ហេតុអ្វីប្រធានរដ្ឋសភាថៃថ្មី ផ្តល់ទៅឲ្យគណបក្សប្រឆាឆាតដែលទទួលបានត្រឹម ៩ អាសនៈ?

ព័ត៌មានសង្គមថ្ងៃពុធ ទី05 ខែកក្កដា ឆ្នាំ2023 ម៉ោង 9:36 នាទី ព្រឹក

ដោយ សូរ្យសែង៖

សម័យប្រជុំរដ្ឋសភាថៃ បានអនុម័តសេចក្តីសម្រេចជ្រើសរើសលោក វ៉ាន មូហាំម៉ាត់ នូរ ម៉ាត់ថា ប្រធានគណបក្សប្រាឆាឆាតដែលទទួលបាន ៩ សំឡេង ក្លាយជាប្រធានរដ្ឋសភា បន្ទាប់ពីគ្មានអ្នកផ្សេងចូលប្រកួតប្រជែង ។

សម័យប្រជុំសភាលើកទី ១ នីតិកាលទី ២៦ បានប្រព្រឹត្តទៅនៅថ្ងៃទី 4 ខែកក្កដា ដោយលោកឧត្តមសេនីយ៍ឯក វិរោច ប៉ៅអ៊ីន សមាជិកសភានៃគណបក្សភឿថៃ ជាព្រឹទ្ធាចារ្យវ័យ ៨៩ ឆ្នាំ បានធ្វើជាប្រធានសម័យប្រជុំបណ្ដោះអាសន្ន មុនពេលបោះឆ្នោតជ្រើសរើសប្រធានរដ្ឋសភាពិតប្រាកដ ។

លោក ភីថា សមាជិកសភា និងជាប្រធានគណបក្សកាវក្លៃ ជាអ្នកស្នើបេក្ខភាពលោក វ៉ាន់ ម៉ូហាម៉ាត់ ន័រ ម៉ាត់ថា ធ្វើជាប្រធានរដ្ឋសភា ដោយមិនមានសមាជិកផ្សេងទៀតតែងតាំងមកប្រកួតប្រជែង ។

ក្នុងការបោះឆ្នោតជ្រើសរើសប្រធានរដ្ឋសភា ថៃប្រើច្បាប់នៅសម័យប្រជុំសភាឆ្នាំ ២០១៩ ចែងថា ប្រសិនមានការស្នើបេក្ខភាពតែម្នាក់គត់ អ្នកតែងតាំងត្រូវបានចាត់ទុកថាបានជាប់ឆ្នោតជាស្វ័យប្រវត្តិ តែប្រសិនបើមានបេក្ខភាពច្រើននាក់ គេត្រូវបោះឆ្នោតសម្ងាត់ ដោយហៅឈ្មោះសមាជិកសភាម្តងមួយៗ ដើម្បីទទួលសន្លឹកឆ្នោត សរសេរឈ្មោះប្រធានដែលចង់បាន ដាក់ក្នុងស្រោមសំបុត្របិទជិត រួចទម្លាក់ទៅក្នុងប្រអប់ឆ្នោត ។ បន្ទាប់មកសម័យប្រជុំនឹងបង្កើតគណៈកម្មការរាប់សន្លឹកឆ្នោត ។ មុននឹងប្រកាសលទ្ធផល គេរំពឹងថានឹងចំណាយពេលប្រហែល 3 ម៉ោង។ ការបោះឆ្នោតសម្ងាត់នេះ បានធ្វើឱ្យវាពិបាកក្នុងការដឹកនាំ និងមិនដឹងថាអ្នកណាជាអ្នកជ្រើសរើសនរណាឡើយ ។

ចុងក្រោយ លោកប្រធានគណបក្សប្រាឆាឆាត ដែលទទួលបានការគាំទ្រពីគណបក្សធំៗចំនួន ២ គឺគណបក្សកាវក្លៃ (កាវកៃ) និងគណបក្សភឿថៃ ជា «អ្នកនៅកណ្តាល» ដើរតួជាប្រធានផ្នែកនីតិបញ្ញត្តិ បន្ទាប់ពីមេដឹកនាំគណបក្សធំទាំងពីរ ដែលមានសំឡេងសរុប 292 នៅក្នុងសភា ត្រូវការពេលច្រើនខែដើម្បីចរចាគ្នា ប៉ុន្តែមិនអាចព្រមព្រៀង-ចរចាគ្នាបាន ដូច្នេះសម្រេចប្រគល់ប្រធានសភាទៅប្រធានគណបក្សប្រាឆាឆាត ។

