មកស្គាល់បេក្ខភាព ៣រូបដែលកំពុងឈរឈ្មោះជាប្រធានាធិបតីថ្មីរបស់តៃវ៉ាន់ ដែលនឹងកំណត់ទិសដៅទំនាក់ទំនងជាមួយចិនចាប់ពីពេលនេះតទៅ ។ នៅថ្ងៃទី១៣ ខែមករា ឆ្នាំ២០២៤ នឹងមានការបោះឆ្នោតរើសប្រធានាធិបតីថ្មី ជំនួសលោកស្រី ឆៃ អ៊ីងវើន ដែលផុតអាណត្តិ ។ តើមេដឹកនាំថ្មីនឹងកំណត់ទិសដៅទំនាក់ទំនងរវាងតៃវ៉ាន់ និងចិន មួយណាវិជ្ជមាន មួយណាអវិជ្ជមាន?
កន្លងមក ចិនដីគោកបានអះអាងថា តៃវ៉ាន់ចាត់ទុកថាជាផ្នែកមួយនៃប្រទេសចិនរៀងរហូតមក ប៉ុន្តែមានការប៉ុនប៉ងបំបែកទឹកដីដោយសហរដ្ឋអាមេរិក ជាអ្នកគាំទ្រដ៏សំខាន់មួយ ស្របពេលតៃវ៉ាន់ខ្លួនឯង នៅមានគណបក្សដែលគាំទ្រចិន និងប្រឆាំងនឹងភាគីប្រជាធិបតេយ្យ ។
មានបេក្ខជន ៣រូប ដែលប្រជែងស្លាប់រស់ក្នុងអាណត្តិបោះឆ្នោតថ្មី ។
១. វិល្លៀម - ឡៃ ឈិងទឺ អនុប្រធានាធិបតី ពីគណបក្សរដ្ឋាភិបាល
បេក្ខភាពទីមួយនេះ គឺជាតំណាងមកពីគណបក្សប្រជាធិបតេយ្យឈានមុខ (DPP) ដែលកំពុងកាន់អំណាចបច្ចុប្បន្ន គឺលោក ឡៃ ឈិងទឺ ឬ វីល្លៀម ឡៃ (William Lai) ដែលបច្ចុប្បន្នជាអនុប្រធានាធិបតី ។
លោក វីល្លៀម បច្ចុប្បន្នមានអាយុ 64 ឆ្នាំ ត្រូវបានគេស្គាល់ថាជាបុរសដែលនិយាយទន់ភ្លន់ ប៉ុន្តែបានតស៊ូយ៉ាងសកម្មដើម្បីសិទ្ធិគ្រប់គ្រងខ្លួនឯងរបស់តៃវ៉ាន់យ៉ាងដាច់ខាត គាត់ធ្លាប់ប្រព័ន្ធផ្សព្វផ្សាយចិននិយាយថា គាត់ត្រូវកាត់ទោសក្រោមច្បាប់ប្រឆាំងការបំបែកខ្លួន ។
វីលៀម ធ្លាប់បានពណ៌នាអំពីខ្លួនគាត់ថាជា «អ្នកដែលធ្វើការដើម្បីឯករាជ្យភាពរបស់តៃវ៉ាន់» ។ គាត់និយាយថា ឪពុករបស់គាត់បានស្លាប់ដោយគ្រោះថ្នាក់នៅពេលគាត់មានអាយុ 2 ឆ្នាំ ហើយម្តាយរបស់គាត់ចិញ្ចឹមកូនប្រាំមួយនាក់ ដោយខ្លួនឯងបានជំរុញឱ្យមានក្រមសីលធម៌ ការងាររឹងមាំនៅក្នុងជីវិតរបស់គាត់។
លោក វីល្លៀម បានទទួលការបណ្តុះបណ្តាលផ្នែកវេជ្ជសាស្រ្តនៅសាកលវិទ្យាល័យ Harvard ហើយបានធ្វើការជាអ្នកជំនាញខាងសរសៃប្រសាទ មុនពេលចូលបម្រើការងាររដ្ឋាភិបាលនៅតៃវ៉ាន់នៅពាក់កណ្តាលទសវត្សរ៍ឆ្នាំ 1990 ។
ការបោះជំហានចូលទៅក្នុងពិភពនយោបាយជាលើកដំបូង គាត់បានបម្រើការជាអ្នកតំណាងនៃទីក្រុង តៃណាន ភាគខាងត្បូង។ គាត់ត្រូវបានជាប់ឆ្នោតជាអភិបាលក្រុងក្នុងឆ្នាំ 2010 ហើយបានឈរឈ្មោះសម្រាប់អាណត្តិមួយទៀតក្នុងឆ្នាំ 2014 ជាមួយនឹងសម្លេងឆ្នោតឈ្នះលើសលប់ 73% ។
