ពី bbc/Thai
ដោយ សូរ្យរិទ្ធ៖
មកទល់នឹងពេលនេះ លោក គីម ជុង-អ៊ុន មេដឹកនាំកូរ៉េខាងជើង មានអាយុ ៤០ ឆ្នាំហើយ តើអាយុពិតឬអត់ ។ អ្វីដែលត្រូវបានគេជឿ គឺខួបកំណើតរបស់លោក គីម ជុងអ៊ុន នៅថ្ងៃទី 8 ខែមករា ប៉ុន្តែមានការយល់ស្របតិចតួចអំពីថ្ងៃខែឆ្នាំកំណើតពិតប្រាកដរបស់គាត់ ។ មានចំណុច ៥ ដែលប្រិយមិត្តមិនទាន់ដឹងអំពីមេដឹកនាំកំពូលរបស់កូរ៉េខាងជើង ដែលឡើងកាន់អំណាចពីឆ្នាំ ២០១១ ។
១. គីម ជុង-អ៊ុន កើតថ្ងៃខែឆ្នាំណា?
គេទាំងឡាយមិនទាន់ដឹងពិតប្រាកដទេ ។ «មានការជជែកគ្នាច្រើនអំពីឆ្នាំកំណើតរបស់គាត់ តើឆ្នាំ 1982, 1983 ឬ 1984» នេះជាការឲ្យដឹងរបស់លោក ហាដវើដ ហាវេល (Haward Hawell) សាស្ត្រាចារ្យនយោបាយ ជាអ្នកជំនាញខាងកូរ៉េខាងជើង បានប្រាប់ BBC ។
ថ្ងៃកំណើតរបស់ គីម ដែលគេជឿថា ថ្ងៃទី ៨ មករា ជាថ្ងៃធ្វើការធម្មតារបស់ប្រទេសកុម្មុយនិស្តមួយនេះ ចំណែកថ្ងៃខែកំណើតរបស់បិតាគាត់ គីម ជុង-អ៊ីល គឺនៅថ្ងៃទី ១៦ កុម្ភៈ ដែលតែងប្រារព្ធក្នុងថ្ងៃដែលគេហៅថា «ទិវានៃដួងពន្លឺចែងចាំង (Day of the Shining Star)» ។
ចំណែកថ្ងៃទី១៥ ខែមេសា ជាថ្ងៃកំណើតលោក គីម អ៊ីល-ស៊ុង ជីតារបស់លោក គីម ជុងអ៊ុន ដែលជាអ្នកបង្កើតប្រទេសកូរ៉េខាងជើង ត្រូវបានកំណត់ថាជា «ថ្ងៃនៃព្រះអាទិត្យ (Day of the Sun)» ។
លោកបណ្ឌិត Hawell បាននិយាយទៀតថា អ្វីដែលយើងដឹង គឺលោក គីម ជុងអ៊ុន មានបងប្រុសម្តាយទីទៃ និង ដែលមានឈ្មោះថា គីម ជុងណាម ប៉ុន្តែគាត់ត្រូវបានគេធ្វើឃាតនៅប្រទេសម៉ាឡេស៊ីក្នុងឆ្នាំ 2017 ។
គេនិយាយថា ឪពុករបស់ គីម ជុងអ៊ុន គឺលោក គីម ជុងអ៊ីល មានសហាយយ៉ាងហោចណាស់បួននាក់ ប៉ុន្តែទំនាក់ទំនងរបស់គាត់ជាមួយស្ត្រីទាំងនោះ ត្រូវបានលាក់បាំងពីសាធារណជន ។
ចំពោះព័ត៌មានអំពីលោកស្រី កូ យ៉ុងហ៊ុយ ម្តាយរបស់លោក គីម ជុង-អ៊ុន ត្រូវបានគេជឿថា កើតនៅក្នុងប្រទេសជប៉ុន មុនពេលផ្លាស់មកប្រទេសកូរ៉េខាងជើងក្នុងទសវត្សរ៍ឆ្នាំ 1960 ដើម្បីបន្តអាជីពជាអ្នករាំ ។ អ្នកស្រីជាភរិយាសំណព្វចិត្តរបស់លោក គីម ជុងអ៊ីល ផងដែរ ។
ព័ត៌មានតិចតួចអំពីម្តាយរបស់លោក គីម ជុងអ៊ុន បានលេចចេញនៅឆ្នាំ ២០១៨ នៅពេលដែលរូបថតរបស់គាត់ត្រូវបានរកឃើញក្នុងអំឡុងពេលទស្សនកិច្ចនៅប្រទេសជប៉ុនក្នុងឆ្នាំ ១៩៧៣ ។
ទីភ្នាក់ងារសារព័ត៌មាន Korea Times បានរាយការណ៍ថា ប្រទេសកូរ៉េខាងជើងកម្របញ្ចេញព័ត៌មានអំពីភរិយារបស់មេដឹកនាំជាសាធារណៈណាស់។ ដោយសារតែអាជីពជាអ្នករាំ និងប្រវត្តិគ្រួសារមកពីប្រទេសជប៉ុន
