ដោយ ជេម ពិទូរ្យ ៖
តុលាការចិនពានកាត់ទោសអតីតប្រធានសមាគមបាល់ទាត់ជាតិ ទទួលទោសដាក់គុកអស់មួយជីវិត ក្រោយពីរកឃើញបទល្មើសជាក់ស្តែងទទួលសំណូក ក្នុងអំឡុងពេលកាន់តំណែងរបស់គាត់ ។
ទីភ្នាក់ងារព័ត៌មានស៊ីនហួ (Xinhua) រាយការណ៍ពីទីក្រុងអ៊ួហាន (Wuhan) ប្រទេសចិន កាលពីថ្ងៃទី 26 ខែមីនាថា តុលាការប្រជាជនកណ្តាលហួងស៊ឺ នៅខេត្តហ៊ូពើយ បានកាត់ទោសលោក ឈើន ស៊ូយាន់ អតីតប្រធានសមាគមបាល់ទាត់ចិន (CFA) ពីបទរកឃើញទទួលសំណូក។
សេចក្តីថ្លែងការណ៍របស់តុលាការបានបញ្ជាក់ថា ឈើន បានផលប្រយោជន៍ពីមុខតំណែងផ្សេងៗកាលពីឆ្នាំ 2010 -2023 ដែលរួមទាំងការងារទាក់ទងនឹងសមាគមបាល់ទាត់ ក្នុងការចុះកិច្ចសន្យាលើគម្រោងប្រតិបត្តិការវិនិយោគ និងការរៀបចំការប្រកួតកីឡា ជាថ្នូរនឹងលោក ឈើន បានទទួលប្រាក់ និងវត្ថុមានតម្លៃជាង ៨១លានយាន់ (ប្រមាណ 11,205,841$) ជាថ្នូរនឹងការសងត្រលប់វិញ ។
ខណៈដែលសាលក្រមរបស់តុលាការបញ្ជាក់ លោក ឈើន បានបំពានយ៉ាងធ្ងន់ធ្ងរទៅលើបទប្បញ្ញត្តិនៃការប្រកួត ដោយយុត្តិធម៌នៅក្នុងវិស័យបាល់ទាត់ និងបានបង្កការខូចខាតយ៉ាងខ្លាំងដល់ឧស្សាហកម្មបាល់ទាត់របស់ប្រទេស ៕