ដោយ សូរ្យសែង៖
កងទ័ពប្រទេសហ្គាបុង(Gabon) ស្ថិតក្នុងទ្វីបអាហ្វ្រិក បានប្រកាសធ្វើរដ្ឋប្រហារតាមទូរទស្សន៍នៅថ្ងៃទី ៣០ ខែសីហា ក្រោយលោក អាលី បុងហ្គោ ឈ្នះឆ្នោតនៃអាណត្តិទី៣ ។
អ្នកធ្វើរដ្ឋប្រហារបានប្រកាសថា ពួកគេកំពុងលុបចោលលទ្ធផលបោះឆ្នោត និងបិទព្រំដែនគ្រប់ទិសទី រហូតដល់មានការប្រកាសផ្សេងទៀត។
ទីភ្នាក់ងារព័ត៌មានរ៉ឺទ័រ ក៏បានរាយការណ៍ផងដែរថា សំឡេងខ្លាំងៗ និងការបាញ់កាំភ្លើងត្រូវបានឮនៅក្នុងទីក្រុង លីប៊្រេវីល (Libreville) ។
មជ្ឈមណ្ឌលបោះឆ្នោតហ្គាបុង បានប្រកាសកាលពីថ្ងៃពុធថា លោក អាលី បុងហ្គោ ប្រធានាធិបតីប្រទេសហ្គាបុង បានឈ្នះការបោះឆ្នោតជាមួយនឹងលទ្ធផល 64.27% នៃសម្លេងឆ្នោត បន្ទាប់មក អាល់បឺត អនដូ អាស្សា (Albert Ondo Azza) ទទួលបាន 30.77% ។ ការបោះឆ្នោតទទួលបានការរិះគន់ពីគណបក្សប្រឆាំងថាមិនត្រឹមត្រូវ និងមិនយុត្តិធម៌ ប៉ុន្តែក្រុមរបស់លោក បុងហ្គោ បានបដិសេធការចោទប្រកាន់នេះ ។
លោក អាលី បុងហ្គោ ប្រធានាធិបតីប្រទេសហ្គាបុង
ជាមួយគ្នានេះ គណបក្សជាច្រើន បានចាត់ទុកការបោះឆ្នោតនេះ ជាការគួរឲ្យសង្ស័យ ដូចជាមិនអនុញ្ញាតឲ្យបរទេសចូលរួមសង្កេតការណ៍ជាដើម ។ ប្រព័ន្ធផ្សព្វផ្សាយបរទេសមួយចំនួនមិនត្រូវបានអនុញ្ញាតឱ្យរាយការណ៍ទេ និងកាត់ផ្តាច់អ៊ីនធឺណិត និងបានប្រកាសបម្រាមគោចរពេលយប់នៅទូទាំងប្រទេសមុនការបោះឆ្នោត ។
នេះជារដ្ឋប្រហារលើកទី ៨ ហើយ ដែលធ្វើឡើងនៅតំបន់អាហ្វ្រិកកណ្តាលចាប់តាំងពីឆ្នាំ២០២០ ៕