ដោយ សាវុឌ្ឍ៖
Photo by Thairath
រយៈពេលជាង ២ ខែមកហើយ បន្ទាប់ពីការបោះឆ្នោតនៅថ្ងៃទី ១៤ ខែឧសភាឆ្នាំ ២០២៣ ប៉ុន្តែនៅតែមិនអាចមាននាយករដ្ឋមន្ត្រី និងរៀបចំរដ្ឋាភិបាលបាន ព្រោះតែតួអង្គសំខាន់ គឺសមាជិកព្រឹទ្ធសភាដែលមិនបោះឆ្នោតគាំទ្របេក្ខភាពលោក ភីថា លីមចារើនរ៉ាត់ ។ ដូច្នេះហើយ ទើបចាប់ផ្តើមមានរលកបាតុកម្មជាបណ្តើរៗ ដើម្បីតវ៉ាចំពោះសមាជិកព្រឹទ្ធសភា ដែលកើតចេញពីក្រុមប្រឹក្សាសន្តិសុខជាតិថៃ ក្នុងអាណត្តិលោក ប្រាយុទ្ធ ច័ន្ទអូឆា នាយករដ្ឋមន្ត្រី ។
ក្រុមបាតុករបានជំរុញឱ្យគណបក្សនយោបាយ សាធារណជន និងប្រព័ន្ធផ្សព្វផ្សាយ យកចិត្តទុកដាក់លើគោលការណ៍ ដោយស្នើឱ្យឆ្លងផុតវិបត្តិនេះ ដោយពិចារណាលើមាត្រាសំខាន់ៗចំនួនពីរ គឺមាត្រា ៣ និងមាត្រា៥ នៃរដ្ឋធម្មនុញ្ញថៃ ដែលបានចោទសមាជិកព្រឹទ្ធសភាថាបំពានលើរដ្ឋធម្មនុញ្ញ ហើយស្នើឲ្យលោក វ៉ាន់ ន័រ ម៉ាថា ក្នុងនាមជាប្រធានរដ្ឋសភា ជំរុញសមាជិក ព្រឹទ្ធសភាដែលធ្លាប់បោះឆ្នោតប្រឆាំង ឬមិនបោះឆ្នោត ឲ្យគាំទ្របេក្ខភាពនាយករដ្ឋមន្ត្រី បើពុំនោះទេ វាជាការរំលោភរដ្ឋធម្មនុញ្ញ។
មាត្រា ៣ នៃរដ្ឋធម្មនុញ្ញថៃចែងថា អំណាចអធិបតេយ្យភាពជារបស់ប្រជាជនថៃ ព្រះមហាក្សត្រជាប្រមុខរដ្ឋទ្រង់ប្រើអំណាចតាមរយៈរដ្ឋសភា គណៈរដ្ឋមន្ត្រី និងតុលាការយោងតាមរដ្ឋធម្មនុញ្ញ រដ្ឋសភា គណៈរដ្ឋមន្ត្រី តុលាការ ស្ថាប័នឯករាជ្យ និងស្ថាប័នរដ្ឋាភិបាល ត្រូវបំពេញភារកិច្ចស្របតាមរដ្ឋធម្មនុញ្ញ ច្បាប់ និងនីតិរដ្ឋ ដើម្បីផលប្រយោជន៍រួមរបស់ប្រទេសជាតិ និងសុខុមាលភាពរបស់ប្រជាជនទាំងមូល ៕