ប្រភពពី mgronline+prachachat
ដោយ សូរ្យរិទ្ធៈ
នៅថ្ងៃនេះ (៧ កុម្ភៈ) វេលាម៉ោង ១១.៤០ នាទី នៅអគារសន្តិមេត្រី នៃវិមានរដ្ឋាភិបាលថៃ លោក សេដ្ឋា ទ្វីស៊ីន នាយករដ្ឋមន្ត្រី និងជារដ្ឋមន្ត្រីក្រសួងហិរញ្ញវត្ថុ នៃព្រះរាជាណាចក្រថៃ និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានធ្វើជាសាក្សីក្នុងពិធីចុះហត្ថលេខា និងផ្លាស់ប្តូរអនុស្សរណៈយោគយល់គ្នាចំនួន ៥ ច្បាប់ ដូចខាងក្រោម៖
១) អនុស្សរណៈនៃការយោគយល់គ្នាស្តីពីកិច្ចសហប្រតិបត្តិការក្នុងការកាត់បន្ថយហានិភ័យគ្រោះមហន្តរាយ និងការឆ្លើយតបជាបន្ទាន់រវាងប្រទេសថៃ និងកម្ពុជា (ក្រសួងមហាផ្ទៃថៃ និងគណៈកម្មាធិការជាតិគ្រប់គ្រងគ្រោះមហន្តរាយកម្ពុជា) ស្តីពីកិច្ចសហប្រតិបត្តិការក្នុងតំបន់ ក្នុងការកាត់បន្ថយហានិភ័យគ្រោះមហន្តរាយ និងការឆ្លើយតបក្នុងគ្រាអាសន្ន) ដែលភាគីថៃចុះហត្ថលេខាដោយលោក អានុធិន ឆានវីរគុន (Anutin Charnvirakul) ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ ។ ខាងភាគីកម្ពុជា គឺឯកឧត្តម នាយឧត្តមសេនីយ៍ គន់ គីម ទេសរដ្ឋមន្ត្រី និងជាអនុប្រធានគណៈកម្មាធិការជាតិគ្រប់គ្រងគ្រោះមហន្តរាយកម្ពុជា ((Senior Minister and First Vice-President of National Committee for Disaster Management of Cambodia) ។
២) អនុស្សរណៈនៃការយោគយល់គ្នាស្តីពីកិច្ចសហប្រតិបត្តិការលើវិស័យជំនាញវិទ្យាសាស្ត្រ និងបច្ចេកវិទ្យា រវាងក្រសួងឧត្តមសិក្សា វិទ្យាសាស្ត្រ ស្រាវជ្រាវ និងនវានុវត្តន៍ ដែលភាគីហត្ថលេខីរបស់ថៃ គឺលោកស្រី ស៊ុប៉ាម៉ាស អ៊ីសារ៉ាផាក់ក្ឌី រដ្ឋមន្ត្រីក្រសួងឧត្តមសិក្សា វិទ្យាសាស្ត្រ ស្រាវជ្រាវ និងនវានុវត្តន៍ ហើយភាគីកម្ពុជាគឺ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ។
៣) អនុស្សរណៈនៃការយោគយល់គ្នាស្តីពីការឆ្លងកាត់ទំនិញ រវាងនាយកដ្ឋានគយថៃ និងអគ្គនាយកដ្ឋានគយ និងរដ្ឋាករកម្ពុជា ដែលភាគីថៃចុះហត្ថលេខាដោយលោក ធីរ៉ាត់ អាត់តាវ៉ានិត អគ្គនាយកនៃអគ្គនាយកដ្ឋានគយ ហើយភាគីកម្ពុជា គឺឯកឧត្តមបណ្ឌិត គុណ ញឹម រដ្ឋមន្ត្រីអមនាយករដ្ឋមន្ត្រី និងជាអគ្គនាយកដ្ឋានគយ និងរដ្ឋាករកម្ពុជា ។
៤) អនុស្សរណៈយោគយល់គ្នារវាង ធនាគារនាំចេញ-នាំចូលថៃ និងសភាពាណិជ្ជកម្មកម្ពុជា ដើម្បីជំរុញពាណិជ្ជកម្ម និងការវិនិយោគរវាងប្រទេសថៃ និងកម្ពុជាដែលភាគីហត្ថលេខីរបស់ថៃដោយលោកបណ្ឌិត រ៉ាក់ វរ៉ាគីតផូកាថន នាយកគ្រប់គ្រងនៃ ធនាគារ EXIM Bank និងភាគីកម្ពុជា គឺអ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា ។
