ដោយ សូរ្យរិទ្ធ៖
សូមងាកត្រលប់ទៅឆ្នាំ 2016 ក្មេងស្រីអាយុ 13 ឆ្នាំមកពី Lucban ប្រទេសហ្វីលីពីន ឈ្មោះ រីតា ហ្គាវីយ៉ូឡា (Rita Gaviola) ជារៀងរាល់ថ្ងៃនាងចេញដើរសុំទាននៅតាមដងផ្លូវ ឪពុករបស់នាងជាអ្នកប្រមូលសំរាម ម្ដាយជាស្ត្រីមេផ្ទះមើលថែ រីតា និងបងប្អូនទាំង៥ នាក់គ្មានអ្នកណាបានរៀនម្នាក់ទេ ដោយសារតែជីវភាព រកលុយទិញម្ហូបសឹងមិនគ្រប់ ចាត់ទុកថាពិបាកពេកណាស់ទៅហើយ ។
កាលណោះ អ្នកថតរូបម្នាក់ឈ្មោះ Tofer Quinto Burgos បានមកពិធីបុណ្យ Pahiyas ក្នុងទីក្រុង Lucban គាត់បានក្រឡេកឃើញសម្រស់ធម្មជាតិរបស់ក្មេងស្រីស្អាតម្នាក់នេះ ក៏បានថតរូបនាង ហើយបង្ហោះតាមអ៊ីនធឺណិត។ ឈុតរូបភាពនោះបានផ្ទុះកក្រើកភ្លាមៗពេញបណ្តាញសង្គម ។
ក្រៅពីអ្នកលេងអ៊ីនធឺណិតធម្មតា រីតា ត្រូវបានចាប់អារម្មណ៍ពីតារាហ្វីលីពីនជាច្រើន ជាពិសេស មហាជនក្នុងពិភពសម្រស់ដូចជា Hillary Danielle Parangao, Miss World Philippines 2015, Bianca Guidotti, Miss International Philippines 2014, និង Angelia Ong, Miss Earth 2015 ត្រូវបានយល់ស្របថា រីតា មានវង់ភ័ក្រ្តស្រស់ស្អាតបែបធម្មជាតិ សឹងតែមិនជឿថា នាងត្រឹមតែជាស្រីសុំទានប៉ុណ្ណោះ ។
ក្រោយមក រីតា កាន់តែមានការចាប់អាមរ្មណ៍ពីមជ្ឈដ្ឋានទូទាំងប្រទេសខ្លាំងឡើង មានកម្មវិធីទូរទស្សន៍ជាច្រើនស្នើសុំសម្ភាសន៍។ ជាលទ្ធផល នាងមានឱកាសដើរម៉ូដឲ្យម៉ាកល្បីៗជាច្រើន រួមទាំងទទួលបានធ្វើជាតារាសម្តែងក្នុងរឿងភាគទូរទស្សន៍ ហើយបានក្លាយជាបេក្ខនារីវ័យក្មេងបំផុតក្នុងកម្មវិធីពិតដ៏ល្បីល្បាញ Big Brother ។
នារីវ័យក្មេងដ៏ស្រស់ស្អាតរូបនេះបានទទួលជំនួយពីអ្នកជុំវិញខ្លួន ពីអ្នកគាំទ្រតាមអ៊ីនធឺណិតដូចជា Instagram itsritagaviola ។ បច្ចុប្បន្នមានអ្នកតាមដានជិត ២០ម៉ឺននាក់ រួមទាំងអ្នកគាំទ្រជាច្រើនដែលបានជួយដល់គ្រួសារនាងផ្នែកហិរញ្ញវត្ថុផងដែរ ហើយក្នុងឆ្នាំ២០១៨ Rita អាចទិញផ្ទះថ្មីឱ្យគ្រួសារបានដោយជោគជ័យ ។
ទោះបីជានិន្នាការរបស់ រីតា មានការថយចុះជាបណ្តើរៗ ទៅតាមយន្តការនៃពិភពប្រព័ន្ធផ្សព្វផ្សាយសង្គម ប៉ុន្តែនាងនៅតែជាតារាដែលប្រជាជនហ្វីលីពីនស្គាល់ មានការទទួលយកការងារធ្វើម៉ូដែលជាបន្តបន្ទាប់។ ប្រាក់ដែលរកបាន នាងបានយកមកវិនិយោគក្នុងការសិក្សា ហើយអ្វីដែលសំខាន់បំផុតនោះគឺការមានគ្រួសារ ជាមួយនឹងកូនស្រីអាយុ ១ ឆ្នាំដ៏គួរឱ្យស្រឡាញ់ ។
ដូច្នេះ អ្វីដែលសំខាន់ក្នុងអត្ថបទនេះ គឺជីវិតមនុស្សប្រែប្រួលមិនទៀង អ្នកខ្លះធ្លាប់រុងរឿង ក៏អាចធ្លាក់ដល់សូន្យបាន ឯខ្លះទៀត រស់នៅតោកយ៉ាកលំបាកវេទនា ក៏អាចក្លាយជាមនុស្សជោគជ័យបាន ដូចយ៉ាង នាង រីតា ជាដដើម ហើយក៏ចង់បញ្ជាក់ថា សម័យបច្ចេកវិទ្យា ធ្វើឲ្យបណ្តាញសង្គមមានឥទ្ធិពលខ្លាំងទៅលើសង្គមមនុស្ស ល្អ អាក្រក់មកពីបណ្តាញសង្គមដែលត្រូវប្រើវាឲ្យបានត្រឹមត្រូវ ៕