(កើតនៅប្រទេសជប៉ុន ដែលធ្លាប់ជាប្រទេសដែលកាន់កាប់ឧបទ្វីបកូរ៉េក្នុងកំឡុងសង្គ្រាមលោកលើកទី២ ដែលបណ្តាលឱ្យគាត់ធ្លាក់ក្នុងឋានៈសង្គម ប៉ុន្តែដោយសារគាត់រៀបការជាមួយលោក គីម ជុង-អ៊ីល អ្នកស្រីអាចមានរបៀបរស់នៅដ៏ប្រណីត»។
២. ជំទាវធំរបស់ គីម ជុង-អ៊ីល
វាជាបញ្ហាមួយទៀតដែលយើងមិនប្រាកដ។ យើងដឹងថា ជំទាវធំរបស់លោក គីម ជុងអ៊ុន គឺ រី សូលជូ ប៉ុន្តែយើងមិនដឹងច្បាស់ថា គូស្នេហ៍ទាំងពីរបានរៀបការនៅពេលណានោះទេ គេរំពឹងថានឹងកើតឡើងនៅឆ្នាំ ២០០៩។ គួររំលឹកដែរថា នាងជាអតីតតារាចម្រៀងដែលចាប់ភ្នែកលោក គីម ជុងអ៊ុន ពេលនាងសម្តែង ។
ចម្លើយអំពីរឿងនេះ ធ្លាប់លេចឮថា មានឈ្មោះតារាកូរ៉េខាងជើងម្នាក់ដែលមានឈ្មោះដូចគ្នា ប៉ុន្តែគេមិនទាន់ត្រូវបានបញ្ជាក់ជាផ្លូវការថា តើនាងជាមនុស្សដូចគ្នាឬអត់នោះទេ!
សមាជិកសភាម្នាក់បានលើកឡើងពីការស៊ើបអង្កេត ។ ពួកគេបានជឿថា រី សូលជូ បានធ្វើដំណើរទៅប្រទេសកូរ៉េខាងត្បូងក្នុងឆ្នាំ 2005 ជាផ្នែកមួយនៃក្រុមកីឡាករកូរ៉េខាងជើង ក្នុងការប្រកួតកីឡាអត្តពលកម្មជើងឯកអាស៊ី ហើយសមមិត្តនារីនៅសិក្សាច្រៀងនៅប្រទេសចិនផងដែរ ។
៣. មិនដឹងថាគាត់មានកូនប៉ុន្មាននាក់
ព័ត៌មានលម្អិតផ្សេងទៀតអំពីគ្រួសារលោក គីម ជុងអ៊ុន នៅតែពិបាកក្នុងការស្វែងរក។ មានការប៉ាន់ស្មានថា ជំទាវធំ រី សូលជូ មានផ្ទៃពោះក្នុងឆ្នាំ 2016 បន្ទាប់ពីមិនបានបង្ហាញមុខជាសាធារណៈមួយរយៈ។
លើសពីនេះ គេជឿថា កូនពីរនាក់របស់ គីម ជុងអ៊ុន កើតក្នុងឆ្នាំ ២០១០ និង ២០១៣ ប៉ុន្តែមិនទាន់មានព័ត៌មានថា មានកូនប្រុសឬអត់ ដូច្នេះគេមិនអាចដឹងច្បាស់នោះទេ។ តើអ្នកណានឹងស្នងតំណែងគាត់នាពេលអនាគត? តិចតួចបំផុតត្រូវបានគេដឹងអំពីវិសាលភាពពេញលេញនៃកូនរបស់ គីម ជុងអ៊ុន ។
លោក គីម ជុងអ៊ុន បានបង្ហាញខ្លួនជាមួយនាងតូច គីម ជូ-អេ ដែលត្រូវបានគេជឿថាជាកូនទីពីររបស់គាត់។ នាងត្រូវបានគេគិតថា មានអាយុប្រហែលជាង ១០ឆ្នាំ ហើយនេះជាកូនរបស់មេដឹកនាំកូរ៉េខាងជើងច្រើនជាងគេ ដោយនាងបានបង្ហាញខ្លួនយ៉ាងហោចណាស់ក្នុងពិធីសំខាន់ចំនួនប្រាំក្នុងឆ្នាំ 2023 ។
លោកវេជ្ជបណ្ឌិត Hawell បានពន្យល់ថា «យើងនៅតែមិនដឹងរឿងពេញលេញអំពីកូនរបស់គាត់» ដោយកត់សម្គាល់ថា ស្គាល់ឈ្មោះកូនស្រីដោយសារតែអ្នកលេងបាល់បោះជនជាតិអាមេរិក Dennis Rodman ជាភឿនរបស់លោក គីម ជុងអ៊ុន បានផ្តល់បទសម្ភាសន៍ដោយចៃដន្យដល់កាសែតអង់គ្លេស The Guardian ក្នុងឆ្នាំ 2013 ហើយបានរៀបរាប់ឈ្មោះ គីម ជូអេ អំឡុងពេលសម្ភាសន៍។
