អត្ថបទ សូរ្យរិទ្ធ៖
ចំពេលមានការអំពាវនាវពីសំណាក់អ្នកការទូតបរទេសជាច្រើនក្នុងប្រទេសថៃជា ដែលចង់ឱ្យរដ្ឋាភិបាលថៃបង្ហាញជំហរនយោបាយក្នុងករណីរុស្ស៊ីឈ្លានពានអ៊ុយក្រែននោះ កាលពីថ្ងៃទី១ ខែមីនា កន្លងទៅថ្មីៗនេះ នាយឧត្តមសេនីយ៍ ប្រាយុទ្ធ ចាន់អូឆា នាយករដ្ឋមន្ត្រី និងជារដ្ឋមន្ត្រីក្រសួងការពារជាតិថៃ ថ្លែងបន្ទាប់ពីចប់កិច្ចប្រជុំគណៈរដ្ឋមន្ត្រីថា ប្រទេសថៃត្រូវតែបន្តការប្រុងប្រយ័ត្នចំពោះការប្រើប្រាស់យន្តការកិច្ចការបរទេស និងយន្តការអាស៊ាន ដែលត្រូវតែរក្សាតុល្យភាព រួមជាមួយនឹងការគាំទ្រដំណើរការសន្តិភាព ។
រដ្ឋមន្ត្រីការបរទេសសិង្ហបុរី Vivian Balakrishnan
មុននេះ ប្រទេសសិង្ហបុរី ជាប្រទេសមួយដំបូងគេក្នុងប្លុកអាស៊ាន ដែលបានចេញមុខដាក់ទណ្ឌកម្មទៅលើប្រទេសរុស្ស៊ី ដោយមានចំណាត់ការទៅលើការបង្កើនការប្រុងប្រយ័ត្នត្រួតពិនិត្យការនាំចេញរបស់ខ្លួន លើទំនិញណា ដូចជាអាវុធដែលមានលទ្ធភាពអាចប្រើយកទៅវាយប្រហារលើប្រជាជនអ៊ុយក្រែន ការបិទខ្ទប់ប្រតិបត្តិការធនាគារ និងហិរញ្ញវត្ថុមួយចំនួន ដែលទាក់ទងជាមួយប្រទេសរុស្ស៊ីផងដែរ ។
សម្រាប់ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន បានបង្ហាញទស្សនាទានផ្ទាល់ខ្លួនថា «បញ្ហាសង្គ្រាមរវាងរុស្ស៊ី និងអ៊ុយក្រែន មិនអាចយកសង្គ្រាមទៅបញ្ចប់សង្គ្រាមបានទេ គឺត្រូវប្រើផ្នែកការទូត ប្រើការចរចាគឺជាជម្រើសល្អ...»។
ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា
ការលើកឡើងរបស់ប្រទេសថៃបានធ្វើឡើងមួយថ្ងៃបន្ទាប់ពីឯកអគ្គរដ្ឋទូតមកពីប្រទេសអឺរ៉ុបមួយចំនួន និងឯកអគ្គរដ្ឋទូតសហរដ្ឋអាមេរិក ប្រចាំប្រទេសថៃ បានជួបជាមួយលោក ថានី ថុងភក្តី រដ្ឋលេខាធិការអចិន្ត្រៃយ៍នៃក្រសួងការបរទេស ដើម្បីសួរនាំពីជំហររបស់ថៃលើស្ថានភាពរុស្ស៊ី-អ៊ុយក្រែន ។
ខណៈលោក David Daly ឯកអគ្គរដ្ឋទូតសហភាពអឺរ៉ុប (EU) ប្រចាំប្រទេសថៃ រួមជាមួយនឹងឯកអគ្គរដ្ឋទូតមកពី ២៤ ប្រទេសបានបង្ហោះសារតាមរយៈ Twitter ដំណើរទៅកាន់ក្រសួងការបរទេសថៃ ដោយសារនោះមានខ្លឹមសារថា «ការឈ្លានពានរបស់រុស្ស៊ីទៅលើអ៊ុយក្រែនបំពានធម្មនុញ្ញអង្គការសហប្រជាជាតិ ហើយសមាជិកអង្គការសហប្រជាជាតិទាំងអស់ រួមទាំងប្រទេសថៃ គួរតែនិយាយឡើង ដើម្បីរក្សាបទប្បញ្ញត្តិអន្តរជាតិ និងបោះឆ្នោតលើដំណោះស្រាយរបស់អង្គការសហប្រជាជាតិ ដែលនឹងប៉ះពាល់ដល់មនុស្សគ្រប់គ្នា» ។