យោងតាមការស្ទង់មតិថ្មីៗនេះដោយមូលនិធិទស្សនៈសាធារណៈតៃវ៉ាន់ (TPOF) ឃើញថា ពិន្ទុនិយម របស់គាត់ឥឡូវនេះ បាននាំមុខគូប្រជែងដ៏សំខាន់ គឺលោក ហ៊ូ យូវអ៊ី (Hou Youyi) ចាញ់ប្រផិតប្រផើយតែមួយសំឡេងប៉ុណ្ណោះ គឺ វីល្លៀម 38% ហ៊ូ 37% ។
នៅក្នុងយុទ្ធនាការប្រធានាធិបតី វីលៀម បាននិយាយម្តងហើយម្តងទៀតថា តៃវ៉ាន់សង្ឃឹមថា នឹងជាមិត្តជាមួយចិន។ «យើងមិនចង់ក្លាយជាសត្រូវទេ យើងអាចធ្វើជាមិត្ត ហើយយើងចង់ឃើញប្រទេសចិនរីករាយនឹងលទ្ធិប្រជាធិបតេយ្យ និងសេរីភាពដូចយើងដែរ»។
ហ៊ូ យូវអ៊ី មកពីគណបក្ស កុកមីងតាំង
គណបក្សកុកមីងតាំង (KMT) ឬគណបក្សជាតិនិយមចិន ជាគណបក្សនយោបាយអភិរក្សនិយមរបស់ចិនដែលមានឫសគល់រឹងមាំនៅតៃវ៉ាន់ មានគោលនយោបាយខិតទៅជិតចិន ក្នុងយុគសម័យបន្ទាប់ពីចាញ់ការបោះឆ្នោតក្នុងឆ្នាំ 2000 ហើយនៅពេលដែល ម៉ា យីងជូ (Ma Yingjiu) មកពីកុកមីងតាំង បានឈ្នះការបោះឆ្នោតឆ្នាំ 2008 ក៏មានកិច្ចសហប្រតិបត្តិការសេដ្ឋកិច្ចជាមួយរដ្ឋាភិបាលចិនដីគោកផងដែរ។
ចំណែកលោក ហ៊ូ យូវអ៊ី ដែលជាតំណាងបក្សកុកមីងតាំង មកប្រកួតប្រជែងប្រធានាធិបតីតៃវ៉ាន់លើកនេះ កាលនៅពីក្មេង គាត់ធ្លាប់ជួយកិច្ចការផ្ទះ រកស៊ីលក់ជ្រូកនៅផ្សារ ក្រោយមកបានបម្រើការជាប៉ូលីស ហើយបានឡើងឋានន្តរស័ក្តិជាមេប៉ូលិស ។
ការងារដ៏ឆ្នើមរបស់ ហ៊ូ ក្នុងនាមជាប៉ូលិស គឺការចាប់ឃាតកដ៏ល្បីៗជាច្រើននាក់ គាត់ក៏ជាអ្នកស៊ើបអង្កេតដ៏សំខាន់មួយនៅក្នុងការប៉ុនប៉ងធ្វើឃាតអតីតប្រធានាធិបតី ឈើន ស៊ូបៀន ឆ្នាំ 2004 ។
អតីតមេប៉ូលិសរូបនេះ បានងាកមកចាប់អារម្មណ៍លើនយោបាយក្នុងឆ្នាំ ២០១០ ហើយបានក្លាយជាអភិបាលក្រុង ញូវ តៃប៉ិ ទីក្រុងដែលមានប្រជាជនច្រើនបំផុតរបស់តៃវ៉ាន់ក្នុងឆ្នាំ 2018 ហើយគាត់បានជាប់ឆ្នោតជាថ្មីក្នុងឆ្នាំ 2022 ។
កំណត់ត្រារបស់លោក ហ៊ូ ក្នុងនាមជាមន្ត្រីប៉ូលីសដែលមានសមត្ថភាព និងជាអភិបាលក្រុងដ៏មានប្រជាប្រិយ ធ្វើឱ្យគាត់ក្លាយជាជម្រើសកំពូលរបស់បក្សកុកមីងតាំង ដើម្បីដណ្តើមយកការដឹកនាំរបស់តៃវ៉ាន់ឡើងវិញពីគណបក្សប្រជាធិបតេយ្យឈានមុខ (Democratic Progressive Party) ក្រោមការដឹកនាំរបស់លោកស្រី ឆៃ អ៊ីងវើន ជាប្រធានាធិបតីអស់រយៈពេល 8 ឆ្នាំ។
ទោះបីជាលោក ហ៊ូ ប្រឆាំងនឹងការអំពាវនាវរបស់តៃវ៉ាន់ឱ្យទាមទារឯករាជ្យក៏ដោយ ប៉ុន្តែលោកភាគច្រើនបានចៀសវាងការប្រកាន់ជំហរលើប្រទេសចិនក្នុងយុទ្ធនាការនេះ។ ការខ្វះភាពច្បាស់លាស់នេះបាននាំឱ្យមានការរិះគន់។
