អត្ថបទ សាវុឌ្ឍ៖
ពេលនេះសំបុត្រសម្រាប់ចូលទស្សនាពិធីបើកការប្រកួតព្រឹត្តិការណ៍កីឡាស៊ីហ្គេមនេះ ក៏បានចាប់ផ្ដើមដាក់លក់នៅលើប្រព័ន្ធអនឡាញជាផ្លូវការផងដែរ។
យោងតាមការចុះផ្សាយពី Cambodia 2023 នៅថ្ងៃទី២៧ ខែមីនា ឆ្នាំ២០២៣ បានឲ្យដឹងថា សំបុត្រសម្រាប់ការចូលទស្សនាពិធីបើកការប្រកួតព្រឹត្ដិការណ៍ជាប្រវត្ដិសាស្រ្ដនេះគឺមាន ២ ប្រភេទ ដោយក្នុងនោះសំបុត្រកៅអីប្រភេទទី១ មានតម្លៃ ២០ ម៉ឺនរៀល និងសំបុត្រកៅអីទី២ មានតម្លៃ ១០ ម៉ឺនរៀល ។
ព្រឹត្តិការណ៍កីឡាស៊ីហ្គេម លើកទី៣២ ដែលកម្ពុជាធ្វើជាម្ចាស់ផ្ទះនេះនឹងត្រូវចាប់ផ្តើមពីថ្ងៃទី៥ ដល់ថ្ងៃទី ១៧ ខែឧសភា ឆ្នាំ២០២៣ និង ASEAN Para Games: ចាប់ផ្តើមពីថ្ងៃទី៣ ដល់ថ្ងៃទី ៩ ខែមិថុនា ឆ្នាំ២០២៣ ។
ស៊ីហ្គេមលើកទី៣២ នៅកម្ពុជានេះដែរ នឹងមានការប្រកួតកីឡាគុនខ្មែរ ដោយគ្មានវត្តមានថៃ ។
អគ្គលេខាធិការគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លោក វ៉ាត់ ចំរើន លើកឡើងថា កម្ពុជានឹងប្រកួតកីឡាគុនខ្មែរក្នុងស៊ីហ្គេមឆ្នាំ ២០២៣ ជាមួយបណ្តាប្រទេសផ្សេងៗទៀត ដោយមិនមានវត្តមានកីឡាករមកពីប្រទេសថៃ ក្រោយមានការមិនពេញចិត្តក្នុងការប្រើឈ្មោះកីឡាគុនខ្មែរ តែមិនមែន Muay Thai។ លោក វ៉ាត់ ចំរើន ថា គុនខ្មែរជាអត្តសញ្ញាណរបស់ជាតិខ្មែរ ត្រូវបានប្រទេស ៤ ផ្សេងទៀតចូលរួម នោះគឺ ប្រទេសឡាវ វៀតណាម មីយ៉ាន់ម៉ា ម៉ាឡេស៊ី ហ្វីលីពីន និងប្រទេសឥណ្ឌូណេស៊ី ។
សារព័ត៌មាន AFP បានស្រង់សម្តីរបស់លោក ចារើនវ៉ាតាណាស៊ីន អនុប្រធានគណៈកម្មាធិការជាតិអូឡាំពិកថៃ ដែលថា ប្រទេសថៃនឹងមិនបញ្ជូនកីឡាករមកចូលរួមការប្រកួតកីឡាគុនខ្មែរ ក្នុងស៊ីហ្គេមលើកទី ៣២ នៅកម្ពុជាឡើយ តែវិញ្ញាសាផ្សេងនឹងបញ្ជូនមក ។
សូមរំឭកថា ស៊ីហ្គេមលើកទី ៣១ នៅប្រទេសវៀតណាម ដោយសារការរីករាលដាលនៃជំងឺកូវីដ-១៩ បានធ្វើឲ្យម្ចាស់ផ្ទះ វៀតណាម ស្នើសុំជាច្រើនលើក អំពីការពន្យារពេលពីឆ្នាំ២០២១ ទៅឆ្នាំ២០២២ វិញ ៕