លោក ប្រាយុទ្ធ ច័ន្ទអូឆា នាយករដ្ឋមន្ត្រី និងជារដ្ឋមន្ត្រីក្រសួងការពារថៃ
លោក ដន ប្រាម៉ាត់វិណៃ ឧបនាយករដ្ឋមន្ត្រី និងជារដ្ឋមន្ត្រីការបរទេសថៃ បាននិយាយកាលពីថ្ងៃទី១ មីនាថា កិច្ចប្រជុំគណៈរដ្ឋមន្ត្រី ក៏បានពិភាក្សាអំពីជម្លោះរវាងអ៊ុយក្រែន និងរុស្ស៊ីដែរ សម្រាប់ប្រទេសថៃ ការកែឥរិយាបថមួយចំនួនអាចត្រូវបានទាមទារ ព្រោះលោកមើលឃើញថា ការថ្កោលទោសពីភាគីជាច្រើនមិនបានជួយអ្វីទេ ប៉ុន្តែថៃត្រូវតែរកចំណុចមួយដែលអាចជួយស្ថានការណ៍ឲ្យមានទិសដៅកាន់តែប្រសើរ ស្វែងរកវិធីដើម្បីជំរុញការសន្ទនា ការសន្ទនាត្រូវតែបន្ត និងមិនឈប់ ។
លោក ដន ប្រាម៉ាត់វិណៃ ឧបនាយករដ្ឋមន្ត្រី និងជារដ្ឋមន្ត្រីការបរទេសថៃ
លោក ដន បាននិយាយថា ប្រទេសថៃមានសំណាងមួយ គឺយើងជាមិត្តនឹងពិភពលោកទាំងមូល ដែលអាចនិយាយបានច្រើន ប៉ុន្តែនៅពេលដែលយើងនិយាយចេញទៅហើយ តើវាមានទម្ងន់ធ្ងន់ប៉ុណ្ណា វាជាច្រកមួយក្នុងការនិយាយ ទាំងអឺរ៉ុប រុស្ស៊ី អ៊ុយក្រែន និងសហរដ្ឋអាមេរិក មានច្រកចេញ ប៉ុន្តែរឿងខ្លះយើងត្រូវទុកឲ្យហូរទៅតាមធម្មជាតិ ។ វាមិនមែនជាបញ្ហាប្រញាប់លោតចូលក្នុងតួនាទីនោះទេ រឿងនេះជាបញ្ហារបស់សង្វៀនអឺរ៉ុប យើងគ្រាន់តែជាផ្នែកមួយនៃពិភពលោក យើងត្រូវមើលថា តើវានឹងដោះស្រាយនៅទីបំផុតឬអត់ ហើយតើថៃនឹងមានផលវិបាកយ៉ាងណា? ព្រោះប្រសិនរឿងនេះនៅតែបន្ត បញ្ហាថាមពលប្រាកដជានឹងកើតឡើង អតិផរណានឹងកើនឡើង ដែលយើងមិនចង់បាន ។
សាស្ត្រាចារ្យបណ្ឌិត Jittipat Poonkham ប្រធានគម្រោងនៃមហាវិទ្យាល័យវិទ្យាសាស្ត្រនយោបាយ កម្មវិធីអន្តរជាតិ សកលវិទ្យាល័យធម្មសាតថៃ បាននិយាយក្នុងអំឡុងពេលពិភាក្សាតាមអនឡាញលើបញ្ហាឈ្លានពានរបស់«រុស្ស៊ី» វាយ«អ៊ុយក្រែន» ថាជាសង្គ្រាមលោកលើកទី ៣? បានបង្កើតសំណួរថា «តើថៃអាចត្រូវដើរថយក្រោយទេ និងលេងហ្គេមបែបណា? តើផលប្រយោជន៍របស់ប្រទេសថៃនៅឯណា? ការប្រកាសខ្លួនជាអ្នកអព្យាក្រឹតភាព គឺជាជំហរមួយដូចគ្នា វាពិតជានៅកណ្តាលដូចហ្វាំងឡង់ ឬអព្យាក្រឹត ដោយជ្រើសរើសម្ខាងក្នុងគូជម្លោះ?!?»។
អ្នកជំនាញរូបនោះបានបន្ថែម ក្នុងន័យមួយ ភាពអព្យាក្រឹតគឺមានសារសំខាន់ ប៉ុន្តែត្រូវឈរជាមួយអង្គការសហប្រជាជាតិ ឈរគោរពច្បាប់អន្តរជាតិ ដូចជាការមិនពេញចិត្តនឹងសង្រ្គាមអយុត្តិធម៌ អំពាវនាវរកវិធីសន្តិភាពជាដើម ជាពិសេសដើម្បីផលប្រយោជន៍ប្រជាជនថៃជាចម្បង ។ ប្រសិនបើដូច្នោះ វានឹងត្រូវបានចាត់ទុកថាជាជំហរអព្យាក្រឹតដ៏ស្រស់ស្អាតមួយក្នុងឆាកអន្តរជាតិ» ៕