៥) អនុស្សរណៈនៃការយោគយល់គ្នារវាងក្រុមប្រឹក្សាពាណិជ្ជកម្មថៃ និងសភាពាណិជ្ជកម្មកម្ពុជា ភាគីថៃចុះហត្ថលេខាដោយលោក សាណាន់ អង់អុបគុល ប្រធានសភាពាណិជ្ជកម្មថៃ ភាគីកម្ពុជា គឺអ្នកឧកញ៉ា គិត ម៉េង ប្រធានសភា ពាណិជ្ជកម្មកម្ពុជា ។
បន្ទាប់មក នាយករដ្ឋមន្ត្រីថៃ និងសម្តេចធិបតី បានរួមគ្នាធ្វើសន្និសីទកាសែត ដែលលោក ឆៃ វ៉ាត់ចារុង អ្នកនាំពាក្យការិយាល័យនាយករដ្ឋមន្ត្រី បង្ហាញពីសេចក្តីសង្ខេបសំខាន់ៗ ដូចខាងក្រោម៖
បង្កើនកម្រិតនៃទំនាក់ទំនងឆ្ពោះទៅ «ភាពជាដៃគូយុទ្ធសាស្ត្រ» ដែលនឹងផ្តល់ឱកាសធ្វើការកាន់តែជិតស្និទ្ធ និងលើកកម្ពស់សក្តានុពលរបស់ប្រទេសទាំងពីរ ហើយថៃនឹងបើកស្ថានអគ្គកុងស៊ុលថ្មីនៅខេត្តសៀមរាប ឯកម្ពុជានឹងបើកស្ថានអគ្គកុងស៊ុលថ្មីនៅខេត្តសុងក្លានៅចុងឆ្នាំនេះផងដែរ ។
វិស័យសន្តិសុខ ជាពិសេសនៅជុំវិញព្រំដែនកម្ពុជា-ថៃ ថៃនឹងមិនអនុញ្ញាតឲ្យអ្នកណាប្រើទឹកដីថៃជាកន្លែងជ្រៀតជ្រែកកិច្ចការផ្ទៃក្នុងឡើយ ឬធ្វើសកម្មភាពដែលបង្កគ្រោះថ្នាក់ដល់ប្រទេសជិតខាង ។ មេដឹកនាំភាគីទាំងពីរក៏បានឯកភាពពង្រឹងកិច្ចសហប្រតិបត្តិការក្នុងការប្រយុទ្ធប្រឆាំងឧក្រិដ្ឋកម្មឆ្លងដែន ជាពិសេសបណ្តាញក្លែងបន្លំតាមសាយបឺរ ។
ខាងផ្នែកសេដ្ឋកិច្ច ថៃនឹងធ្វើជាម្ចាស់ផ្ទះនៃកិច្ចប្រជុំនៃគណៈកម្មាធិការពាណិជ្ជកម្មចម្រុះ កម្រិតរដ្ឋមន្ត្រីក្រសួងពាណិជ្ជកម្ម លើកទី៧ នៅដើមខែមីនា ព្រមទាំងមានគោលនយោបាយ quick win ក្នុងការនាំយក MOU ដែលបានចុះហត្ថលេខាលើការនាំទំនិញឆ្លងដែនភ្លាមៗ ដើម្បីបង្កើនទំហំពាណិជ្ជកម្ម ជាពិសេស ពាណិជ្ជកម្មតាមព្រំដែន ។ ភាគីទាំងពីរក៏បានស្វាគមន៍ចំពោះការចុះ MOU រវាងធនាគារ EXIM Bank និងសភាពាណិជ្ជកម្មកម្ពុជា ដែល នឹងជួយជំរុញពាណិជ្ជកម្ម និងការវិនិយោគទាំងពីរ ថៃនិងកម្ពុជា។
ការអភិវឌ្ឍតំបន់ព្រំដែន ភាគីទាំងពីរបានពិភាក្សា និងឯកភាពពង្រឹងកិច្ចសហប្រតិបត្តិការលើវិស័យសន្តិសុខ ថាមពល និងការពិភាក្សាបន្ថែមទៀតអំពីការធ្វើអាជីវកម្មរួមគ្នានៃធនធានអ៊ីដ្រូកាបូននៅក្នុងតំបន់ត្រួតស៊ីគ្នាផង ដែរ។ មេដឹកនាំទាំងពីរបានប្តេជ្ញាចិត្តក្នុងការបោសសម្អាតមីនមនុស្សធម៌នៅក្នុងតំបន់ ក្នុងគោលដៅធ្វើឱ្យតំបន់ព្រំដែនមានសុវត្ថិភាព