ប្រទេសនីការ៉ាហ្គ័រ ជាប្រទេសមួយស្ថិតនៅអាមេរិកឡាទីន ឬ អាមេរិកខាងត្បូង បានសម្រេចចិត្តបោះបង់ចោលតៃវ៉ាន់ ទៅស្រវារយកចិន ដែលមកទល់ពេលនេះ នៅសល់តែ ១៤ ប្រទេសប៉ុនណោះដែលនៅចងសម្ព័ន្ធជាមួយកោះតៃវ៉ាន់ ។
ក្រសួងការបរទេសតៃវ៉ាន់ថ្លែងកាលពីថ្ងៃសុក្រ ទី ១០ ខែធ្នូ ឆ្នាំ ២០២១ ថា តៃវ៉ាន់មានការខកចិត្តជាខ្លាំងចំពោះការសម្រេចចិត្តរបស់ប្រធានាធិបតីនីការ៉ាហ្គ័រ ដានិអែល អ័រតេហ្គា ដែលបោះបង់មិត្តចាស់ ទៅស្រវារមិត្តថ្មី គឺចិន ។
តៃវ៉ាន់មានឈ្មោះជាផ្លូវការថា «សាធារណរដ្ឋចិន» និងតំណាងរបស់ចិននៅអង្គការសហប្រជាជាតិ តាំងពីក្រោយសង្គ្រាមលោកលើកទី ២ ប៉ុន្តែបែរជាត្រូវចិន ដែលមានឈ្មោះជាផ្លូវការថា «សាធារណរដ្ឋប្រជាមានិតចិន» ទាញចេញពីកៅអីនៅឆ្នាំ ១៩៧០ ។
តមក នៅក្នុងទសវត្សរ៍ឆ្នាំ ២០០០ ចិនក៏កាន់តែខិតចូលជិតសម្ព័ន្ធមិត្តរបស់តៃវ៉ាន់ជារឿយៗ ដោយឡែកប្រទេសតូចៗនៅក្នុងប្រជុំកោះការីបៀន អាមេរិកខាងត្បូង ប្រជុំកោះក្នុងមហាសមុទ្រប៉ាស៊ីហ្វិក និងសូម្បីតែរដ្ឋបុរីវ៉ាទីកង់ក៏ដោយ ។ នៅឆ្នាំ ២០១៩ គីរីបាស និងកោះសូឡូម៉ុនក៏បានកាត់ផ្តាច់ទំនាក់ទំនងជាមួយតៃវ៉ាន់ផងដែរ ។
ក្រៅពីនេះ ចិនក៏បានប្រើវិធីផ្សេងទៀតដែរ ក្នុងការព្យាយាមផ្តាច់តៃវ៉ាន់ចេញពីពិភពខាងក្រៅ ។ តាំងពីមានសម្ពាធមកលើអង្គការលំដាប់ពិភពលោក ដូចជាអង្គការសហប្រជាជន ឲ្យរំដោះតៃវ៉ាន់ចេញពីភាពជារដ្ឋអ្នកសង្កេតការណ៍ រហូតដល់ការបញ្ជូនយន្តហោះចម្បាំងចូលទៅក្នុងដែនអាកាសរបស់តៃវ៉ាន់គ្រប់ពេលវេលា ៕
ប្រភព Aljazeera
អត្ថបទ សូរ្យសែង