CNN Philippines បានរងការខាតបង់យ៉ាងខ្លាំងអស់ជាច្រើនឆ្នាំមកហើយ ឥឡូវបានបញ្ចប់ការផ្សាយ និងបិទសេវាកម្មនៅលើវេទិកាទាំងអស់ពីថ្ងៃទី 31 ខែមករា ហើយបុគ្គលិក 300 ត្រូវបាត់បង់ការងារភ្លាមៗ។
នៅថ្ងៃទី 30 ខែមករា ឆ្នាំ 2024 ទូរទស្សន៍ CNN ដែលជាស្ថានីយទូរទស្សន៍លំដាប់ពិភពលោក បានប្រកាសនៅថ្ងៃទី 29 ខែមករា ឆ្នាំ2024 ថា នឹងឈប់ចាក់ផ្សាយ និងផ្តល់សេវាលើគ្រប់វេទិកាទាំងអស់ក្នុងប្រទេសហ្វីលីពីន ពីថ្ងៃទី31 ខែមករា បន្ទាប់ពីជួបប្រទះការខាតបង់យ៉ាងធ្ងន់ធ្ងរ ជាលទ្ធផលបុគ្គលិកប្រមាណ ៣០០នាក់បានបាត់បង់ការងារភ្លាមៗ ។
CNN Philippines គឺជាប៉ុស្តិ៍ទូរទស្សន៍ឥតគិតថ្លៃតែមួយគត់នៅក្នុងប្រទេសហ្វីលីពីន ដែលផ្សាយជាភាសាអង់គ្លេសសុទ្ធ បានចាប់ផ្តើមដំណើរការចាក់ផ្សាយនៅខែមីនា ឆ្នាំ2015 បន្ទាប់ពី Nine Media Network ដែលជាក្រុមហ៊ុនហ្វីលីពីន គ្រប់គ្រងដោយ ALC Group បានឈានដល់កិច្ចព្រមព្រៀងជាមួយក្រុមហ៊ុន Turner ដែលជាម្ចាស់បណ្តាញព័ត៌មានទូរទស្សន៍ CNN ដែលអាចចាក់ផ្សាយនៅប្រទេសហ្វីលីពីនរហូតដល់ខែធ្នូ ឆ្នាំ 2024។ កិច្ចព្រមព្រៀងស្រដៀងគ្នានេះ បច្ចុប្បន្នមាននៅ ប្រេស៊ីល ឈីលី ឥណ្ឌូនេស៊ី ឥណ្ឌា និងទួរគី។
សេចក្តីថ្លែងការណ៍របស់ CNN ហ្វីលីពីនបញ្ជាក់ថា «វាជាការសោកស្តាយយ៉ាងខ្លាំងដែលការគ្រប់គ្រងរបស់ Nine Media Corporation (NMC) ប្រកាសពីការបញ្ចប់ប្រតិបត្តិការព័ត៌មាន និងផលិតកម្មនៅលើវេទិកាប្រព័ន្ធផ្សព្វផ្សាយទាំងអស់ ក្រោមឈ្មោះ CNN Philippines (CNNPH) ដែលចាប់ផ្តើមពីថ្ងៃទី 31 មករា 2024។
ការសម្រេចចិត្តនេះ កើតឡើងបន្ទាប់ពីការខាតបង់ហិរញ្ញវត្ថុដ៏ធំ ក្នុងរយៈពេលជាច្រើនឆ្នាំ ទោះបីជាមានការខិតខំប្រឹងប្រែងយ៉ាងម៉ឺងម៉ាត់ក្នុងការសម្របខ្លួន និងការច្នៃប្រឌិតនៅក្នុងបរិយាកាសប្រព័ន្ធផ្សព្វផ្សាយដែលមានការផ្លាស់ប្តូរយ៉ាងឆាប់រហ័ស និងមានការប្រឈមក៏ដោយ ។
យើងទទួលស្គាល់ឥទ្ធិពលនៃការបិទនេះទៅលើបុគ្គលិកដ៏មានតម្លៃរបស់យើង និងបុគ្គលដែលមានទេពកោសល្យ យើងកំពុងធានាថា បុគ្គលិកដែលរងផលប៉ះពាល់ទាំងអស់នឹងទទួលបានសំណង ៕
ប្រភព khaosod
ដោយ សាវុឌ្ឍ៖