អត្ថបទ សាវុឌ្ឍ៖
ប្រធានាធិបតីអ៊ុយក្រែន វ៉ូឡូឌីមៀរ សេលេនស្គី (Volodymyr Zelensky) នៅថ្ងៃព្រហស្បតិ៍ ទី ៣ ខែមីនាម្សិលមិញ បានអំពាវនាវឱ្យលោកខាងលិចបង្កើនជំនួយយោធាដល់អ៊ុយក្រែនបន្ថែមទៀត ហើយបានព្រមានថា បើមិនដូច្នេះទេ រុស្ស៊ីនឹងរាលអនុត្តរភាពទៅដល់តំបន់អឺរ៉ុបផ្សេងទៀតជាមិនខាន ។
សេលេនស្គី បាននិយាយនៅក្នុងសន្និសីទកាសែតថា «ប្រសិនបើអ្នកមិនមានអំណាចបិទដែនអាកាស ដូច្នេះសូមឲ្យយន្តហោះមកយើងមក!» គាត់បានបន្ថែមថា «បើគ្មានយើងទៀត កុំឲ្យរឿងនោះកើតឡើងទៅលើ ឡាតវី លីទុយអានី អេស្តូនី (ក្រុមប្រទេសនៅបាល់ទិក) នឹងទៅជាបន្ទាប់ ជឿខ្ញុំចុះ...!»។
លោកបានអំពាវនាវឱ្យមានការចរចាដោយផ្ទាល់ជាមួយមេដឹកនាំរុស្ស៊ី ដោយបញ្ជាក់ថា វាជាមធ្យោបាយតែមួយគត់ដើម្បីបញ្ឈប់សង្គ្រាម ។ មេដឹកនាំអ៊ុយក្រែនបាននិយាយថា «យើងមិនវាយប្រហាររុស្ស៊ីទេ ហើយយើងក៏គ្មានផែនការវាយប្រហាររុស្ស៊ីដែរ តើអ្នកចង់បានអ្វីពីយើង លែងស្រុកយើងទៅ...»។ «អង្គុយក្បែរខ្ញុំ មិនមែនចម្ងាយ ៣០ ម៉ែត្រដូចពេលដែលខ្ញុំនិយាយជាមួយប្រធានាធិបតីបារាំងនោះទេ» នេះគឺសំដៅទៅលើករណីដែលលោក ពូទីន បានស្វាគមន៍មេដឹកនាំពិភពលោកជាមួយនឹងតុដ៏វែង ដែលឥឡូវបានក្លាយជារឿងល្បីល្បាញ ។
កាលពីប៉ុន្មានសប្តាហ៍មុន សេលេនស្គី បានព្យាយាមដោះស្រាយក្តីកង្វល់ក្នុងចំណោមប្រជាជនអ៊ុយក្រែន បន្ទាប់ពីសហរដ្ឋអាមេរិកបានធ្វើការអះអាងថា រុស្ស៊ីមានផែនការឈ្លានពានប្រទេសរបស់គាត់ ដែលលោកបានទទួលស្គាល់កាលពីពេលថ្មីៗនេះ ។ «គ្មាននរណាម្នាក់គិតថា នៅក្នុងពិភពសម័យទំនើបនឹងមានបុរសម្នាក់ដែលអាចធ្វើដូចសត្វសាហាវបែបនេះ» ៕