អត្ថបទ សូរ្យរិទ្ធ៖

៧ ប្រទេសជាសមាជិកសហភាពអឺរ៉ុប(EU) បានបើកប្រើ«វិញ្ញាបនបត្រកូវីដឌីជីថល (Digital COVID Certificate)» ដែលតម្រូវការតេស្តិ៍អវិជ្ជមាន, ការចាក់វ៉ាក់សាំងរួច និងបានជាសះស្បើយពីជំងឺកូវីដ-១៩ សម្រាប់វិស័យទេសចរណ៍ បានចាប់ផ្តើមប្រើមុនកាលកំណត់មួយខែ គឺថ្ងៃទី ១ មិថុនានេះតទៅ ។

៧ ប្រទេសទាំងនោះមាន ប៊ុលហ្គារី, សាធារណរដ្ឋឆែក, ដាណាម៉ាក, អាល្លឺម៉ង់, ក្រិក, ក្រូអាស៊ី និងប៉ូឡូញ ។​ សេចក្តីថ្លែងការណ៍របស់គណៈកម្មាធិការអឺរ៉ុប (EC) និយាយថា វិញ្ញាបនបត្រខាងលើបើកឲ្យប្រជាជន ធ្វើដំណើរបានដោយសេរី និង សុវត្ថិភាពនៅរដូចក្តៅរំហើយនេះ ។

ការបញ្ជាក់វិញ្ញាបនបត្រ គឺមានសុវត្ថិភាព និងមិនរំខានឯកជនភាពរបស់គេឡើយ ។ វិញ្ញាបនប័ត្រនេះមានទាំងទ្រង់ទ្រាយឌីជីថល និងក្រដាស វានឹងជាពស្តុតាងដែលបញ្ជាក់ថា អ្នកកាន់វិញ្ញាបនបត្រនេះ ត្រូវទទួលការចាក់វ៉ាក់សាំងការពារ​កូវីដ-១៩ រួច រួមទាំងមានលទ្ធផលតេស្តអវិជ្ជមាន ឬជាសះស្បើយពីកូវីដ-១៩ ។

គណៈកម្មាធិការបាននិយាយទៀតថា មានការសាកល្បងរួចហើយនូវច្រកចេញ-ចូលប្រទេស សម្រាប់អ្នកកាន់វិញ្ញាបន​បត្រ​នៅ ២២ ប្រទេស ហើយវិធានការសម្រាប់ប្រើប្រាស់វិញ្ញាបនបត្រ នឹងចូលជាធរមាននៅថ្ងៃទី ១ ខែកក្កដាដោយមានរយៈពេលសម្របខ្លួន ៦ សប្តាហ៍ ដែលនឹងផ្តល់ពេលវេលាដល់ប្រទេសមួយចំនួនបន្ថែមទៀត លើការចេញវិញ្ញាបន​បត្រឲ្យពលរដ្ឋខ្លួន សម្រាប់ប្រទេសជាសមាជិកដែលបានឆ្លងកាត់ការសាកល្បងបច្ចេកទេស រួមទាំងការត្រៀមចេញ និងផ្ទៀងផ្ទាត់វិញ្ញាបនបត្រ ដែលអាចប្រើប្រព័ន្ធបានដោយស្ម័គ្រចិត្ត ។

វិញ្ញាបនបត្រនេះឆ្លុះបញ្ចាំងពីគុណតម្លៃបន្ថែម​ នៃដំណោះស្រាយសុខភាពអេឡិចត្រូនិចសាធារណៈ ប្រកបដោយប្រសិទ្ធភាព​ចំពោះប្រជាជន អ្វីដែលសំខាន់នៅចុងសប្តាហ៍ខាងមុខ ដែលរដ្ឋជាសមាជិកត្រូវគ្រប់គ្រងប្រព័ន្ធចេញ ប្រមូល និងបំពេញវិញ្ញាបនបត្រ ដើម្បីត្រៀមខ្លួនឱ្យបានទាន់ពេលវេលាសម្រាប់រដូវកាលទេសចរណ៍នេះ ៕