Admin សូរ្យរិទ្ធ៖
-ចាប់តាំងពីកិច្ចប្រជុំថ្នាក់ដឹកនាំអាស៊ានកាលពី ២ ខែមុន មានចំណុចឯកភាពគ្នាចំនួន ៥ ដើម្បីដោះស្រាយវិបត្តិនៅមីយ៉ាន់ម៉ា ប៉ុន្តែរហូតមកដល់ពេលនេះមិនមានអ្វីកើតឡើងទេ ។
-ឱកាសរបស់ក្រុមប្រទេសអាស៊ានក្នុងការដោះស្រាយវិបត្តិមីយ៉ាន់ម៉ា បានបិទទ្វារតាំងពីថ្ងៃទី ៤ ខែមិថុនា ឆ្នាំ ២០២១ មកម៉្លេះ នៅពេលរដ្ឋមន្ត្រីការបរទេសប៊្រុយណេ ជាមនុស្សទីពីរ និងអគ្គលេខាធិការអាស៊ាន ធ្វើដំណើរទៅជាន់ដែនដីមីយ៉ាន់ម៉ា ដើម្បីជួបលោកឧត្តមសេនីយ៍ មីន អងឡាយ តែត្រឡប់មកវិញដោយដៃទទេ ។
-ការរិះគន់ពីតំណាងប្រ៊ុយណេដើរតួជាអ្នកតំណាងអាស៊ាន មិនដឹងថាធ្វើជាប្រធានអាស៊ាន មិនមែនបានទទួលឯកសិទ្ធិក្នុងការធ្វើអ្វីតាមអំពើចិត្តនោះទេ ឬយកគោលនយោបាយប្រទេសរបស់ខ្លួន ទៅជាគោលនយោបាយរបស់អាស៊ានក៏ទេដែរ!
មកដល់ថ្ងៃនេះ ឆ្លងកាត់ ២ ខែពេញ ប៉ុន្តែមេដឹកនាំក្រុមអាស៊ានបានរួមប្រជុំនៅទីក្រុងហ្សាការតា ប្រទេសឥណ្ឌូនេស៊ី បាន«អូខេ» ៥ ចំណុចដើម្បីដោះស្រាយវិបត្តិនយោបាយនៅក្នុងប្រទេសមីយ៉ាន់ម៉ា បន្ទាប់ពីរដ្ឋប្រហាររបស់ឧត្តមសេនីយ៍ មីន អងឡាយ ប៉ុន្តែរហូតមកដល់ពេលនេះមិនទាន់មានសកម្មភាពណាមួយត្រូវបានអនុវត្តនៅឡើយទេ ។
ឱកាសនៃអាស៊ានក្នុងការដោះស្រាយវិបត្តិនៅមីយ៉ាន់ម៉ា បានទម្លាក់វាំងននកំបាំងទាំងស្រុងចាប់តាំងពីថ្ងៃទី ៤ ខែមិថុនាមកម៉្លេះ នៅពេលដែលរដ្ឋមន្រ្តីការបរទេសប៊្រុយណេ ដាតុៈ អេរីវ៉ាន យូសូហ្វ (Dato Erywan Yusof) និងអគ្គលេខាធិការអាស៊ាន លីម ជុក ហូយ (Lim Jock Hoi) ដែលមកពីប្រទេសប្រ៊ុយណេដូចគ្នា បានធ្វើដំណើរទៅកាន់ប្រទេសមីយ៉ាន់ម៉ាដើម្បីជួបជាមួយលោក មីន អងឡាយ ហើយបានត្រឡប់មកវិញដោយដៃទទេ ។
តាមពិត មុនពេលទៅប្រទេសមីយ៉ាន់ម៉ា ជនជាតិប្រ៊ុយណេទាំងពីររូប ដែលដើរតួនាទីជាប្រធានផង និងជាអគ្គលេខាធិការអាស៊ានផង មានគម្រោងនឹងឈប់នៅប្រទេសសិង្ហបុរី ឬទីក្រុងបាងកក ដើម្បីបានឱកាសពិភាក្សានូវជំហរចុងក្រោយជាមួយរដ្ឋមន្រ្តីការបរទេសថៃ ឬសិង្ហបុរី មុនប្រឈមជាមួយនឹង មីន អងឡាយ ប៉ុន្តែបែរជាប្តូរផែនការទៅវិញ ដោយហោះត្រង់ទៅកាន់រដ្ឋធានីណេពិដោរតែម្តង ។ អាក្រក់ជាងនេះទៅទៀត ប្រធានអាស៊ានមិនបានប្រាប់សមាជិកទាំងអស់ថា នឹងទៅប្រទេសមីយ៉ាន់ម៉ាទេ មុនពេលចូលរួមកិច្ចប្រជុំជាមួយរដ្ឋមន្រ្តីការបរទេសចិននៅឆុងឈីង ប្រទេសចិន ។
