ទិន្នន័យនៅថ្ងៃទី ២៧ ខែឧសភានេះឲ្យដឹងថា ការប្រយុទ្ធគ្នារវាងកងទ័ពអ៊ីស្រាអែល និងក្រុមហាម៉ាសដែលជាអ្នកគ្រប់គ្រងជ្រោយកាហ្សា ប៉ាឡេស្ទីន រយៈពេល ១១ ថ្ងៃ បានបង្កមហន្តរាយអស់ចំនួនទឹកប្រាក់ ១,២ ពាន់លានសេគេលថ្មី (shekel) ឬស្មើ ៣៧០ លានដុល្លារសហរដ្ឋអាមេរិក ។ ទាំងនេះដោយសារអ្នកធ្វើការនៅតាមក្រុមហ៊ុនឧស្សាហកម្មមិនបានមកធ្វើការ និងថយចុះគួរឱ្យកត់សម្គាល់នូវផលិតភាព ការលក់ និងប្រាក់ចំណូល ។
កម្មករប្រមាណ ៣៥ ភាគរយនៅភាគខាងត្បូងអ៊ីស្រាអែល មិនអាចចូលធ្វើការដូចធម្មតាបាន ក្នុងអំឡុងពេលនៃការប្រយុទ្ធគ្នា ដោយសារខាងតំបន់ហ្គាហ្សាស្ទ្រីបបានបាញ់រ៉ុក្កែតមួយចំនួនធំចូលតំបន់ទាំងនេះ ខណៈដែលកម្មករ ១០ ភាគរយ នៅអ៊ីស្រាអែលកណ្ដាល មិនអាចទៅធ្វើការបាន ។ លើសពីនេះនៅមានក្រុមហ៊ុនភាគឧស្សាហកម្ម សរុបចំនួន ៥០ នៅក្នុងឧស្សាហកម្មនេះបានរងការខូចខាតដោយរ៉ុក្កែត រាប់លានសេគេលថ្មីដែរ ។
បន្ទាប់ពីបានទទួលរងនូវការខាតបង់ផ្នែកហិរញ្ញវត្ថុសំខាន់ៗ គណៈកម្មាធិការហិរញ្ញវត្ថុសភាអ៊ីស្រាអែល គ្រោងនឹងពិភាក្សានៅថ្ងៃអង្គារ ទី២៥ ឧសភាកន្លងមកនេះ លើយន្តការសំណងសម្រាប់ក្រុមហ៊ុន និងនិយោជិកដែលរងផលប៉ះពាល់ ៕
បកប្រែពីវេបសាយ naewna
ដោយ សាវុឌ្ឍ