ព្រមទាំងចាត់វិធានការកែលម្អការបើកច្រកទ្វារព្រំដែនកម្ពុជា-ថៃ ដែលនៅមិនទាន់សម្រេច។ យើងក៏មានសេចក្តីសោមនស្សរីករាយក្នុងការចុះហត្ថលេខាលើ MOU ស្តីពីកិច្ចសហប្រតិបត្តិការក្នុងការកាត់បន្ថយ ហានីភ័យគ្រោះមហន្តរាយ និងការឆ្លើយតបបន្ទាន់ ដែលនឹងបង្កើតក្របខណ្ឌកិច្ចសហប្រតិបត្តិការ ដើម្បីឆ្លើយតបទៅ នឹងភាពអាសន្ននៅតាមតំបន់ព្រំដែន ។
វិស័យទេសចរណ៍ ភាគីទាំងពីរបានឯកភាពបញ្ចូលគ្នានូវភាពខ្លាំងផ្នែកទេសចរណ៍ក្នុងតំបន់ តាមរយៈគម្រោង « ប្រទេស៦ គោលដៅតែមួយ» ដើម្បីលើកកម្ពស់វិស័យទេសចរណ៍ក្នុងតំបន់ ត្រៀមខ្លួនជាស្រេចដើម្បីកែលម្អកិច្ចព្រមព្រៀងលើការឆ្លងកាត់ព្រំដែន ហើយនឹងត្រឡប់ទៅចរចាកិច្ចព្រមព្រៀងទ្វេភាគីលើការដឹកជញ្ជូនឆ្លងដែនតាមផ្លូវថ្នល់ ដើម្បីអាចឆ្លងព្រំដែនដោយរថយន្តឯកជន ។
បញ្ហាផ្សែងអ័ព្ទឆ្លងដែន បានឯកភាពបង្កើតក្រុមការងាររួម បង្កើតផែនការសហប្រតិបត្តិការ ដើម្បីបង្កើតបណ្តាញទំនាក់ទំនងបន្ទាន់សម្រាប់ការផ្លាស់ប្តូរព័ត៌មាន និងការព្រមានអំពីភ្លើងឆេះ កិច្ចសហប្រតិបត្តិការក្នុងការឆ្លើយតបទៅនឹងភាពអាសន្ន និងកសាងសមត្ថភាព និងចែករំលែកការដោះស្រាយជាមួយនឹងការឆេះក្នុងវិស័យកសិកម្ម ក្នុងនោះថៃបានអញ្ជើញកម្ពុជាឱ្យចូលរួមក្នុងផែនការសកម្មភាព CLEAR Sky Strategy ដើម្បីជំរុញកិច្ចសហប្រតិបត្តិការក្នុងការដោះស្រាយបញ្ហានេះនៅថ្នាក់តំបន់។
សម្រាប់ពលករ លោកនាយករដ្ឋមន្ត្រីបញ្ជាក់ថា ថៃផ្តល់សារៈសំខាន់ដល់ការថែទាំពលករគ្រប់ប្រទេស រួមទាំងពលរដ្ឋខ្មែរនៅប្រទេសថៃ ដើម្បីបំពេញការងារក្នុងភាពយុត្តិធម៌ និងការរ៉ាប់រងហានិភ័យសេដ្ឋកិច្ចឲ្យវបានសមស្រប ។
ចំពោះស្ថានការណ៍នៅប្រទេសមីយ៉ាន់ម៉ា ថៃនិងកម្ពុជាចង់ឃើញមីយ៉ាន់ម៉ាមានសន្តិភាព ស្ថិរភាព និងឯកភាព ដែលរដ្ឋាភិបាលនឹងដើរតួនាទីយ៉ាងសកម្មក្នុងការផ្តល់ជំនួយមនុស្សធម៌ដល់ប្រជាជនមីយ៉ាន់ម៉ា និងជំរុញការដោះស្រាយដោយសន្តិវិធី ដោយអនុវត្តកិច្ចសហប្រតិបត្តិការជាមួយអាស៊ាន ។
នៅចុងបញ្ចប់ មេដឹកនាំថៃ និងកម្ពុជាបានសង្កត់ធ្ងន់លើសារៈសំខាន់នៃការលើកកម្ពស់ទំនាក់ទំនងរវាងប្រជាជន និងប្រជាជន ដោយរួមគ្នារៀបចំសកម្មភាពអបអរសាទរខួបលើកទី 75 នៃការបង្កើតទំនាក់ទំនងការទូតនៅឆ្នាំ 2025 ដែលនឹងផ្តោតលើសកម្មភាពដែលលើកកម្ពស់ការយល់ដឹងរវាងប្រជាជន ហើយបានបញ្ជាក់ថា នឹងជួបពិភាក្សាគ្នាជាបន្តបន្ទាប់ ដើម្បីពង្រឹងកិច្ចសហប្រតិបត្តិការឱ្យកាន់តែជិតស្និទ្ធបន្តទៀត ៕