ជំនួសឱ្យការងារដែលត្រូវធ្វើ លោក ដាតុៈ អេរីវ៉ាន យូសូហ្វ បែរជាដើរតួជាអ្នកតំណាងអាស៊ានផ្ទាល់ ថែមទាំងត្រៀមចេញសេចក្តីថ្លែងការណ៍បញ្ជាក់ពីឋានៈរបស់ក្រុមប្រឹក្សាប្រតិបត្តិរដ្ឋ ក្នុងនាមជាតំណាងផ្លូវការរបស់មីយ៉ាន់ម៉ា, សំណាងល្អហើយ ក្រោយមកបានផ្លាស់ប្តូរចិត្ត ហើយហែកសេចក្តីថ្លែងការណ៍នោះចោល បើមិនដូច្នោះទេ អាស៊ាននឹងគ្មានការងារធ្វើ ព្រោះសមាជិកអាស៊ានទាំងអស់មិនយល់ព្រមទទួលយករដ្ឋប្រហាររបស់ មីន អងឡាយ នោះឡើយ ។
លោក អេរីវ៉ាន យូសូហ្វ គឺជារដ្ឋមន្រ្តីក្រសួងការបរទេសទី ២ បើប្រៀបធៀបទៅដូចជារដ្ឋមន្រ្តីម្នាក់ តែការពិត គឺស្តេចស៊ុលតង់ ហាសាណាល់ បុលគីយ៉ាស (Hassanal Bolkiah)ឯណោទេ ប៉ុន្តែជាមួយនឹងរាជាធិបតេយ្យផ្តាច់មុខរបស់ប្រ៊ុយណេ ស៊ុលតង់ ហាសាណាល់ បុលគីយ៉ាស ជានាយករដ្ឋមន្ត្រីផង ជារដ្ឋមន្ត្រីក្រសួងការពារជាតិ រដ្ឋមន្ត្រីក្រសួងហិរញ្ញវត្ថុ និងរដ្ឋមន្រ្តីក្រសួងការបរទេសផង នៅពេលធ្វើអ្វីគ្រប់យ៉ាងដោយខ្លួនឯង ក៏ទុកឱ្យរដ្ឋមន្រ្តីទី ២ ធ្វើកិច្ចការជំនួសវិញ ហើយលទ្ធផលដូចដែលបានឃើញ ព្រោះ អារីវ៉ាន យូសូហ្វ នៅខ្ចីខាងការទូតខ្លាំងណាស់ មិនដឹងថា ការធ្វើជាប្រធានអាស៊ាននោះមិនមានឯកសិទ្ធិធ្វើអ្វីដែលខ្លួនចង់បាន ឬយកគោលនយោបាយប្រទេសរបស់ខ្លួន ជាគោលនយោបាយរបស់អាស៊ាន ។
នៅពេលចាកចេញពីរដ្ឋធានីណេពិដោរដោយដៃទទេ ទៅដល់ទីក្រុងឆុងឈីង ក៏គ្មានអ្វីត្រូវនិយាយទៅកាន់កិច្ចប្រជុំអាស៊ាន - ចិនដែរ នៅក្នុងកិច្ចប្រជុំនោះគ្មានហុចផលអ្វីចេញជាផ្កាផ្លែមកទេ ។
រដ្ឋមន្រ្តីក្រសួងការបរទេសចិន លោក ហ្វាង អ៊ី បានវាយតម្លៃថា អាស៊ាននិងចិនគឺជាជំហរដ៏សំខាន់ ចង់ឃើញស្ថានការណ៍នៅមីយ៉ាន់ម៉ាដោះស្រាយដោយសន្តិវិធី ប៉ុន្តែអ្វីដែលត្រូវធ្វើ នៅតែមិនអាចកំណត់ឥរិយាបថរួមគ្នាបានដដែល ។
ពិតណាស់ស្ថានភាពនយោបាយក្នុងតំបន់លើពិភពលោកវាមិនដូចចាក់ពុម្ពទាំងស្រុងទេ តាមរយៈនយោបាយក្រៅប្រទេសរបស់ប្រទេសនីមួយៗវាខុសគ្នា ហើយក៏លាក់យុទ្ធសិល្ប៍រៀងៗខ្លួនផងដែរ ប៉ុន្តែគេបែរជាក្រឡេកឃើញប្លុកអាស៊ានបង្ហាញពីកម្រិតនៃការបែកបាក់គ្នា ដែលបានបំផ្លាញព្រឹត្តិការណ៍ដ៏ធំមួយនៅទីក្រុងញូវយ៉កកាលពីថ្ងៃទី ១៨ ខែមិថុនា ឆ្នាំ ២០២១ នៅពេលមានការឯកភាពគ្នាលើស្ថានការណ៍នៅមីយ៉ាន់ម៉ាមិនអាចឈានដល់ចំណុចរួម រហូតដល់មានការសម្រេចចិត្តដោយការបោះឆ្នោត លទ្ធផលបានបង្ហាញថា ប្រទេសចំនួន ១១៩ ក្នុងចំនួន ១៥៦ ប្រទេស នៅក្នុងកិច្ចប្រជុំ បានបោះឆ្នោតគាំទ្រនូវចលនាថ្កោលទោសរដ្ឋប្រហារមីយ៉ាន់ម៉ា ហើយបានអំពាវនាវឱ្យសមាជិកទាំងអស់ កុំបញ្ជូនអាវុធឲ្យ តាត់ម៉ាដាវ(Tatmadaw) ។ ប្រទេសចំនួន ៣៦ បានអវត្តមានក្នុងនោះមានរដ្ឋជាសមាជិកអាស៊ានចំនួន ៤ ដែលដឹកនាំដោយប្រធានប្រ៊ុយណេ កម្ពុជា ឡាវ និងដែលគួរឲ្យអាម៉ាសមុខខ្លាំងគឺថៃ ដែលជាមិត្តភក្តិជិតស្និទ្ធរបស់ មីន អងឡាយ តែប្រទេសទាំងនេះធ្លាប់ប្រកាន់ជំហររបស់ប្រទេសខ្លួនថា «មិនជ្រៀតជ្រែកកិច្ចការផ្ទៃក្នងផងគ្នា» ។
តាមពិតទៅដំណោះស្រាយរបស់ UN បានរង់ចាំជាយូរមកហើយ ព្រោះថាអាស៊ានជាចំណុចផ្តោតសំខាន់បំផុតសម្រាប់ការស្វែងរកមតិឯកច្ឆន្ទ ដោយមិនចាំបាច់បោះឆ្នោត ប៉ុន្តែនៅទីបញ្ចប់ដូចដែលគេបានឃើញ គឺមិនមានសាមគ្គីភាពនៅក្នុងអាស៊ាន ហើយអាស៊ានក៏មិនមែនជាអ្នកចែកចាយអាវុធសំខាន់នោះដែរ ។ ការឈរជាមួយគ្នាក្នុងទិសដៅតែមួយមិនគួរជាបញ្ហាទេ ហើយតំណាងមីយ៉ាន់ម៉ានៅអង្គការសហប្រជាជាតិក៏បានត្រៀមខ្លួនរួចជាស្រេចដើម្បីបោះឆ្នោតប្រឆាំងនឹងកងទ័ពភូមា ពីព្រោះគាត់ប្រកាសខ្លួនគាត់មិនអោយទទួលយករដ្ឋប្រហារតាំងពីគ្រាដំបូងមកម៉្លេះ នៅពេលឥរិយាបថចេញមកដូចនេះ អាស៊ានខ្លួនឯងខូចឈ្មោះលើឆាកអន្តរជាតិ តើធ្វើដូចម្តេចដើម្បីបន្តដើរតួជាប្រធានសម្របសម្រួលដើម្បីដោះស្រាយវិបត្តិមីយ៉ាន់ម៉ា ?
លើសពីនេះទៀត មានការចងសម្ពាធជាពិសេសពីបណ្តាប្រទេសលោកខាងលិច ដែលធ្លាប់ទះកំភ្លៀងមីយ៉ាន់ម៉ារួចទៅហើយនោះ បានចាប់ផ្តើមពឹងផ្អែកពាក់លើអាស៊ាន ពីព្រោះក្រុមប្រទេសទាំងនេះ មានជំហរ«មិនជ្រៀតជ្រែកកិច្ចការផ្ទៃក្នុង» ជាជាងជួយរកដំណោះស្រាយ ។
មានសេចក្តីរាយការណ៍ថា លោកស្រី គ្រីស្ទីន ក្រាណឺ បឺហ្គីណឺ (Christine Schraner Burgener) ប្រេសិតពិសេសរបស់អគ្គលេខាធិការ អ.ស.ប. បានជួបជាមួយមន្រ្តីជាន់ខ្ពស់អាមេរិក នៅទីក្រុងវ៉ាស៊ីនតោននៅថ្ងៃទី ២២ ខែមិថុនា ដើម្បីដាក់សម្ពាធឲ្យអាស៊ាន បង្ខំឲ្យប្រើមតិរួមគ្នា ៥ ចំណុចរបស់ខ្លួនឲ្យបាន មុនពេលគ្រប់យ៉ាងនឹងកន្លងហួសទៅ ។
