ដោយ សូរ្យសែង៖
AFP រាយការណ៍នៅថ្ងៃនេះ (១១ មិថុនា)ថា មានហេតុការណ៍បាញ់ប្រហារទីបញ្ជាការតម្រួតវៀតណាម ២ កន្លែង បណ្តាលឲ្យមានមនុស្សបាត់បង់ជីវិត និង របួសជាច្រើននាក់ ស្ថិតនៅតំបន់ផុយស្រួយនៃប្រទេសវៀតណាម ។
គេហទំព័ររបស់ក្រសួងសន្តិសុខសាធារណៈវៀតណាមបញ្ជាក់ថា មនុស្សប្រាំមួយនាក់ត្រូវបានចាប់ខ្លួន ពាក់ព័ន្ធនឹងការបាញ់ប្រហារនៅស្រុកគូគីន (Cư Kuin) នៃខេត្តដាក់ឡាក់ (Đắk Lắk) ខណៈប៉ូលិសកំពុងស៊ើបអង្កេតបន្ថែមលើជនសង្ស័យ ។
ក្រសួងសន្តិសុខសាធារណៈវៀតណាមឲ្យដឹងទៀតថា ការវាយប្រហារលើអង្គភាពប៉ូលិសទាំងពីរនៅក្នុងសហគមន៍អៀទៀវ និងអៀកទឺ បានកើតឡើងនៅព្រឹកថ្ងៃអាទិត្យ ទី១១ ខែមិថុនា ដែលបានធ្វើឲ្យហ្វូងមនុស្សស្លាប់ និងរបួស រួមទាំងប៉ូលីសផង ទោះជាយ៉ាងណា មន្ត្រីមូលដ្ឋាន និងជនស៊ីវិល មិនបានផ្តល់ចំនួនជាក់លាក់នៃជនរងគ្រោះទេ ។
តំបន់ខ្ពង់រាបភាគកណ្តាលរបស់វៀតណាម ដែលជាកន្លែងរស់នៅរបស់ជនជាតិភាគតិចជាច្រើន នេះគឺជាតំបន់ដែលងាយរងគ្រោះសម្រាប់រដ្ឋាភិបាលផ្តាច់ការនៃប្រទេស វាក៏ជាកន្លែងមិនពេញចិត្តលើបញ្ហាផ្សេងៗរបស់វៀតណាមគ្រប់បែបយ៉ាង ដូចជាសិទ្ធិកាន់កាប់ដីធ្លីជាដើម និងការខ្វែងគំនិតនយោបាយ ។
ដោយកុលសម្ព័ន្ធមួយចំនួននៅក្នុងតំបន់នេះ ត្រូវបានគេស្គាល់ជាទូទៅថាជាជនជាតិម៉ុងតាញ៉ា(Montagnards) ពួកគេគឺជាជនជាតិវៀតណាមខាងត្បូងដូចគ្នាដែលគាំទ្រដោយសហរដ្ឋអាមេរិកក្នុងអំឡុងសង្គ្រាមវៀតណាមដែលអូសបន្លាយរាប់ទសវត្សរ៍ ក្នុងនោះក្រុមជនជាតិភាគតិចមួយចំនួនទាមទារស្វ័យភាពកាន់តែខ្លាំង។
ឧប្បត្តិហេតុនៃអំពើហិង្សាដោយកាំភ្លើងគឺកម្រមានណាស់នៅក្នុងប្រទេសវៀតណាម ច្បាប់បានចែងថា ការកាន់កាប់អាវុធរបស់ប្រជាពលរដ្ឋ គឺខុសច្បាប់ ៕