អត្ថបទ សូរ្យសែង៖
មន្រ្តីសន្តិសុខមីយ៉ាន់ម៉ា បានប្រើគ្រាប់កាំភ្លើងពិត លាយផ្សំជាមួយគ្រាប់បាញ់ឧស្ម័នបង្ហូរទឹកភ្នែក ដើម្បីបំបែកក្រុមតវ៉ាប្រឆាំងនឹងយោធាកាលពីថ្ងៃអាទិត្យ ទី ១៤ មីនា បណ្តាលឲ្យបាតុករយ៉ាងហោចណាស់ ២១ នាក់នៅទីក្រុងយ៉ាំងហ្គោនស្លាប់ និង ១៧ នាក់នៅក្នុងទីក្រុងផ្សេងទៀត ក្នុងនេះមានប៉ូលីសម្នាក់ផង ។ រដ្ឋាភិបាលបានប្រកាសអាជ្ញាសឹកក្នុងតំបន់បាតុកម្មហិង្សានាទីក្រុងយ៉ាំងហ្គោន ។
ព័ត៌មានពីកាសែត REUTERS រាយការណ៍ពីទីក្រុងយ៉ាំងហ្គោន ប្រទេសមីយ៉ាន់ម៉ានៅថ្ងៃទី ១៤ មីនាថា ការប៉ះទង្គិចរវាងកងកម្លាំងសន្តិសុខ មានទាំងទាហាន និងប៉ូលិស ជាមួយប្រជាជនជាច្រើនទីក្រុង បណ្តាលឲ្យស្លាប់ប្រជាជន ២១ នាក់ របួសជាច្រើនសិបនាក់នៅតំបន់ហាឡាងតាយ៉ា ជាយក្រុងទីក្រុងយ៉ាំងហ្គោន ដែលជាតំបន់ឧស្សាហកម្មសម្បូរទៅដោយកម្មករ ភាគច្រើនជាកម្មករដែលមកពីខេត្តផ្សេងៗ ។
ល្ងាចថ្ងៃអាទិត្យទី ១៤មីនា រដ្ឋាភិបាលយោធាមីយ៉ាន់ម៉ា ឬហៅជាផ្លូវការថា «ក្រុមប្រឹក្សារដ្ឋគ្រប់គ្រងច្បាប់អាជ្ញាសឹក» ដែលត្រូវបានប្រកាសឱ្យប្រើនៅតំបន់ហាឡាងតាយ៉ា រហូតដល់ស្ថានការណ៍ត្រូវបានដោះស្រាយ តាមរយៈការផ្តល់អំណាចដល់មេបញ្ជាការ អាចបញ្ជាប្រតិបត្តិការតាមតម្រូវការបាន ។
ស្ថានឯកអគ្គរដ្ឋទូតចិនប្រចាំនៅមីយ៉ាន់ម៉ា បានចេញសេចក្តីថ្លែងការណ៍អំពាវនាវឲ្យអាជ្ញាធរមីយ៉ាន់ម៉ា គ្រប់គ្រងនិងការពារពលរដ្ឋចិន ក្រោយរោងចក្រកាត់ដេរសម្លៀកបំពាក់ ២ កន្លែងរបស់ធុរកិច្ចជនជាតិចិនត្រូវបានដុតបំផ្លាញ ។
អំពើហឹង្សាចុងក្រោយបង្អស់បានបណ្តាលឱ្យមានការស្លាប់ក្នុងព្រឹត្តិការណ៍តវ៉ា កើនជាង ១២០ នាក់ និងរងរបួសរាប់រយនាក់ ហើយមនុស្សជាង ២.១០០ នាក់ត្រូវបានចាប់ខ្លួន ៕
រូបភាព REUTERS
ឃ្លីបវីដេអូ Arirang News
ប្រភពពីវេបសាយ dailynews