អត្ថបទ សូរ្យរិទ្ធ៖

នាយករដ្ឋមន្ត្រីម៉ាឡេស៊ី និងគណ:រដ្ឋមន្ត្រីទាំងអស់ សុំមិនយកប្រាក់ខែចំនួន ៣ ខែ ដើម្បីយកចូលមូលនិធិឧបត្ថម្ភការប្រយុទ្ធប្រឆាំងកូវីដ-១៩ ក្នុងប្រទេសម៉ាឡេស៊ី ។

នាយករដ្ឋមន្រ្តីម៉ាឡេស៊ី លោក មុស៊ីយីតឌីន យ៉ាស្ស៊ីន (Mushyiddin Yassin) បានប្រកាសថា នាយករដ្ឋមន្រ្តី និងសមាជិកគណៈរដ្ឋមន្ត្រីទូទាំងអស់របស់ប្រទេសម៉ាឡេស៊ី មិនទទួលយកប្រាក់ខែក្នុងរយៈពេល ៣ ខែ ចាប់ពីខែមិថុនាដល់ខែសីហា ឆ្នាំ ២០២១ នេះ ដោយប្រាក់ខែទាំងនាំទៅប្រយុទ្ធប្រឆាំងការរីករាលដាលកូវីដ-១៩ នៅក្នុងប្រទេស ។

នាយករដ្ឋមន្ត្រី យ៉ាស្ស៊ីន បានមានប្រសាសន៍ថា ការសម្រេចចិត្តបែបនេះ បង្ហាញថាមនុស្សគ្រប់គ្នានៅក្នុងសង្គម រួមទាំងរដ្ឋាភិបាល អាចចូលរួមជួយ និងប្រយុទ្ធប្រឆាំងនឹងការរីករាលដាលនៃកូវីដ-១៩ នេះបាន ដែលប្រព័ន្ធសុខាភិបាលសាធារណៈមានសារសំខាន់ ស្ថិតនៅជួរមុខក្នុងការដោះស្រាយនៃការផ្ទុះឡើង ហើយប្រជាជនម៉ាឡេស៊ីទាំងអស់គឺជាផ្នែកមួយនៃការប្រយុទ្ធប្រឆាំងនឹងការផ្ទុះឡើងនេះដូចគ្នា ។

ប្រាក់ខែ ៣ ខែរបស់នាយករដ្ឋមន្រ្តី និងគណៈរដ្ឋមន្រ្តី ត្រូវបានគេប៉ាន់ប្រមាណថាមានចំនួន ៥ លានរីងហ្គីត ប្រមាណ ១.២១១.៥៦២ ដុល្លារ ឬគិតប្រាក់រៀលខ្មែរ ៤.៩២៤.៨៣៧.៥៧៦ រៀល ហើយនឹងយកទៅក្នុងមូលនិធិជំនួយសង្គ្រោះ​កូវីដ-១៩ ដែលមានតម្លៃសរុប ៤ ម៉ឺនលានរីងហ្គីត ឬ ៩.៦៩១.៨៨៩ ដុល្លារ ប្រាក់ខ្មែរ ៣៩.៣៩៣.៥៤១.២៩៤ រៀល ។

កាលពី ២ សប្តាហ៍មុន វីរុសក្នុងម៉ាឡេស៊ីត្រូវបានគេចាត់ទុកថាជាការរីករាលដាលដ៏ធ្ងន់ធ្ងរមួយ ដោយវេជ្ជបណ្ឌិតអាដាម បាបា រដ្ឋមន្រ្តីក្រសួងសុខាភិបាលនៃប្រទេសម៉ាឡេស៊ីថ្មីៗនេះបានចេញមកដើម្បីបង្ហាញពីរឿងនោះ ក្នុងកំឡុងពេលនៃការផ្ទុះជំងឺកូវីដ ដោយចាប់ពីឆ្នាំមុនរហូតដល់ឥឡូវ ពួកគេបានរកឃើញកុមារនិងទារកឆ្លងជំងឺចំនួន ៨២.៣៤១ នាក់ដែលជាចំនួនខ្ពស់។

ឥឡូវនេះ ប្រទេសម៉ាឡេស៊ីបាន LockDown ប្រទេសរយៈពេល ២ សប្តាហ៍ ចាប់តាំងពីថ្ងៃទី ១ ដល់ថ្ងៃទី ១៤ មិថុនា និងត្រៀមបិទភោជនីយដ្ឋាន ហាងទំនិញ តែអនុញ្ញាតឲ្យបើកគ្រឿងបរិភោគ ១៧ មុខ ។

ការប្រកាសមិនយកប្រាក់ខែដូចខាងលើ នាយករដ្ឋមន្ត្រីកម្ពុជា សម្តេចតេជោ ហ៊ុន សែន និង សមាជិករាជរដ្ឋាភិបាល រហូតដល់មន្ត្រីរាជការសាមញ្ញ បានស្ម័គ្រចិត្តមិនទទួលយកប្រាក់ខែខ្លះ ៦ ខែ ដើម្បីជួយបន្ទុកក្នុងការប្រឆាំងនឹងការរាតត្បាតនៃមេរោគកូរ៉ូណា ឬកូវីដ-១៩ ក្នុងប្រទេសកម្ពុជា ៕