ដោយ សូរ្យសែងៈ
កាលពីថ្ងៃទី២១ ខែធ្នូ ឆ្នាំ២០២៣ សារព័ត៌មាន «Lao News» ដែលជាទីភ្នាក់ងារព័ត៌មានផ្លូវការរបស់រដ្ឋាភិបាលលាវ បានផ្សព្វផ្សាយឃ្លីប ១.៤០ នាទី បដិសេធព័ត៌មានដែលកំពុងផ្សព្វផ្សាយតាមប្រព័ន្ធ អនឡាញក្នុងប្រទេសថៃថា អង្គការយូណេស្កូរៀបនឹងដកហ្លួងព្រះបាងចេញពីបញ្ជីបេតិកភណ្ឌពិភពលោក ។
នេះបើតាមប្រព័ន្ធផ្សព្វផ្សាយក្រៅផ្លូវការពីប្រទេសថៃ បានផ្សាយព័ត៌មានដែលអះអាងពីប្រភព ដែលត្រូវបានដកស្រង់ចេញពីទីភ្នាក់ងារព័ត៌មានឡាវ ឬ K.P.L. ថា អង្គការយូណេស្កូ ត្រៀមដក ឬដោះលែងហ្លួងព្រះបាង ចេញពីបញ្ជីទីក្រុងបេតិកភណ្ឌពិភពលោក ដោយសារអាជ្ញាធរឡាវបានអនុញ្ញាតឲ្យជនបរទេសធ្វើអាជីវកម្មក្នុងទីក្រុងចាស់ ឬទីក្រុងបេតិកភណ្ឌពិភពលោក ។ ព័ត៌មាននេះ ត្រូវបានទីភ្នាក់ងារព័ត៌មានឡាវថាមិនពិត និងបដិសេធ ហើយថាខ្លួនមិនធ្លាប់ដែលចេញព័ត៌មានបែបនេះឡើយ ។
លាវថា ដំណឹងបែបត្រូវបានគេបំភ្លៃ បង្កើតភាពវឹកវរ ធ្វើឱ្យអ្នកប្រើប្រាស់ព័ត៌មាន ទាំងនៅឡាវ និងក្រៅប្រទេស មានការយល់ច្រឡំ ។ មានមតិជាច្រើនបានបញ្ចេញ និងចែករំលែកនៅលើបណ្តាញទំនាក់ទំនងសង្គម រួមមាន Facebook, TikTok, YouTube និងប្រព័ន្ធផ្សព្វផ្សាយផ្សេងៗ បង្កឲ្យមានភាពចលាចល ។
ទោះយ៉ាងណាទាក់ទងនឹងបញ្ហានេះ ទីភ្នាក់ងារព័ត៌មានឡាវ ត្រៀមសាកសួរព័ត៌មានទៅផ្នែកពាក់ព័ន្ធ ជាពិសេស នាយកដ្ឋានបេតិកភណ្ឌពិភពលោក សន្និសីទសារព័ត៌មានរបស់ក្រសួងវប្បធម៌ និងទេសចរណ៍ និងហ្លួងព្រះបាង ដើម្បីបញ្ជាក់ការពិតនៃទីក្រុងបេតិកភណ្ឌពិភពលោកនេះ។ គេរំពឹងថា ចម្លើយនឹងត្រូវបានផ្តល់ឱ្យក្នុងពេលឆាប់ៗនេះ ៕