តាំងពីយប់កណ្តាលអធ្រាត្រឆ្លងចូលថ្ងៃទី ១៩ មិថុនា នៅលើបណ្តាញសង្គម មានព័ត៌មានជាច្រើននិយាយថា លោកស្រី ផែថងថាន បានចុះហត្ថលេខាលាចេញពីតំណែងហើយ ក្រោយពីបែកសារសំឡេងសន្ទនាជាមួយសម្តេចតេជោ ។ តែរហូតមកទល់នឹងម៉ោង ៩.៣០ នាទីព្រកឹ នៅមិនទាន់មានប្រភពព័ត៌មានផ្លូវការណាមួយ សូម្បីសារព័ត៌មានក្នុងស្រុកប្រទេសថៃ ក៏មិនមានព័ត៌មានអំពីលោកស្រី ផែថងថាន ឬ អ៊ុងអ៊ីង ចុះហត្ថលេខាលាលែងពីតំណែងដែរ ប៉ុន្តែមានប្រតិកម្មភាគច្រើនដូចព្យុះពីគណបក្សប្រឆាំង និងគណបក្សផ្សេងៗ ដែលមាននិន្នាការដាក់សម្ពាធឲ្យ អ៊ុងអ៊ីង រំលាយសភា និងលាចេញពីតំណែង ។

ប្រតិកម្មពីគណបក្សចម្រុះរដ្ឋាភិបាល និងបក្សប្រឆាំង ក្រោយពីវាំងនននៃការសន្ទនាតាមទូរស័ព្ទត្រូវបាន បើក។ «គណបក្សភូមិចៃថៃ» បានផ្តើមមុនគេ ដកខ្លួនចេញពីរដ្ឋាភិបាល ហើយអំពាវនាវឲ្យនាយករដ្ឋមន្ត្រីទទួលខុសត្រូវចំពោះទង្វើឲ្យប្រទេសថៃបាត់បង់កិត្តិយស សេចក្តីថ្លៃថ្នូរ ប្រជាជន និងយោធា ស្របពេលគណបក្ស «ផាឡាំងប្រាឆាឆាត» អំពាវនាវឲ្យនាយករដ្ឋមន្ត្រីលាលែងពីតំណែង ហើយគណបក្សផ្សេងៗ ឲ្យនាយករដ្ឋមន្ត្រីរំលាយសភា។

ចំណែកគណបក្ស«រួមថៃសាងឆាត» បានបង្ហោះនៅលើ Facebook បញ្ជាក់ពីជំហររបស់ខ្លួនក្នុងការរក្សា និងការពារអធិបតេយ្យភាព កិត្តិយស និងផលប្រយោជន៍របស់ប្រទេសជាតិ និងប្រជាជនលើសអ្វីៗទាំងអស់។

គណបក្ស«ភឿថៃ» ជាបក្សកាន់អំណាច បានបង្ហោះសារថា គណបក្សភឿថៃបានបញ្ជាក់ពីបេសកកម្មរបស់ខ្លួនដើម្បីការពារអធិបតេយ្យភាព និងផលប្រយោជន៍របស់ប្រជាជនថៃ ដោយគាំទ្រដល់វិធីសាស្រ្តរបស់រដ្ឋាភិបាល វិស័យសន្តិសុខ យោធា និងក្រសួងការបរទេស ដោយប្រកាន់ខ្ជាប់នូវគោលការណ៍សន្តិភាពក្នុងការដោះស្រាយបញ្ហា។ ក្នុង​ស្ថានភាព​បែប​នេះ គ្មាន​កម្លាំង​ណា​ធំ​ជាង​ការ​រួបរួម​របស់​ប្រជាជន​ថៃ​សម្រាប់​ប្រទេស​ថៃ​ឡើយ។

គណបក្សប្រជាធិបតេយ្យ ​បាន​អញ្ជើញ​គណៈកម្មាធិការ​ប្រតិបត្តិ​គណបក្ស​មក​ប្រជុំ​ពិភាក្សា​អំពី​ស្ថានការណ៍​នយោបាយ​នៅ​ទីស្នាក់ការ​​វេលា​ម៉ោង​ ៥​ល្ងាច​។

គណបក្ស«ផាឡាំងប្រាឆារ៉ាត់» បានចេញសេចក្តីថ្លែងការណ៍សម្តែងការព្រួយបារម្ភចំពោះស្ថានការណ៍ និងការអនុវត្តគោលនយោបាយសន្តិសុខក្នុងស្រុក ក្រោមការដឹកនាំរបស់លោកស្រីនាយករដ្ឋមន្ត្រី ដែលឆ្លុះបញ្ចាំងយ៉ាងច្បាស់ពីភាពទន់ខ្សោយ កង្វះបទពិសោធន៍ និងជំនាញចរចាក្នុងការដោះស្រាយជម្លោះរវាងប្រទេសថៃ និងកម្ពុជា ដែលប៉ះពាល់ដល់ទំនុកចិត្តរបស់ប្រជាជនក្នុងការគ្រប់គ្រងប្រទេស។ ពួកគេ​ក៏​បាន​យល់​ស្រប​ថា នាយក​រដ្ឋមន្ត្រី​គួរ​តែ​ប្រកាស​លាលែង​ពី​តំណែង​ដើម្បី​បង្ហាញ​ការ​ទទួល​ខុស​ត្រូវ​ចំពោះ​ភាពទន់ខ្សោយនេះ។ គណបក្ស«ថៃសាងថៃ» ក៏បានអំពាវនាវឱ្យនាយករដ្ឋមន្ត្រីបង្ហាញទំនួលខុសត្រូវដោយការលាលែងពីតំណែង ។

រីឯគណបក្ស«ថៃបង្កើតថៃ» ក៏បានអំពាវនាវឱ្យនាយករដ្ឋមន្ត្រីបង្ហាញទំនួលខុសត្រូវដោយការលាលែងពីតំណែង រួមទាំងការអំពាវនាវឱ្យគណបក្សចម្រុះ បង្ខំឱ្យនាយករដ្ឋមន្ត្រីលាលែងពីតំណែងផងដែរ។

ថ្មីៗនេះ លោក ណាតាពង្ស រឿងបញ្ញាវុធ មេដឹកនាំគណបក្ស«ប្រជាជន»ថៃ បានធ្វើសេចក្តីថ្លែងការណ៍ទាមទារទៅកាន់នាយករដ្ឋមន្ត្រី ដោយបង្ហាញពីការទទួលខុសត្រូវនយោបាយ រំលាយសភា និងប្រគល់អំណាចជូនប្រជាពលរដ្ឋវិញ ។

គណៈកម្មការ​យោធា​ព្រឹទ្ធសភា បាន​ចេញ​មុខអះអាងថា ​មិន​អនុញ្ញាត​ឲ្យ​អ្នក​ណា​បំផ្លាញ​កិត្តិយស​ប្រទេស​ ។ ពួកគេ​កំពុង​រៀបចំ​ដាក់​សំណើ​ដក​លោកស្រី ផែងថងថាន ចេញពី​តំណែង​នាយករដ្ឋមន្ត្រី​នៅ​ថ្ងៃនេះ (១៩ មិថុនា) ៕