ដោយ សូរ្យសែង៖
គណបក្សកាវក្លៃ បានជូនសេចក្តីព្រាងវិសោធនកម្ម មាត្រា២៧២ ដកហូតអំណាចសមាជិកព្រឹទ្ធសភាដែលបោះឆ្នោតជ្រើសរើសនាយករដ្ឋមន្ត្រី ទៅប្រធានរដ្ឋសភានៅរសៀលថ្ងៃទី ១៤ កក្កដានេះហើយ ។ តើការស្នើធ្វើវិសោធនកម្មរដ្ឋធម្មនុញ្ញ មាត្រា ២៧២ នឹងបានសម្រេចដូចបំណងឬអអត់? សូមរង់ចាំតាមដាន ។
លោក ឆៃថាវ៉ាត់ តុឡាធន អនុប្រធានគណបក្សកាវក្លៃ (ឈានទៅមុខ) និងជាអគ្គលេខាគណបក្សកាវក្លៃ បានផ្តល់បទសម្ភាសនៅថ្ងៃនេះថា ជាបឋមយើងនឹងពិភាក្សាជាមួយគណបក្សភឿថៃ មុនពេលពិភាក្សាជាមួយគណបក្សទាំង 8 នៃរដ្ឋាភិបាលចម្រុះ ដើម្បីរិះរកវិធីណាផ្សេងទៀតដើម្បីទទួលបានសំឡេងកើនឡើង ។
នៅពេលសួរថា ហេតុអ្វីបានជាមិនដកថយក្នុងគោលនយោបាយកែប្រែមាត្រា ១១២ ដែលធ្វើឲ្យជាប់គាំងនោះ ? លោក ឆៃថាវ៉ាត់ មានប្រសាសន៍ថា លោកមិនអាចធ្វើបានទេ ព្រោះវាជាគោលនយោបាយមួយក្នុងចំណោមគោលនយោបាយមួយរយដែលបានធ្វើយុទ្ធនាការ ហើយបានសន្យាជាមួយប្រជាជនរួចហើយ បើទោះគាត់ដកថយក៏មិនច្បាស់ដែរថា តើគាត់នឹងទទួលបានការបោះឆ្នោតពីសមាជិកព្រឹទ្ធសភាឬអត់នោះដែរ ។
អ្នកនយោបាយជាន់ខ្ពស់ជាច្រើន បានប្រាប់លោក ភីថា ប្រធានគណបក្សកាវក្លៃមុនថ្ងៃបោះឆ្នោតរើសនាយករដ្ឋមន្ត្រីថា ត្រូវ «ដកថយរឿងមាត្រា ១១២ វាជាការល្អ» ។
លោកអនុប្រធានបក្សនិយាយថា ខ្ញុំបានឃើញសារនៅលើ Online របស់សមាជិកព្រឹទ្ធសភាមុនពេលបោះឆ្នោតនាយករដ្ឋមន្ត្រី បានបញ្ជាក់ថា «ប្រយ័ត្នលោក ភីថា ដែលគាត់ថា មិនស្នើវិសោធនកម្មមាត្រា ១១២ ក្រែងជាការបោកបញ្ឆោត ហើយមានផែនការអាក្រក់កើតឡើង ដូច្នេះកុំចាញ់បោកគេ!» ។
លោក វ៉ាន់ ន័រ មូហាំម៉ាត់ ប្រធានរដ្ឋសភាមានប្រសាសន៍ថា គាត់បានទទួលសេចក្តីព្រាងវិសោធនកម្មរដ្ឋធម្មនុញ្ញរួចហើយ ហើយនឹងដំណើរការឲ្យបានលឿនបំផុត គាត់នឹងកោះប្រជុំរដ្ឋសភា ដើម្បីបោះឆ្នោតរើសនាយករដ្ឋមន្ត្រីជាលើកទី ២ នៅថ្ងៃទី ១៩ កក្កដា វេលាម៉ោង ៩.៣០ នាទីព្រឹក ៕