គាត់ក៏បានគេចពីសំណួរអំពីគោលនយោបាយ «ចិនតែមួយ» ដែលទទួលស្គាល់ទីក្រុងប៉េកាំងជារដ្ឋាភិបាលតែមួយគត់របស់ប្រទេសចិន ដោយនិយាយថា «ទំនាក់ទំនងរវាងភាគីទាំងពីរនៃច្រកសមុទ្រតៃវ៉ាន់គឺច្បាស់លាស់ យើងមិនចាំបាច់ច្រឡំទេ... វាមានមូលដ្ឋានទាំងស្រុងនៅក្នុងរដ្ឋធម្មនុញ្ញនៃសាធារណរដ្ឋចិន»។
ឃើ វេនជឺ (Ke Wenze) នៃគណបក្សប្រជាជនតៃវ៉ាន់
វេជ្ជបណ្ឌិត ក្លាយមកជាអ្នកនយោបាយ ដែលប្រកាសខ្លួនឯងថាជា «ជម្រើសទីបី» សម្រាប់អ្នកបោះឆ្នោត ដែលប្រហែលជាមិនចង់បង្កការប្រឆាំងនឹងចិន ឬមានឆន្ទៈធ្វើសម្បទានទៅឲ្យចិន ។
ឃើ អាយុ 64 ឆ្នាំ ជាប្រធានគណបក្សប្រជាជនតៃវ៉ាន់ (TPP) មានប្រជាប្រិយភាពក្នុងចំណោមអ្នកបោះឆ្នោតវ័យក្មេងពីមុន ថែមទាំងបានលើសសំឡេងប្រជាប្រិយភាពរបស់ វីល្លៀម ឡៃ ប៉ុន្តែឥឡូវនេះប្រជាប្រិយភាពរបស់គាត់ ប្រហែល 25% នៅពីក្រោយ វីល្លៀម និង ហ៊ូ ។
គាត់ធ្លាប់ជាគ្រូពេទ្យវះកាត់ដ៏ល្បីល្បាញ ប៉ុន្តែគាត់បានបោះបង់ចោលអាវក្នុងមន្ទីរពិសោធន៍ ដើម្បីចូលរួមនយោបាយកាលពី 10 ឆ្នាំមុន ភាពល្បីល្បាញបានកើនឡើងបន្តិចម្តងៗ បន្ទាប់ពីបានគាំទ្រចលនាផ្កាឈូករ័ត្នក្នុងឆ្នាំ 2014 នៅពេលដែលនិស្សិតតវ៉ាប្រឆាំងនឹងឥទ្ធិពលដែលកំពុងកើនឡើងរបស់ប្រទេសចិន។
ក្រោយមកនៅឆ្នាំនោះ គាត់ត្រូវបានជ្រើសរើសជាអភិបាលក្រុងតៃប៉ិ ទោះបីជានៅខ្ចីក្នុងឆាកនយោបាយ ប៉ុន្តែលោកក៏បានទទួលការគាំទ្រពីសកម្មជននៃចលនាផ្កាឈូករ័ត្ន និងគណបក្សប្រជាធិបតេយ្យឈានមុខ ។
នយោបាយរបស់លោក ឃើ បានផ្លាស់ប្តូរក្នុងអំឡុងពេលប្រាំបីឆ្នាំជាអភិបាលក្រុង ខណៈដែលលោកបានពង្រីកទំនាក់ទំនងទីក្រុងតៃប៉ិជាមួយប្រទេសចិនដីគោក ជាពិសេសជាមួយនឹងនយោបាយសៀងហៃ ។
នៅឆ្នាំ 2019 គាត់បានបង្កើតគណបក្សប្រជាជនតៃវ៉ាន់ បានដាក់ស្លាកសញ្ញាខ្លួនឯងថាជាជម្រើសជំនួស DPP និង KMT ដែលនៅក្នុងការបោះឆ្នោតចុងក្រោយបំផុតក្នុងឆ្នាំ 2020 បានឈ្នះ 5 អាសនៈក្នុងចំណោម 113 នៅក្នុងសភា ដែលធ្វើឱ្យ TPP ក្លាយជាគណបក្សធំទីបីនៅក្នុងសភារបស់តៃវ៉ាន់។
នៅក្នុងយុទ្ធនាការបោះឆ្នោតឆ្នាំ 2024 លោក ឃើ បានចោទប្រកាន់ DPP ថាបានគំរាមកំហែងតៃវ៉ាន់ដោយការក្លាយជា «អ្នកគាំទ្រសង្រ្គាម» ខណៈពេលដែលកំពុងរិះគន់ KMT ថា «គោរពចិនពេក» ។
ទាំងនេះគឺជាបេក្ខភាព ៣រូបដែលកំពុងឈរឈ្មោះជាប្រធានាធិបតីតៃវ៉ាន់ក្នុងការបោះឆ្នោតនាពេលខាងមុខឆាប់ៗនេះ ដែលត្រូវបានគេរំពឹងថា ទាញតៃវ៉ាន់ក្នុងទិសដៅខុសគ្នាទាំងស្រុង ៕
ប្រភព BBC
ដោយ សូរ្យសែង