លោកជំទាវ ឱ វណ្ណឌីន រដ្ឋលេខាធិការក្រសួងសុខាភិបាល និងជាអ្នកនាំពាក្យ បានបញ្ជាក់ហើយបញ្ជាក់ទៀតថា «វ៉ាក់សាំង គឺជាឧបករណ៍ដែលបន្ថែមទៅលើវិធានការ «៣ ការពារ ៣កុំ» និង តម្រូវការធ្វើចត្តាឡីស័ក, វ៉ាក់សាំងតែមួយមុខ មិនមែនជាមធ្យោបាយក្នុងការទប់ស្កាត់ការរីករាលដាលនៃជំងឺកូវីដ-១៩ ដូច្នេះអ្នកដែលចាក់វ៉ាក់សាំងហើយ មិនមែនជិះសេះលែងដៃទេ ពីព្រោះលទ្ធភាពនៃការចម្លងនៅតែមាន គ្រាន់តែសីរាង្គរបស់យើងមានកងការពារ ដែលមិនធ្វើឲ្យសុខភាពរបស់យើងទ្រុឌទ្រោម រហូតដល់បាត់បង់ជីវិត ហើយគេសិក្សាឃើញសម្រាប់អ្នកដែលចាក់វ៉ាក់សាំងរួច គឺកាត់បន្ថយបានជាអតិប្បរមានូវអត្រាចូលសម្រាកពេទ្យ ដែលវាជួយដល់ការកាត់បន្ថយនូវបន្ទុកធ្ងន់ធ្ងរនៅក្នុងមន្ទីរពេទ្យ...» ។
លោកជំទាវមានប្រសាសន៍ឆ្លើយនឹងសំណួររបស់អ្នកសារព័ត៌មាន ក្នុងសន្និសីទសារព័ត៌មានស្តីពី ច្បាប់ស្តីពីវិធានការទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត នាព្រឹកថ្ងៃទី ១៥ ខែមីនា ឆ្នាំ ២០២១ ។
លោកជំទាវបានបកស្រាយដែរថា យោងតាមការសិក្សារបស់អង្គការសុខភាពពិភពលោកថា អ្នកជំងឺកូវីដ-១៩ ដែលជាសះស្បើយវិញ រយៈពេលពី ៦ខែឡើងទៅ នឹងអាចចាក់វ៉ាក់សាំងបង្ការជំងឺកូវីដ-១៩នេះបាន» ។ ដោយឡែកអ្នកស្ថិតនៅក្នុងស្ថានភាពសង្ស័យ ឬផ្ទុកជំងឺកូវីដ-១៩ មិនអាចចាក់វ៉ាក់សាំងបង្ការបានឡើយ ដោយរង់ចាំទាល់តែព្យាបាលជាសះស្បើយពីជំងឺនេះ ៕
ដោយ សូរ្យសែង