទេស ៤០ ក្នុងទ្វីបអាហ្វ្រិក ដើម្បីបង្ហាញការអាណិតអាសូរពិតប្រាកដចំពោះប្រទេសដទៃ ទោះបីត្រូវបានគេចាត់ទុកជាវ៉ាក់សាំងការទូតក៏ដោយ ។

ទីភ្នាក់ងារព័ត៌មាន AP រាយការណ៍ពីទីក្រុងប៉េកាំង ប្រទេសចិន កាលពីថ្ងៃទី ២០ ឧសភាថា រដ្ឋាភិបាលចិនបានបែង​ចែកវ៉ាក់សាំងការពារកូវីដ-១៩ ទៅបណ្តាប្រទេសក្នុងទ្វីបអាហ្វ្រិកចំនួន ៤០ ប្រទេសរួចហើយ តាមរយៈការបរិច្ចាគ ឬលក់វាក្នុងតម្លៃយោគយល់ជាមិត្ត នេះគឺដើម្បីបង្ហាញពីការអាណិតអាសូរចំពោះប្រទេសដទៃទៀតដោយពិតប្រាកដ ទោះបីជាសកម្មភាពរបស់ចិនត្រូវបានប្រៀបធៀបជាមួយប្រទេសខ្លះក៏ដោយ ដែលត្រូវរង់ចាំចាក់ឲ្យពលរដ្ឋរបស់ខ្លួនជាមុនសិន ទើបយកមកបែងចែកទៅបរទេស ប៉ុន្តែសម្រាប់ចិន ទោះបីជាជនជាតិចិនត្រូវចាក់វ៉ាក់សាំងឱ្យបានលឿនបំផុតក៏ដោយ ក៏រឿងបរទេសគឺចាំបាច់ ដូច្នេះយើងក៏ត្រូវព្យាយាមជួយប្រទេសផ្សេងទៀតផងដែរ ។

ចំណែកសហរដ្ឋអាមេរិក ដែលជាប្រទេសផលិតវ៉ាក់សាំងបានច្រើន ប្រធានាធិបតី ចូ បៃដេន បានប្រកាសប្រគល់វ៉ាក់សាំង ២០ លានដូសនៅ ៦ សប្តាហ៍ខាងមុខនេះទៀត រួមទាំង ៨០ លានដូស ដែលសហរដ្ឋអាមេរិកប្រកាសបែងចែក ក៏មិនទាន់បង្ហាញច្បាស់ថា ឲ្យទៅប្រទេសណាខ្លះដែរ ។

ក្នុងចំណែកវ៉ាក់សាំងការទូតរបស់ចិននោះ ប្រកបដោយផលសម្រេច ព្រោះតាមរបាយការណ៍របស់ទីភ្នាក់ងារព័ត៌មាន AP ឃើញថា បានបែងចែកវ៉ាក់សាំងរួចហើយចំនួន ៥០០ លានដូស ឲ្យប្រទេសផ្សេងៗ ៤៥ ប្រទេស ក្នុងនេះក៏មានកម្ពុជា និង ថៃ ផងដែរ ៕