ដោយ សូរ្យរិទ្ធ៖
ថ្ងៃនេះ (៦ មេសា) រាជរដ្ឋាភិបាល សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានចេញសេចក្តីសម្រេចមួយ ស្តីពីការហាមឃាត់ការធ្វើដំណើរ និងការបិទរមណីយដ្ឋានទេសចរណ៍នៅទូទាំងប្រទេសជាបណ្តោះអាសន្ន ដើម្បីទប់ស្កាត់ការឆ្លងរាលដាលនៃជំងឺកូវីដ-១៩ ។
រយៈពេលបិទបណ្តោះអាសន្នមាន ១៤ ថ្ងៃ ពីថ្ងៃទី ៧ ដល់ថ្ងៃទី ២០ ខែមេសា ចាប់ពីម៉ោង ០ ថ្ងៃទី ៧ ខែមេសានេះតទៅ គឺមិនឲ្យឆ្លងកាត់ពីខេត្តមួយទៅខេត្តមួយ ពីភូមិសាស្ត្រខេត្តមួយទៅភូមិសាស្ត្រខេត្តមួយ លើកលែងតែខេត្តកណ្តាល និងរាជធានីភ្នំពេញ ដែលចាត់ទុកជាតំបន់តែមួយ ។
ប៉ុន្តែសេចក្តីសម្រេចលើកលែងឲ្យឆ្លងកាត់ចំពោះការដឹកជញ្ជូនផ្លូវទឹក គោក និងផ្លូវដែក រថយន្តអគ្គីភ័យ រថយន្តដឹកកម្មករដែលចេញដោយក្រសួងការងារ រថយន្តពេទ្យសង្គ្រោះបន្ទាន់ ទាំងរដ្ឋ និងឯកជន ការធ្វើដំណើរទៅកាន់មណ្ឌលសុខភាព រថយន្តដឹកសំរាម រថយន្តកងទ័ពបំពេញភារកិច្ច រួមទាំងការដឹកជញ្ជូនពលករចូលមកក្នុងប្រទេសទៅកាន់គោលដៅចត្តាឡីស័ក និងការធ្វើដំណើររបស់មន្ត្រីសាធារណៈ ទាំងថ្នាក់ជាតិ ថ្នាក់ក្រោមជាតិ (សូមអានសេចក្តីទាំងស្រុងនៅខាងក្រោម) ។