សេចក្តីសម្រេចជ្រើសរើសប្រធានរដ្ឋសភា ត្រូវបានចាប់អារម្មណ៍ដោយភាគីជាច្រើន ព្រោះវានឹងឆ្លុះបញ្ចាំងពីការរួបរួមគ្នារបស់គណបក្សនយោបាយទាំង ៨ ដែលបានប្រកាសពីចេតនាបង្កើតរដ្ឋាភិបាលចម្រុះ និងលើកទឹកចិត្តលោក ភីថា មេដឹកនាំគណបក្សកាវក្លៃ ជានាយករដ្ឋមន្ត្រីទី 30 ។

មុននេះ លោក អាឌីសន គឺជា «តួឯក» របស់គណបក្សភឿថៃ ក្នុងការប្រឆាំងនឹងការដណ្តើមយកអាសនៈប្រធានសរដ្ឋសភាពីគណបក្សកាវក្លៃរបស់លោក ភីថា ដោយផ្តល់ហេតុផលថា «មិនគួរឲ្យព្រះសង្ឃបួសថ្មី ជាអាចារ្យទេ» ហើយបានអះអាងថា គណបក្សកាវក្លៃ និងគណបក្សភឿថៃ ខុសគ្នាត្រឹមតែ ១០ សំឡេងប៉ុណ្ណោះ ក្នុងពេលគណបក្សកាវក្លៃ បានជាបេក្ខភាពជានាយករដ្ឋមន្ត្រី ហើយក៏គួរឲ្យគណបក្សភឿថៃជាប្រមុខនីតិបញ្ញត្តិ។

នៅពេលអ្នកសារព័ត៌មានសួរថា ហេតុអ្វីបានអនុញ្ញាតឱ្យគណបក្សទទួលបានសំឡេងត្រឹមចំនួន ៩ អាសនៈ ធ្វើជាប្រធានរដ្ឋសភា? លោក អាឌីសន បានឆ្លើយថា «នោះជាអតីតកាល វាចប់ហើយ ដូច្នេះត្រូវទុកឲ្យលោក វ៉ាន់ន័រ ជាអ្នកសម្របសម្រួលសភាពការណ៍ ។

សម័យប្រជុំសភាដំបូងមានសមាជិក 498 រូប

សម័យប្រជុំសភាលើកទី១ មានសមាជិកសភាចំនួន ៤៩៨ រូប ពីសមាជិកចំនួន ៥០០រូប ដែលអនុម័តដោយគណៈកម្មាធិការរៀបចំការបោះឆ្នោត (ECT) ក្រោយលោកស្រី ណាទីផាស គុលសេតថាស៊ិត សមាជិកសភារបស់គណបក្សកាវក្លៃ បានបញ្ចប់សមាជិកភាពរបស់ខ្លួន បន្ទាប់ពីត្រូវបានចោទប្រកាន់ពីបទល្មើស«បើកបរក្នុងស្ថានភាពស្រវឹង»។

ទីបំផុត សភាតំណាងរាស្រ្តបានអនុម័តលើសេចក្តីសម្រេចជ្រើសរើសលោក ប៉ាឌី ផាត ជាអនុប្រធានទី១ ដោយសំឡេង ៣១២ ទល់នឹង ១០៥ អនុប្បវាទ ៧៧ និងសន្លឹកឆ្នោតមិនបានការចំនួន ២ ដោយសំឡេងសរុប ៤៩៦ លើសមាជិក ៤៩៧ រូប ដែលបានចូលរួមប្រជុំ ៕

ហាមធ្វើការចម្លងអត្ថបទ ដោយមិនមានការអនុញ្ញាត្តិ។

ភ្ជាប់ទំនាក់ទំនងជាមួយយើងឥឡូវនេះ

អត្ថបទប្រហាក់ប្រហែល