អាជ្ញាធរខេត្តឈៀងរ៉ៃ ប្រទេសថៃ នៅតែបន្តហាមប្រជាពលរដ្ឋមិនឲ្យប្រើប្រាស់ទឹកទន្លេកុក ទន្លេសៃ និងទន្លេមេគង្គ ដោយសាររកឃើញសារធាតុអាសេនិចរយៈពេល ៣ខែកន្លងមកហើយ ហើយការិយាល័យសុខភាពសាធារណៈខេត្តឈៀងរ៉ៃ នៅតែបញ្ជាក់ថា ប្រភពទឹកនៅមិនមានសុវត្ថិភាព ។

កាលពីចុងខែឧសភា ការិយាល័យសុខភាពសាធារណៈខេត្តឈៀងរ៉ៃ បានរាយការណ៍ថា ផ្អែកលើការសង្កេតការជីកយក​រ៉ែពីប្រទេសមីយ៉ាន់ម៉ា បង្កឲ្យហូរចូលទន្លេកុក និងសៃ ។ ការិយាល័យបរិស្ថាន និងគ្រប់គ្រងការបំពុលទី១របស់ខេត្ត បានវិភាគគុណភាពទឹកទាំងនេះ ដោយប្រមូលសំណាកទឹកលើផ្ទៃទឹកពីទន្លេកុក និងដៃទន្លេចំនួន ១៥ ទីតាំង និងទន្លេមេគង្គ ចំនួន ៣ ដងគឺ៖ 

• លើកទី១៖ ថ្ងៃទី២៤ ខែមីនា ឆ្នាំ២០២៥
• លើកទី២៖ ថ្ងៃទី២១-២៤ ខែមេសា ឆ្នាំ២០២៥
• លើកទី៣៖ ថ្ងៃទី ១-២ ខែឧសភា ឆ្នាំ២០២៥

បន្ទាប់ពីការត្រួតពិនិត្យរយៈពេល 3 ខែ លទ្ធផលវិភាគបានរកឃើញថា គុណភាពទឹកទាំងមូលស្ថិតក្នុងកម្រិតមួយ មិនមានសុវត្ថិភាព ដោយនៅចំណុចខ្លះ កម្រិតនៃការបំពុលសរីរាង្គ និងបាក់តេរីត្រូវបានរកឃើញថាលើសពីស្តង់ដារ ហើយកម្រិតអាសេនិចត្រូវបានគេរកឃើញថាលើសពីស្តង់ដារ ដែលអាចប៉ះពាល់ដល់សុខភាព ប្រសិនបើទឹកត្រូវបានប្រើប្រាស់ដោយផ្ទាល់ ។ ចំណែកត្រី និងសត្វទឹកក្នុងទន្លេទាំនេះក៏បានឲ្យផ្អាកបរិភោគផងដែរ ដោយគេយកមកពិនិត្យឃើញត្រីមានសភាពពុលគួរឲ្យខ្លាច។ តែប្រព័ន្ធផលិតទឹកម៉ាស៊ីននៅតែមានសុវត្ថិភាព និងអាចប្រើប្រាស់បានដូចធម្មតា។

អាជ្ញាធរថៃណែនាំពលរដ្ឋថៃសម្រាប់អ្នកប្រើប្រាស់ទឹកទន្លេកុក

ជៀសវាងការប្រើប្រាស់ទឹកដែលមិនបានកែច្នៃពីទន្លេកុក ទន្លេសៃ និងទន្លេមេគង្គ។ ជាឧទាហរណ៍ អ្នកមិនគួរលាងបន្លែ ផ្លែឈើ ងូតទឹក ឬឱ្យសត្វចិញ្ចឹមរបស់អ្នកផឹកទឹកពីប្រភពទាំងនេះឡើយ។

• ជៀសវាងការលេងក្នុងទឹក ឬប៉ះទឹកដោយផ្ទាល់ ប្រសិនបើចាំបាច់។
• ប្រសិនបើអ្នកជួបប្រទះនូវរោគសញ្ញាមិនប្រក្រតីដូចជា កន្ទួល ចង្អោរ ក្អួត ឬមានប្រវត្តិប៉ះពាល់នឹងទឹក អ្នកគួរតែទៅជួបគ្រូពេទ្យជាបន្ទាន់។
• តាមដានព័ត៌មានពីភ្នាក់ងាររដ្ឋាភិបាលយ៉ាងជិតស្និទ្ធ។
• ជៀសវាងការចាប់ ឬបរិភោគត្រី និងសត្វក្នុងទឹកពីប្រភពទឹកដែលមានហានិភ័យ ៕