ដោយ សូរ្យសែង៖
តាមវេបសាយ រាជកិច្ច បានផ្សព្វផ្សាយព្រះបរមរាជអង្ការបន្ថយទោសលោក ថាក់ស៊ីន ពី ៨ ឆ្នាំ នៅសល់ ១ ឆ្នាំ ដោយសារលោកមានគុណប្រយោជន៍ចំពោះប្រទេសជាតិ ។
សាលក្រមសំណុំរឿងមាន៣ សំណុំរឿង ទី១ សំណុំរឿង បទល្មើសក្នុងការបំពេញមុខងាររាជការ ផ្ដន្ទាទោសដាក់ពន្ធនាគារចំនួន ៣ឆ្នាំ។ សំណុំរឿងទី២ បទល្មើសប្រឆាំងនឹងមុខតំណែងរាជការ បទល្មើសប្រឆាំងនឹងព្រះរាជប្បញ្ញត្តិស្តីពីច្បាប់ស្តីពីបទល្មើសរបស់និយោជិតក្នុងអង្គការ ឬស្ថាប័នរដ្ឋាភិបាល ការដាក់ពន្ធនាគារកំណត់រយៈពេល ២ឆ្នាំ ។ ករណីទី១ និងសំណុំរឿងទី២ គឺជាន់គ្នា ហើយរួមបញ្ចូលការផ្តន្ទាទោសដាក់ពន្ធនាគារ៣ឆ្នាំ និងសំណុំរឿងទី៣ ជាបទល្មើសប្រឆាំងនឹងមុខតំណែងផ្លូវការ ជម្លោះរវាងផលប្រយោជន៍ផ្ទាល់ខ្លួន និងសាធារណៈ ត្រូវផ្តន្ទាទោសដាក់ពន្ធនាគារ៥ឆ្នាំ សរុបទាំងអស់ ៨ ឆ្នាំ តែទទួលទោសបាន ១០ថ្ងៃមកហើយ តាំងពីលោកវិលត្រឡប់មកដល់ប្រទេសថៃកាលពីថ្ងៃទី ២២ ខែសីហា ឆ្នាំ ២០២៣ ។
ប្រជាពលរដ្ឋថៃដែលមានភក្តីភាពចំពោះលោក ថាក់ស៊ីន អតីតនាយករដ្ឋមន្ត្រីថៃ មានសេចក្តីត្រេកអរចំពោះព្រះមហាក្សត្រថៃ ដែលបានព្រះរាជទានបន្ថយទោសឲ្យលោក ថាក់ស៊ីន ។
នៅរសៀលថ្ងៃទី ១ ខែកញ្ញា ឆ្នាំ ២០២៣ សម្តេចអគ្គមហាសេនាបតីតេជោ ហ៊ុន សែន បានសរសេរសារនៅលើផេកហ្វេសប៊ុករបស់សម្តេចមានខ្លឹមសារជាអាទិ៍ថា ៖
«ខ្ញុំសូមសម្តែងនូវការអបអរសាទរយ៉ាងក្រៃលែងចំពោះ ឯកឧត្តម ថាក់ស៊ីន ស៊ីណាវ៉ាត្រា ដែលត្រូវបាន ព្រះមហាក្សត្រថៃ សម្រេចព្រះទ័យ បន្ធូរបន្ថយទោសពីជាប់ពន្ធនាគាររយៈពេល៨ឆ្នាំ មកនៅត្រឹមតែ១ឆ្នាំវិញ។
សូមជូនពរឱ្យបងប្រុសជួបប្រទះតែភ័ព្វសំណាងល្អ ជានិច្ចនិរន្តរតរៀងទៅ» ៕