ប្រភពវេបសាយ sanook
ដោយ សូរ្យសែង៖
អង្គការសុខភាពពិភពលោក (WHO) និងប្រទេសចិន នៅថ្ងៃទី ៣១ មីនា បានចេញរបាយការណ៍រួមគ្នាមួយ អំពីប្រភពដើមនៃវីរុសកូវីដ-១៩ ដោយបានសន្និដ្ឋានថា វីរុសនេះមិនចេញពីមន្ទីរពិសោធន៍នៅវូហានដូចដែលគេសង្ស័យឡើយ ។
របាយការណ៍និយាយថា វីរុសកូវីដ-១៩ វាទំនងជាឆ្លងពីសត្វប្រចៀវទៅមនុស្សតាមរយៈសត្វមួយប្រភេទទៀតដែលផ្ទុកជំងឺនេះ នាំចម្លងតែម្តង ។
ក្រុមអ្នកជំនាញពហុជាតិបានរកឃើញវីរុសស្រដៀងនឹងវីរុសកូរ៉ូណាថ្មី នៅក្នុងសត្វប្រចៀវ និងសត្វពង្រូល ប៉ុន្តែគេមិនទាន់ដឹងច្បាស់ថា តើសត្វប្រភេទណាជាអ្នកនាំមេរោគឆ្លងទៅមនុស្សនោះទេ ។ ក្រុមអ្នកជំនាញជាច្រើនប្រទេសបានសន្និដ្ឋានថា អាចជាសំពោច (mink) និងសត្វឆ្មា ព្រោះគេដឹងថាសត្វនេះវាងាយនឹងឆ្លងរោគបានស្រួល ។ ចំណែកមន្ត្រីចិនក៏បានអះអាងផងដែរថា វីរុស COVID-19 អាចឆ្លងចូលទៅប្រទេសចិនតាមរយៈការនាំចូលអាហារកក ។
ស្របពេលនេះ សហរដ្ឋអាមេរិក និង ១៣ ប្រទេសប្រទេសទៀត សម្តែងកង្វល់ចំពោះការដែលអង្គការពិភពលោក (WHO) មានភាពយឺតយ៉ាវក្នុងការផ្សព្វផ្សាយរបាយការណ៍ពាក់ព័ន្ធនឹងប្រភពមេរោគកូវីដ-១៩ រួមទាំងមានការបិទបាំងព័ត៌មានពេញលេញ ។
«យើងសុំសម្តែងកង្វល់ចំពោះការយឺតយ៉ាវក្នុងការបង្ហាញរបាយការណ៍ និងហាក់មានការបិទបាំងព័ត៌មាន» ។
ប្រទេសដែលសម្តែងភាពកង្វល់ខាងលើ រួមមាន សហរដ្ឋអាមេរិក កាណាដា អង់គ្លេស ស្លូវីនៀ ន័រវេស លីទុយអានី ឡាត់វី អេស្តូនី ដាណាម៉ាក សាធារណរដ្ឋឆែក អូស្ត្រាលី អ៊ីស្រអែល ជប៉ុន និងកូរ៉េខាងត្បូង ៕