By Dararith:
តាមរយៈការអញ្ជើញរបស់ប្រធានាធិបតីបារាំងបានឆ្លុះបញ្ចាំងឱ្យឃើញថា បារាំងបានផ្តល់តម្លៃ និងវាយតម្លៃខ្ពស់ចំពោះទំនាក់ទំនងការទូតទំនាក់ទំនងនយោបាយនិងសេដ្ឋកិច្ច រវាងកម្ពុជានិងបារាំង ដែលនេះគឺជាមោទកភាពរបស់កម្ពុជា ហើយកម្ពុជាក៏ផ្តល់ការឆ្លើយតបដោយស្មើភាពគ្នាផងដែរ ។
សម្តេចធិបតីបានបន្តថាទំនាក់ទំនងកម្ពុជា-បារាំង មានជាយូរមកហើយ ហើយក៏ជាទំនាក់ទំនងជាប្រវត្តិសាស្រ្តដែលយើងត្រូវបន្តពូនជ្រុំផងដែរ ។
នៅក្នុងឱកាសនៅបារាំង មានរឿងមួយដែលសម្តេចធិបតីលើកមកនិយាយថា «ប្រសិនបើប្រធានាធិបតីប្រទេសមហាអំណាចមួយអាចឱ្យសម្តេចបោកបាននោះ គឺពិតជារឿងអស់សំណើចណាស់» នេះជាប្រសាសន៍របស់សម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា ក្នុងពិធីជួបសំណេះសំណាលជាមួយបងប្អូនខ្មែរនៅអឺរ៉ុបប្រមាណ ២,៥ ០០នាក់ ដែលធ្វើឡើងនៅទីក្រុងប៉ារីសប្រទេសបារាំង នៅយប់ថ្ងៃទី១៤ ខែមករា ឆ្នាំ២០២៤ ។
សម្តេចបានបង្ហាញការហួសចិត្តយ៉ាងខ្លាំងចំពោះបុគ្គលមួយរូប ដែលបានផ្ញើលិខិតដាស់តឿនប្រធានាធិបតីបារាំងថា «ប្រយ័ត្នចាញ់បោកសម្តេច»។ សម្តេចធិបតីបានបញ្ជាក់ថា មុននឹងប្រធានាធិបតីបារាំងអញ្ជើញសម្តេចមកបំពេញទស្សនកិច្ចនេះ គឺមានការគិតគូរពិចារណាខ្លាំងណាស់ ពិសេសគឺមានការវាយតម្លៃពីទីប្រឹក្សា និងឥស្សរជនជាន់ខ្ពស់បារាំង។
សម្តេចបានថា«ប្រសិនបើប្រធានាធិបតីប្រទេសមហាអំណាចមួយអាចឱ្យសម្តេចបោកបាននោះ គឺពិតជារឿងអស់សំណើចណាស់»។
សម្តេចធិបតីបានគូសបញ្ជាក់ថា ពុំមានរឿងអ្វីត្រូវបោកនោះទេ កិច្ចការទាំងអស់ដែលត្រូវធ្វើសម្រាប់ប្រធានាធិបតីនិងរូបសម្តេចដែលជាប្រមុខរាជរដ្ឋាភិបាលនោះ គឺជា«កាតព្វកិច្ចដើម្បីជាតិនិងប្រជាជន» ពោលគឺពុំមែនដើម្បីផលប្រយោជន៍បុគ្គលនោះទេ ៕