Bong SoRith

កាសែតបរទេសឈ្មោះ Nikkei Asia ចេញផ្សាយនៅថ្ងៃទី ១៦ ឧសភា ​២០២៥ ហើយត្រូវបានកាសែត prachachat របស់ថៃរាយការណ៍ថា រដ្ឋាភិបាលសហរដ្ឋអាមេរិកបានប្រកាសថាខ្លួនកំពុងពិចារណាផ្តល់ជំនួយហិរញ្ញវត្ថុដើម្បីជួយទៅលើការសាងសង់អាកាសយានដ្ឋានអន្តរជាតិតេជោ-តាខ្មៅ (Techo Takhmao International Airport) របស់កម្ពុជា ដែលអាចផ្ទុកអ្នកដំណើរបាន ១៣ លាននាក់ក្នុងមួយឆ្នាំ និងជំនួសអាកាសយានដ្ឋានអន្តរជាតិភ្នំពេញបច្ចុប្បន្នដែលអាចផ្ទុកអ្នកដំណើរបានត្រឹមតែ ៥ លាននាក់ក្នុងមួយឆ្នាំ។

ចំណាត់ការនេះកើតឡើងចំពេលមានសង្រ្គាមពាណិជ្ជកម្មដែលកម្ពុជាកំពុងរងពន្ធពីសហរដ្ឋអាមេរិកចំនួន 49% និងមន្ត្រីជាន់ខ្ពស់កម្ពុជាបានចរចាដំណាក់កាលទី១ និងត្រឹមតែប៉ុន្មានសប្តាហ៍បន្ទាប់ពីប្រធានាធិបតីចិន ហ្ស៊ី ជិនពីង បានធ្វើទស្សនកិច្ចនៅប្រទេសអាស៊ាន ដែលជាការបារម្ភរបស់អាមេរិកពីឥទ្ធិពលចិននៅកម្ពុជា ។

សាជីវកម្មហិរញ្ញវត្ថុអភិវឌ្ឍន៍អន្តរជាតិរបស់សហរដ្ឋអាមេរិក (DFC) ដែលជាទីភ្នាក់ងាររដ្ឋាភិបាលដែលចាប់ដៃគូជាមួយវិស័យឯកជនដើម្បីផ្តល់ហិរញ្ញប្បទានដល់គម្រោងផ្សេងៗក្នុងប្រទេសកំពុងអភិវឌ្ឍន៍ ហើយត្រូវបានបង្កើតឡើងក្នុងអំឡុងអាណត្តិដំបូងរបស់លោកប្រធានាធិបតី ដូណាល់ ត្រាំ ដែលបានចេញផ្សាយរបាយការណ៍វាយតម្លៃផលប៉ះពាល់បរិស្ថាន និងសង្គម (ESIA) ស្តីពីការសាងសង់អាកាសយានដ្ឋានតេជោ-តាខ្មៅ ។

ឯកសារដែលបើកសម្រាប់សវនាការជាសាធារណៈរហូតដល់ថ្ងៃទី 12 ខែកក្កដា គ្រាន់តែនិយាយថា គម្រោងនេះស្ថិតក្នុងដំណាក់កាលដំបូងរបស់ខ្លួន ដោយមិនបានបញ្ជាក់អំពីចំនួនជំនួយ លក្ខខណ្ឌនៃមូលនិធិ ឬការគាំទ្រណាមួយឡើយ។ ទោះជាយ៉ាងណាក៏ដោយ អាកាសយានដ្ឋានគ្រោងនឹងបើកដំណាក់កាលដំបូងរបស់ខ្លួននៅថ្ងៃទី 10 ខែកក្កដា ប្រសិនបើវាឆ្លងកាត់ការសាកល្បងចុងក្រោយ និងឆ្លងកាត់របាយការណ៍ហិរញ្ញវត្ថុ។

អាកាសយានដ្ឋានអន្តរជាតិតេជោ គឺជាក្រុមហ៊ុនបណ្តាក់ទុនរួមគ្នារវាងសាជីវកម្មវិនិយោគក្រៅប្រទេសកម្ពុជា (OCIC) ដែលមានភាគហ៊ុន 90% និងអាជ្ញាធរអាកាសចរណ៍ស៊ីវិលគ្រប់គ្រងដោយរដ្ឋ (SSCA) ដែលមានភាគហ៊ុន 10% ដែលមានទីតាំងនៅខេត្តកណ្តាល និងតាកែវ ចម្ងាយ 20 គីឡូម៉ែត្រភាគខាងត្បូងរាជធានីភ្នំពេញ ជាមួយនឹងទុនវិនិយោគចំនួន 1.5 ពាន់លានដុល្លារ។

ទីភ្នាក់ងារហិរញ្ញវត្ថុអភិវឌ្ឍន៍អន្តរជាតិរបស់សហរដ្ឋអាមេរិកបានបញ្ជាក់ថា ខ្លួនកំពុងធ្វើការពិនិត្យឡើងវិញលើគម្រោងអាកាសយានដ្ឋាន ដើម្បីធានាថាវាបំពេញតាមស្តង់ដារនៃសាជីវកម្មហិរញ្ញវត្ថុអន្តរជាតិ (IFC) ដែលជាសមាជិក និងភ្នាក់ងារមួយនៅក្រោមក្រុមធនាគារពិភពលោកឬទេ ៕