នៅរសៀលថ្ងៃទី៥ ខែកក្កដា ឆ្នាំ២០២៥ ពិធីសូត្រមន្ត ស្លសិតទៀនព្រះវស្សា ប្រព្រឹត្តទៅក្រោមអធិបតីភាព លោកជំទាវ ចិន ច័ន្ទមុនី ឧបការី និងជាប្រធានក្រុមប្រឹក្សាវិន័យ និងត្រួតពិនិត្យផ្ទៃក្នុង នៃ អ.ប.ព. ឯកឧត្តម សុត ធា អនុប្រធាន អ.ប.ព. តំណាងដ៏ខ្ពង់ខ្ពស់ កិត្តិនីតិកោសលបណ្ឌិត ឱម យ៉ិនទៀង ទេសរដ្ឋមន្រ្តី ប្រធានអង្គភាពប្រឆាំងអំពើពុករលួយ និងលោកជំទាវមហាឧបាសិកាពុទ្ធសាសនូបត្ថម្ភក៍ ឡុង វិសាខា ឱម យ៉ិនទៀង បានបំពេញបុណ្យកុសល នៅវត្តនាគវ័ន ស្ថិតក្នុងសង្កាត់បឹងកក់ទី២ ខណ្ឌទួលគោក រាជធានីភ្នំពេញ។

វិធីបុណ្យនេះ បង្ហាញពីការយកចិត្តទុកដាក់ពីថ្នាក់ដឹកនាំ និងមន្ត្រីរាជការអង្គភាព​ប្រឆាំងអំពើពុករលួយ រួមទាំងលេខា ធិការដ្ឋាន នៃគណៈកម្មាធិការជាតិប្រឆាំងភេវកម្ម និងក្រុមការងារ គ៧៨ ចុះមូលដ្ឋានខណ្ឌទួលគោក រួមទាំងពុទ្ធបរិស័ទជិតឆ្ងាយ រួមសាមគ្គីប្រារព្ធពិធីបុណ្យស្លសិតទៀនព្រះវស្សានេះឡើង តាមទំនៀមទម្លាប់ប្រពៃណីព្រះពុទ្ធសាសនា ។

នៅព្រឹកថ្ងៃអាទិត្យទី៦ ខែកក្កដា ឆ្នាំ២០២៥ នឹងមានការធ្វើបទនមស្សការ សមាទានសីល វេរចង្ហាន់បិណ្ឌបាត្រ និងមានការនិមន្តព្រះសង្ឃ ៤២០ អង្គ គោចរបិណ្ឌបាត្រ ជាកិច្ចបញ្ចប់កម្មវិធីបុណ្យ។

សូមបញ្ជាក់ថា ក្នុងសង្គមខ្មែរ ព្រះសង្ឃតែងនិមន្ត «​​​ចូលព្រះវស្សា» ឬ «គង់ចាំព្រះវស្សា» រយៈ​ពេល​បី​ខែ ដោយ​កំណត់​ពី​ថ្ងៃ ​១រោច ខែអាសាឍ (រវាង​ខែ​កក្កដា) ដល់​​ថ្ងៃ ១៥កើត ខែ​​អស្សុជ (រវាងខែកញ្ញា)។ ទំនៀម​នេះ បានជាប់ជាប្រពៃណី​ប្រតិបត្តិ​រៀងរហូត​​មក​ តែង​ទំនុក​បម្រុង​គ្រឿង​​សក្ការៈ​​បូជា​ផ្សេងៗ​ប្រគេន ព្រះ​សង្ឃ​ដែល​​គង់ចាំព្រះវស្សា​​ ​ដើម្បីបាន​​អានិសង្ស​​ដល់​ជាតិ​មុខ។ ក្នុង​​បណ្តា​គ្រឿង​សក្ការៈ​ទាំង​ឡាយ​នោះ គេ​ឃើញ​មាន «ទៀន​វស្សា» ជាវត្ថុ​សំខាន់​ដែលខ្មែ​រ​ប្រតិបត្តិ​ជា​ទំនៀមដល់សព្វថ្ងៃ។

ក្រៅពីរបស់ប្រើប្រាស់ និងម្ហូបអាហារ ប្រជាពលរដ្ឋខ្មែរក៏បានជាវទៀនវស្សាទៅប្រគេនព្រះសង្ឈផងដែរ ព្រោះមានជំនឿថា ពន្លឺទៀនជួយបំភ្លឺអនាគតជាតិអោយភ្លឺស្រស់បំព្រង និងមានសេចក្តីសុខចម្រើនដោយអំពើល្អ សេចក្តីល្អ ចិត្តសុចរិត ហើយត្រូវ​រក្សា​ភ្លើង​ទៀន​ឱ្យ​ឆេះ​ជាប់​រហូត​គ្រប់​រយៈពេល​បី​ខែ។ មួយវិញទៀតនេះជាការជួយដល់វត្តអារាមក្នុងការមានទៀនប្រើប្រាស់ដើម្បីដុតបំភ្លឺនៅពេលយប់ផងដែរ ៕