ដោយ សាវុឌ្ឍ៖
មានភាពវឹកវរនៅទូទាំងអេក្វាឌ័រ ដែលមានក្រុមប្រដាប់អាវុធបានវាយប្រហារស្ថានីយ៍ទូរទស្សន៍មួយ ហើយចាប់ចំណាប់ខ្មាំងនៅកណ្តាលនៃការផ្សាយបន្តផ្ទាល់ ។
ស្ថានការណ៍នៅក្នុងប្រទេសអេក្វាឌ័រកំពុងធ្លាក់ក្នុងភាពវឹកវរ ពីព្រោះបន្ទាប់ពីគេរាយការណ៍ថា លោក Adolfo Macias ឬ «Fito» មេដឹកនាំក្រុមឧក្រិដ្ឋជន Los Choneros បានបាត់ខ្លួនពីពន្ធនាគារ បន្ទាប់មកក៏មានការវាយប្រហារថ្មីៗនៅទូទាំងប្រទេសនេះ ។
ការវាយប្រហារដ៏ធំមួយនេះ គឺនៅរសៀលថ្ងៃទី៩ ខែមករា ក្រុមប្រដាប់អាវុធបានសម្រុកចូលស្ទូឌីយ៉ូរបស់ទូរទស្សន៍ TC Television ដែលជាប៉ុស្តិ៍ទូរទស្សន៍ដ៏សំខាន់របស់ប្រទេស នៅក្នុងទីក្រុង guayaquil ទីក្រុងធំបំផុតរបស់អេក្វាឌ័រ ។
ក្រុមបុរសមានគ្នាប្រហែល ២០នាក់ បានសម្រុកចូលក្នុងស្ទូឌីយ៉ូអំឡុងពេលការផ្សាយផ្ទាល់នៃកម្មវិធីព័ត៌មាន El Noticiero អ្នកដែលមើលកម្មវិធីអាចមើលឃើញជនទាំងនោះតាមរយៈកាមេរ៉ា ហើយឃើញបុគ្គលិកខ្លះដេកនៅនឹងដី និងមានសម្រែកបុរសម្នាក់ថា «កុំបាញ់!» មុនពេលសញ្ញាត្រូវបានកាត់ផ្តាច់ ។
ក្រោយមក នៅម៉ោងប្រហែល 2 រសៀល កងកម្លាំងពិសេសរបស់ប៉ូលីស បានសម្រុកចូលចាប់ខ្មាន់កាំភ្លើងពាក់ម៉ាស់បានទាំងអស់ ដោយរឹបអូសបានកាំភ្លើងខ្លី កាំភ្លើងយន្ត គ្រាប់បែកដៃ និងដំបង ។
ឧបទ្ទវហេតុនេះបានធ្វើឱ្យប្រធានាធិបតីអេក្វាឌ័រ ដានីញ៉ែល ណូបូ (Daniel Noboa) ប្រកាសដាក់ប្រទេសក្នុងគ្រាអាសន្ន ថាជា «ជម្លោះប្រដាប់អាវុធផ្ទៃក្នុង» ។
លោកស្រី អាលីណា ម៉ានរីកេ (Alina Manrique) ប្រធានផ្នែកព័ត៌មាននៃទូរទស្សន៍ TC បាននិយាយថា «លោកស្រីស្ថិតនៅក្នុងបន្ទប់ត្រួតពិនិត្យ ពេលបុរសពាក់ម៉ាស់មួយក្រុមបានចូលទៅក្នុងអគារ បុរសម្នាក់យកកាំភ្លើងភ្ជុងក្បាលខ្ញុំ ហើយប្រាប់ឱ្យដេកលើដី» ។
សេសារ ហ្សាប៉ាតា (Cesar Zapata) មេប៉ូលីសអេក្វាឌ័រ បាននិយាយថា ពិរុទ្ធជនទាំងអស់ត្រូវបានចាប់ខ្លួន ដោយលោកបន្ថែមថា «នេះជាទង្វើដែលគួរចាត់ទុកថាជាអំពើភេរវកម្ម» ។
បន្ថែមពីលើការវាយឆ្មក់ក្នុងអំឡុងពេលផ្សាយផ្ទាល់តាមទូរទស្សន៍ ក៏មានឧក្រិដ្ឋកម្មដែលបានរៀបចំជាមុននៅទូទាំងប្រទេសអេក្វាឌ័រ ។ ជនប្រដាប់អាវុធបានវាយលុកចូលសាកលវិទ្យាល័យមួយនៅ Guayaquil ឯក្រុមមួយផ្សេងទៀតបានលួចប្លន់នៅកណ្តាលក្រុងគីតូ។ មានវីដេអូមួយនៅលើប្រព័ន្ធផ្សព្វផ្សាយសង្គមបានលេចចេញជារូបរាងបង្ហាញពីអ្នកទោសមួយក្រុមនៅពន្ធនាគារដែលធ្វើកុបកម្ម និងវាយប្រហារអ្នកយាមម្នាក់ ។
ក្រៅពីប្រកាសស្ថានការណ៍ជម្លោះប្រដាប់អាវុធក្នុងប្រទេស ប្រធានាធិបតី ណូបូ ក៏បានចេញក្រឹត្យកំណត់ក្រុមជួញដូរគ្រឿងញៀនចំនួន ២០ ជាក្រុមភេរវជន និងផ្តល់អំណាចដល់យោធាអេក្វាឌ័រក្នុងការបង្រ្កាបឧក្រិដ្ឋកម្មដែលបានរៀបចំនៅក្នុងវិសាលភាពនៃច្បាប់មនុស្សធម៌អន្តរជាតិ ។
លោក ណូបូ ដែលត្រូវបានបោះឆ្នោតកាលពីខែតុលាឆ្នាំ 2023 បានសន្យាពីមុនថា នឹងបង្ក្រាបឧក្រិដ្ឋកម្មហិង្សាក្នុងប្រទេស ដោយលោកថានឹងមិនចរចាជាមួយពួក «ភេរវករ» ទេ។
ប្រធានាធិបតីអេក្វាឌ័រក៏គ្រោងនឹងធ្វើប្រជាមតិ លើវិធានការប្រឆាំងឧក្រិដ្ឋកម្មខ្លាំងជាងមុន ដូចជាការរឹបអូសទ្រព្យសម្បត្តិពីឧក្រិដ្ឋជនដែលត្រូវបានគេសង្ស័យ និងបង្កើនទោសជាប់ពន្ធនាគារ ៕
ព្រភព pptvhd36