ប៊្រុយណេនឹង«ប៉ាសេបាល់» ឲ្យកម្ពុជាជាអ្នកសម្រេច«ស៊ុត» ឬមិន «ស៊ុត»នៅឆ្នាំ ២០២២
ឆ្នាំនេះដែលប្រទេសប៊្រុយណេជាប្រធានអាស៊ាន ប្រសិនជាអ្វីៗមិនចេញលទ្ធផលទេនោះ នុះនៅឆ្នាំខាងមុខ (២០២២) កម្ពុជាដែលជាប្រធានអាស៊ាន នឹងទទួលបាល់«ប៉ាសេ»ពីប៊្រុយណេ គឺជាបន្ទុកសម្រាប់ឲ្យកម្ពុជាសម្រេច «ស៊ុត» ឬយ៉ាងណា ? តើនេះមិនជា«សម្ពាធ»ទេឬ ? ជាការពិតណាស់ តួនាទីជាប្រធានអាស៊ានអាចបានកិត្តិយសផង តែកុំភ្លេច ក៏ជាសម្ពាធ និងបញ្ហាប្រឈមផងដែរ ។
សម្តេចអគ្គមហាសេនាបតីតេជោនាយករដ្ឋមន្ត្រី ហ៊ុន សែន
មុនឈានជើងចូលសមាគមប្រជាជាតិអាស៊ីអាគ្នេយ៍ សម្តេចអគ្គមហាសេនាបតីតេជោនាយករដ្ឋមន្ត្រី ហ៊ុន សែន ដែលជាអ្នកនាំកម្ពុជាចូលអាស៊ាន (៣០ មេសា ១៩៩៩) បានលើកឡើងនូវកត្តា ៤ ជាចម្បង៖
១- មិនជ្រៀតជ្រែកកិច្ចការផ្ទៃក្នុងផងគ្នាទៅវិញទៅមក ដែលតាមរយៈនេះអាស៊ានបានក្លាយជារបាំងដ៏សំខាន់សម្រាប់ការពារអធិបតេយ្យនៃរដ្ឋជាសមាជិក ។
២- ស្មារតីសហគមន៍គឺរបៀបនៃការធ្វើសេចក្តីសម្រេចចិត្តរបស់អាស៊ាន គឺផ្អែកលើគោលការណ៍កុងសង់ស៊ីសសិទ្ធិស្មើគ្នាក្នុងការធ្វើសេចក្តីសម្រេចចិត្ត ដោយមិនគិតថា សមាជិកចាស់ ឬសមាជិកថ្មី ឬប្រទេសអ្នកមាន ឬប្រទេសអ្នកក្រ ។
៣- កត្តាសមាហរណកម្មតំបន់ ពោលគឺជាស្នូលនៃនិម្មាបនកម្មតំបន់ទាំងផ្នែកនយោបាយ សេដ្ឋកិច្ច និងសង្គម ៤- អាស៊ានជាច្រកទ្វារការទូតដ៏សំខាន់សម្រាប់កម្ពុជា ។
អ្វីដែលជាឱកាសសម្រាប់កម្ពុជានៅពេលនេះ គឺជាពេលវេលាដែលយើងអាចបង្ហាញប្រកបដោយក្តីកិត្តិយសថា កម្ពុជាដែលអតីតជាប្រទេសឯកោខ្លាំងណាស់ ទាំងនយោបាយ និងសេដ្ឋកិច្ច តែឥឡូវជាប្រទេសមាននីតិរដ្ឋ ដែនអធិបតេយ្យ និងកំពុងតែដើរតួនាទីយ៉ាងសកម្មលើឆាកអន្តរជាតិដោយស្មើសិទ្ធិ និងស្មើភាពក្នុងគ្រប់កិច្ចការតំបន់ ប្រកាន់ខ្ជាប់ជានិច្ចនូវគោលការណ៍ពហុភាគីនិយម ។
តួនាទីកម្ពុជាជាប្រធានអាស៊ានឆ្នាំ ២០២២ វាជាឱកាសដែលកម្ពុជាអាចបង្ហាញពីសមត្ថភាព សក្តានុពលខាងធនធានមនុស្ស និងហិរញ្ញវត្ថុក្នុងការរៀបចំព្រឹត្តិការណ៍អន្តរជាតិដ៏ធំ តែយើងកំពុងស្ថិតក្នុងបរិការណ៍នៃមេរោគកូវីដ-១៩ វាយប្រហារទូទាំងពិភពលោក តែព្រឹត្តិការណ៍នេះនឹងជួយឱ្យកម្ពុជាលើកមុខមាត់របស់ខ្លួន ទាំងវិស័យនយោបាយ ការទូត សេដ្ឋកិច្ច ប្រតិបត្តិការសន្តិភាព និងការងារមនុស្សធម៌អន្តរជាតិ ៕