សូរ្យសែង៖
ប្រទេសឥណ្ឌូនេស៊ីគ្រោងនឹងពិនិត្យឡើងវិញនូវប្រាក់ឈ្នួលអប្បបរមា បន្ទាប់ពីមានការបះបោរតវ៉ាប្រឆាំងទូទាំងប្រទេស ស្តីពីការកើនឡើងតម្លៃប្រេង ហើយបានស្នើឲ្យរដ្ឋាភិបាលដំឡើងប្រាក់ឈ្នួលអប្បបរមាឲ្យស្របតាមការឡើងថ្លៃក្នុងការរស់នៅ ។
កាលពីថ្ងៃទី ១៣ កញ្ញា ២០២២ ការិយាល័យប្រធានាធិបតីឥណ្ឌូនេស៊ីឲ្យដឹងថា រដ្ឋាភិបាលកំពុងត្រៀមច្បាប់ប្រាក់ឈ្នួលអប្បបរមា និងច្បាប់ការងារផ្សេងទៀត បន្ទាប់ពីសហជីពក្នុងឧស្សាហកម្មផ្សេងៗបានធ្វើការជួបជុំគ្នានៅទូទាំងប្រទេស ដើម្បីទប់ទល់នឹងការកើនឡើងតម្លៃប្រេងនាពេលកន្លងមក ចំណែកប្រាក់ចំណូលរបស់កម្មករនៅដដែល ។ ពួកគេក៏បានអំពាវនាវឱ្យមានការកែសម្រួលរូបមន្តដំឡើងប្រាក់ឈ្នួលអប្បបរមាប្រចាំឆ្នាំផងដែរ ដើម្បីឱ្យស្របទៅនឹងការពិត ។
ទីភ្នាក់ងារព័ត៌មាន Reuters បានរាយការណ៍ថា ប្រធានាធិបតី ចូកូ វីដូដូ របស់ឥណ្ឌូនេស៊ីបានដំឡើងថ្លៃប្រេងឥន្ធនៈ 30 ភាគរយនៅដើមខែកញ្ញា ដើម្បីទប់ស្កាត់ការកើនឡើងនៃថវិកាលើការឧបត្ថម្ភធនថាមពល ទង្វើនេះបានធ្វើឲ្យកម្មករ និងនិស្សិតតវ៉ាពេញទូទាំងប្រទេស ។ ការដំឡើងថ្លៃប្រេងបានបង្កើនល្បឿនអតិផរណានៅក្នុងប្រទេសឥណ្ឌូនេស៊ី ដែលបានឈានដល់កម្រិតខ្ពស់បំផុតចាប់តាំងពីឆ្នាំ ២០១៥ ដោយធ្វើឱ្យតម្លៃម្ហូបអាហារកាន់តែកើនឡើង ៕