កាលពីម្សិលមិញ (៣ មិថុនា) នៅឯទីក្រុងបាងកក ប្រទេសថៃ មានការប្រជុំជាមួយគ្នា រវាងក្រសួងការពារជាតិថៃ ក្រសួងការបរទេស និងយោធា ស្តីពីរឿងព្រំដែនជាមួយកម្ពុជា ដោយរយៈពេលមួយសប្តាហ៍កន្លងទៅនេះ គេសង្កេតឃើញថា ខាងក្រសួងការបរទេស ឬក្រសួងការពារជាតិថៃ និយាយផ្សេង យោធាធ្វើផ្សឹង ហាក់មិនមាននរណាស្តាប់នរណា ឧទាហរណ៍ ដូចជារឿងបិទព្រំដែន ក្រសួងការបរទេសថៃ ថាមិនឲ្យបិទ តែយោធាថៃបិទ... ជាដើម ។

លោក ភូមិថាំ វេចយ៉ាឆៃ ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិថៃ បានថ្លែងអំពីស្ថានការណ៍ព្រំដែនថៃ និងកម្ពុជា ដោយសង្កត់ធ្ងន់ថា ថៃប្រកាន់ខ្ជាប់នូវវិធីសាស្ត្រសន្តិភាព និងព្យាយាមបញ្ចៀសអំពើហិង្សា រក្សាអធិបតេយ្យភាពជាតិ និងផលប្រយោជន៍របស់ប្រជាជន គឺព្យាយាមរកផ្លូវចរចា ដើម្បីដោះស្រាយបញ្ហាដោយសន្តិវិធី ប៉ុន្តែមិនធ្វេសប្រហែស។ លោកថា ក្រសួងការពារជាតិថៃ ប្រកាន់ខ្ជាប់ការចរចាដោយសន្តិវិធី ដោយមិនប្រើអារម្មណ៍ ប៉ុន្តែការប្រកាសសង្គ្រាម ជាមធ្យោបាយចុងក្រោយ ។

ទាក់ទិននឹងការចរចានេះ មានការសង្កត់ធ្ងន់ថា ភាគីថៃបានជជែកគ្នាពេញក្រសួងការពារជាតិ ជាមួយក្រសួងការបរទេស រួមទាំងយោធាផងដែរ ដើម្បីធានាថាការចរចាមានការឯកភាព។ កាលពីថ្ងៃទី ២ មិថុនា ក៏មានការពិភាក្សាផងដែរ ហើយអ្វីដែលសំខាន់នោះគឺថា ការប្រើអំពើហឹង្សា ឬសង្រ្គាមគឺជាវិធានការចុងក្រោយបន្ទាប់ពីការដោះស្រាយ វិបត្តិផ្សេងៗមិនអាចអនុវត្តបាន។ ទោះបីជាយ៉ាងណាក៏ដោយ ក្នុងពេលជាមួយគ្នានេះ នឹងនៅតែមានការព្យាយាមចរចា ដោយប្រកាន់ខ្ជាប់នូវ MOU ឆ្នាំ2000 និងយន្តការនៃគណៈកម្មាធិការព្រំដែនរួម (Join Boundary Committee :JBC) ដើម្បីដោះស្រាយបញ្ហានានា។

បច្ចុប្បន្ន ព្រំដែន​មិន​ត្រូវ​បាន​បិទ​ទេ ព្រោះ​វា​ត្រូវ​បាន​គេ​ចាត់​ទុក​ថា​ជា​ការ​កើនឡើង និង​វិធានការ​រសើប។ គ្មានកងទ័ព​ណាត្រូវបានដាក់ពង្រាយនៅតាមព្រំដែនទេ ប៉ុន្តែភាគីថៃបានត្រៀមលក្ខណៈរួចរាល់ហើយ ព្រោះបច្ចុប្បន្នកំពុងមានវិបត្តិ ដោយមានមតិចម្រុះ អារម្មណ៍ និងហេតុផល។ លោក ភូមិថាំ ថា អារម្មណ៍មិនអាចប្រើតែម្នាក់ឯងបានទេ ប៉ុន្តែហេតុ​ផល និងភាពចាំបាច់ត្រូវតែយកមកពិចារណា។ ប្រសិនបើសង្គ្រាមត្រូវបានប្រើប្រាស់ បើទោះបីជាយោធាថៃត្រៀមខ្លួនរួចជាស្រេចដើម្បីការពារអធិបតេយ្យភាពក៏ដោយ ការខាតបង់ដែលនឹងកើតឡើងត្រូវតែយកមកពិចារណា និងត្រូវតែ​ចៀសវាងឱ្យបានច្រើនតាមដែលអាចធ្វើទៅបាន៕