ដោយ សូរ្យសែង៖
ប្រធានាធិបតីអ៊ុយក្រែនលោក វ៉ូឡូឌីមៀរ សេលេនស្គី បានថ្កោលទោសចំពោះអ្វីដែលលោកហៅថាអំពើពុករលួយជាប្រព័ន្ធ នៅក្នុងគម្រោងការណ៍មួយដើម្បីស្នើសុំសិទ្ធិក្នុងការលើកលែងពីការចូលបម្រើយោធាសម្រាប់ហេតុផលសុខភាព ដោយមានការស៊ីសំណូកយ៉ាងទូលំទូលាយ និងការទទួលយកការសូកប៉ាន់នៅក្នុងប្រព័ន្ធយោធារបស់ប្រទេស ។
សេលេនស្គី បានបង្ហាញថា សំណូកពី 3,000 ដុល្លារ ទៅ 15,000 ដុល្លារត្រូវបានបង់នៅក្នុងការលើកលែងផ្នែកពេទ្យ ពីការកែនចូលបម្រើយោធា ។
ប្រធានាធិបតីរូបនេះបានប្រកាសថា ករណីទាំងអស់នៃការលើកលែងផ្នែកពេទ្យពីការកែនចូលបម្រើយោធា មានឡើងតាំងពីរុស្ស៊ីបានចាប់ផ្តើមធ្វើសង្រ្គាមនៅអ៊ុយក្រែន នឹងត្រូវបានស៊ើបអង្កេតដោយសារតែការរកឃើញគួរឱ្យសង្ស័យជាច្រើន ។
នៅក្នុងការប្រាស្រ័យតាមវីដេអូទៅកាន់ប្រជាជាតិកាលពីចុងខែសីហា លោក សេលេនស្គី បាននិយាយថា «វាចាំបាច់ដើម្បីពិនិត្យមើលការសម្រេចចិត្តផ្សេងៗ របស់គណៈកម្មការគ្រូពេទ្យយោធាមួយចំនួនធំ ចំពោះជនពិការ និងបុគ្គលមិនគ្រប់កាយសម្បទាបម្រើក្នុងជួរយោធា ដែលបានកើតឡើងបន្ទាប់ពីថ្ងៃទី ២៤ ខែកុម្ភៈ ២០២១។
នៅខេត្តខ្លះនៃអ៊ុយក្រែន គាត់សង្ស័យថា ពលរដ្ឋមួយចំនួនត្រូវបានដកចេញពីបញ្ជីយោធា ដោយសារតែការសម្រេចចិត្តរបស់គណៈកម្មការគ្រូពេទ្យបានកើនឡើង ១០ ដង ចាប់តាំងពីការឈ្លានពានរបស់រុស្ស៊ី។ «វាច្បាស់ណាស់ថា ការសម្រេចចិត្តទាំងនេះ គឺជាការសម្រេចចិត្តដែលពុករលួយ» ។
លើសពីនេះ លោក សេលេនស្គី បានលាតត្រដាងពីបញ្ជីឈ្មោះជនជាតិអ៊ុយក្រែនដែលធ្វើដំណើរទៅក្រៅប្រទេស បន្ទាប់ពីការសម្រេចចិត្តគួរឱ្យសង្ស័យរបស់គណៈកម្មការគ្រូពេទ្យយោធា ។
ចាប់តាំងពីការលុកលុយរបស់រុស្ស៊ីនៅឆ្នាំ ២០២១ បុរសជនជាតិអ៊ុយក្រែនទាំងអស់ដែលមានអាយុចន្លោះពី ១៨ ទៅ ៦០ឆ្នាំ ត្រូវបានចាត់ទុកថា មានសិទ្ធិចូលបម្រើយោធា ស្ថិតនៅក្រោមការរឹតបន្តឹងលើការធ្វើដំណើរទៅក្រៅប្រទេស ដោយសារតែសិទ្ធិត្រូវបានកោះហៅឱ្យចូលរួមក្នុងសង្គ្រាម ទោះយ៉ាងណាក៏ដោយមានករណីលើកលែងមួយចំនួនដែរ ។
កាលពីដើមខែមុន លោក សេលេនស្គី បានបណ្តេញប្រធានមជ្ឈមណ្ឌលជ្រើសរើសយោធាក្នុងតំបន់ របស់អ៊ុយក្រែន នៅក្នុងចលនាប្រឆាំងអំពើពុករលួយដ៏ធំមួយ ។
គាត់បាននិយាយនៅពេលនោះថា ការស៊ើបអង្កេតបានបង្ហាញពីការប្រព្រឹត្តខុសផ្សេងៗរបស់មន្ត្រីនៃមជ្ឈមណ្ឌលសឹករងយោធា ពីការស្វែងរកទ្រព្យសម្បត្តិមិនធម្មតា ចំពោះករណីនិរទេសជនដែលមានសិទ្ធិទទួលបានការចុះបញ្ជីយោធា ដែលមានច្បាប់ហាមប្រាមមនុស្សដែលមានលក្ខណសម្បត្តិគ្រប់គ្រាន់មិនឱ្យចាកចេញពីអ៊ុយក្រែន។
លោកប្រធានាធិបតី សេលេនស្គី បាននិយាយទៀតថា ការសម្រេចចិត្តត្រូវបានធ្វើឡើងដើម្បីតម្រូវឱ្យមនុស្សដែលដឹងពីអត្ថន័យនៃសង្គ្រាមដើម្បីគ្រប់គ្រងប្រព័ន្ធសឹករង ហើយឲ្យក្រុមអ្នកប្រព្រឹត្តអំពើពុករលួយបានដឹងថា ការសូកប៉ាន់ផ្សេងៗក្នុងសម័យសង្គ្រាម ចាត់ទុកថាជាការក្បត់ជាតិ ៕
ប្រភព Al Jazeera