ដោយ សូរ្យរិទ្ធ៖

លោកស្រីនាយករដ្ឋមន្ត្រី សៀក ហាស៊ីណា (Sheikh Hasina) នៅបន្តដឹកនាំប្រទេសបង់ក្លាដែស ក្រោយ​ពី​ ​ឈ្នះ​ការ​បោះឆ្នោត​ជាតិ «ដូច​ការ​រំពឹង​ទុក» បន្ទាប់​គណបក្ស​ជាតិនិយម(BNP) ជាគណបក្សប្រឆាំង​ធំ​មិន​ដាក់​បេក្ខជន។

លោកស្រី ហាស៊ីណា មានតួនាទីសំខាន់ក្នុងការធ្វើឲ្យសេដ្ឋកិច្ចលូតលាស់របស់ប្រទេសបង់ក្លាដែស ដោយធ្លាប់ធ្លាក់ក្នុងភាពក្រីក្រ ប៉ុន្តែរដ្ឋាភិបាលរបស់គាត់ត្រូវបានចោទថាល្មើសសិទ្ធិមនុស្ស និងបង្ក្រាបសមាជិកក្រុមប្រឆាំងយ៉ាងធ្ងន់ធ្ងរ ។

ទីភ្នាក់ងារសារព័ត៌មានបរទេសរាយការណ៍ពីទីក្រុងដាកា ប្រទេសបង់ក្លាដែស នៅថ្ងៃទី៨ ខែមករានេះថា លទ្ធផលមិនផ្លូវការនៃការបោះឆ្នោតសកលនៅប្រទេសបង់ក្លាដែស ​ធ្វើ​ឡើង​កាល​ពី​ថ្ងៃ​អាទិត្យ ទី ៧ មករា​កន្លង ដែលជាការបោះឆ្នោតថ្មីសម្រាប់សមាជិកសភាតំណាងរាស្រ្ត 300 រូប ដោយប្រាកដថា គណបក្សរបស់នាយករដ្ឋមន្ត្រី សៀក ហាស៊ីណា ត្រូវបានទទួលយ៉ាងតិច 222 អាសនៈ បើទោះបីជាធ្លាក់ចុះ 35 អាសនៈពីការបោះឆ្នោតឆ្នាំ 2018 ប៉ុន្តែនៅតែរក្សាបានភាគច្រើនដាច់ខាត ។

​សមាមាត្រ​នៃ​ប្រជាពលរដ្ឋ​ដែល​ចេញ​មក​អនុវត្ត​សិទ្ធិ​មាន​ប្រមាណ ៤០% និង​បរិយាកាស​នៃ​ការ​បោះឆ្នោតមានសភាពស្ងប់ស្ងាត់ ដោយមានទាហាន និងប៉ូលីសជាង 800,000 នាក់ត្រូវបានដាក់ពង្រាយដើម្បីផ្តល់សន្តិសុខនៅទូទាំងប្រទេស ។ ប៉ុន្តែ​មាន​សេចក្តី​រាយការណ៍ថា មាន​ការ​តវ៉ា​តូច​តាច​នៅ​ក្នុង​ក្រុង​ជិតាកង និងការទប់ស្កាត់ការចូលទៅកាន់គេហទំព័ររបស់ទីភ្នាក់ងារព័ត៌មានមួយចំនួន នៅថ្ងៃបោះឆ្នោត ។

ពេញមួយឆ្នាំ ស្ថានការណ៍​នយោបាយ​ក្នុង​ប្រទេស​បង់ក្លាដែស ហាក់មាន​បរិយាកាស​តានតឹង និងការបែងចែក រវាងអ្នកគាំទ្ររបស់លោកស្រី ហាស៊ីណា និងលោកស្រី ខាឡេដា ហ្សៀ (Khaleda Zia) អាយុ 78 ឆ្នាំ ដែលជាស្ត្រីដំបូងគេបង្អស់នៃមេដឹកនាំប្រទេសបង់ក្លាដែស ហើយ​ឥឡូវ​គាត់​កំពុង​ស្ថិត​ក្រោម​ការ​ឃុំ​ខ្លួន​ក្នុងផ្ទះ​ពី​បទ​ពុករលួយ ។ លោកស្រី ហ្សៀ គឺជាមេដឹកនាំដ៏សំខាន់នៃគណបក្សជាតិនិយមបង់ក្លាដែស (BNP) ហើយ​ធ្វើ​ពហិការ​​បោះ​ឆ្នោតលើក​នេះ មាន​ន័យ​ថា ការ​បោះ​ឆ្នោត​នេះ​ «ផ្តល់ជ័យជម្នះយ៉ាងងាយស្រួល» ដល់លោកស្រី ហាស៊ីណា អាយុ 76 ឆ្នាំដែលបានកាន់អំណាចតាំងពីឆ្នាំ 2009 ។

ទោះជាយ៉ាងណាក៏ដោយ គណបក្សសម្ព័ន្ធ របស់លោកស្រី ហាស៊ីណា បានបញ្ចៀសការចុះឈ្មោះបេក្ខជននៅតាមមណ្ឌលមួយចំនួន ដែល​អ្នក​វិភាគ​ចាត់​ទុក​ថា​ជា «ចេតនា» និងត្រៀមថ្កោលទោសសភាបង់ក្លាដែស ថាវាជាស្ថាប័ននីតិប្បញ្ញត្តិដែលផ្តាច់មុខដោយគណបក្សនយោបាយតែមួយ ។

លោកស្រី ហាស៊ីណា ជារបស់លោក Sheikh Mujibur Rahman ដែលជាបិតាជាតិ និងជាប្រធានាធិបតីទីមួយនៃប្រទេសបង់ក្លាដែស គាត់​ឡើង​កាន់​អំណាច​ជា​គណបក្ស​រដ្ឋាភិបាល​ចាប់​តាំង​ពី​ឆ្នាំ ២០០៩ ជា​រយៈពេល​យូរ​បំផុត​ក្នុង​ប្រវត្តិសាស្ត្រ​នយោបាយ​ជាតិ ប៉ុន្តែពេលវេលាបានកន្លងផុតទៅ មនុស្ស​ជា​ច្រើន​បាន​ ចោទ​ប្រកាន់​ថាមានការរំលោភសិទ្ធិមនុស្ស អំពើពុករលួយ និងរបបផ្តាច់ការ រហូតដល់មានការទាមទារជាបន្តបន្ទាប់ ហើយឱ្យលោកស្រី ហាស៊ីណា លាលែងពីតំណែង និងរៀបចំការបោះឆ្នោតថ្មី «ដែលមានឯករាជ្យ និងសេរីថ្លៃ»។

ប្រភព AFP