«គាត់ក៏មានកូនផ្សេងទៀតដែរ ប៉ុន្តែយើងដឹងតិចតួចណាស់អំពីពួកគេ។ យើងមិនទាំងដឹងពីអត្តសញ្ញាណម្តាយរបស់ពួកគេទេ»។
ការយល់ឃើញរបស់អ្នកវិភាគជាច្រើន រួមទាំងសេវាចារកម្មកូរ៉េខាងត្បូងផងដែរ នាង គីម ជូអេ ត្រូវបានចាត់ទុកថាជាអ្នកស្នងមរតកមេដឹកនាំបន្ទាប់របស់ប្រទេសកូរ៉េខាងជើង ប៉ុន្តែលោកបណ្ឌិត Hawell មិនជឿដូច្នេះទេ ។
អ្នកសិក្សានៅ Oxford ពិចារណាលើរឿងនេះ ដោយសារនាងនៅក្មេង ហើយអ្នកស្រី គីម យ៉ូ-ចុង ជាប្អូនស្រីរបស់លោក គីម ជុងអ៊ុន មានបទពិសោធន៍ច្រើនជាង។ នាងក៏មានទំនាក់ទំនងល្អជាងក្នុងចំណោមពួកឥស្សរជនផងដែរ នេះធ្វើឲ្យនាងក្លាយជាគូប្រជែងដែលអាចស្នងតំណែងបងប្រុសរបស់នាង ។
«មេដឹកនាំកូរ៉េខាងជើងតែងតែបង្ហាញមុខនៅក្នុងប្រព័ន្ធផ្សព្វផ្សាយជាមួយប្អូនស្រីរបស់គាត់ ក្នុងអំឡុងពេលបាញ់មីស៊ីល ពិធីជប់លៀង ឬការប្រកួតបាល់ទាត់ ព្រោះចង់បង្ហាញថា គីម ជាបុរសដែលស្រឡាញ់គ្រួសារគាត់»។
៤.តើគាត់រស់នៅដោយរបៀបណា ខណៈដែលប្រទេសនេះក្រីក្រខ្លាំង?
កូរ៉េខាងជើង និងមេដឹកនាំរបស់ខ្លួន បានប្រឈមមុខនឹងការដាក់ទណ្ឌកម្មយ៉ាងធ្ងន់ធ្ងរពីអង្គការសហប្រជាជាតិ និងបណ្តាប្រទេសលោកខាងលិចអស់រយៈពេលជាច្រើនឆ្នាំ ដោយសារតែគម្រោងអភិវឌ្ឍអាវុធនុយក្លេអ៊ែរ និងមីស៊ីលរយៈចម្ងាយឆ្ងាយ ប៉ុន្តែទោះបីជាមានការដាក់ទណ្ឌកម្មក៏ដោយ លោកបណ្ឌិត Hawell បាននិយាយថា លោក គីម ជុងអ៊ុន បានធ្វើអ្វីគ្រប់យ៉ាងដែលលោកអាចធ្វើបាន ដើម្បីជៀសវាងការដាក់ទណ្ឌកម្ម ។
«កូរ៉េខាងជើង មានមូលនិធិសម្រាប់សូកប៉ាន់មន្ត្រី ដែលត្រូវបានរចនាឡើងជាពិសេសសម្រាប់ការចំណាយរបប ព្រោះលោក គីម ចង់បង្កើនប្រាក់នេះ ដើម្បីឲ្យគាត់ និងក្រុមគ្រួសារអាចបន្តរស់នៅដ៏ប្រណីត»។
លោកបណ្ឌិត Hawell ជឿថា មានបណ្តាញនៃបណ្តាប្រទេសជុំវិញពិភពលោកដែលមានឆន្ទៈចង់ផ្តល់ថវិកាដល់កូរ៉េខាងជើង ហើយមានការចោទប្រកាន់ថា លុយកាន់តែច្រើនអាចមកពីមូលនិធិដែលបង្កើតឡើងដោយមធ្យោបាយផ្សេងទៀត។
«មនុស្សតែងតែគិតថា កូរ៉េខាងជើងជាប្រទេសឯកោមួយដែលគ្មានអ៊ីនធឺណិត ប៉ុន្តែតាមពិតមានអ៊ីនធឺណេតគ្រប់គ្រងដោយរដ្ឋ ហើយសង្គ្រាមអ៊ីនធឺណិតបានក្លាយជាយុទ្ធសាស្ត្រសំខាន់មួយរបស់របប គីម ។ ការលួចចូលប្រព័ន្ធកុំព្យូទ័ររបស់ប្រទេសផ្សេងៗ និងការលួចយកមូលនិធិដើម្បីផ្តល់មូលនិធិដល់សេដ្ឋកិច្ច និងគម្រោងអភិវឌ្ឍន៍នុយក្លេអ៊ែររបស់ពួកគេ»។
៥.តើលោក គីម ជុងអ៊ុន ខ្វល់ពីប្រជាជនទេ?
សុន្ទរកថារបស់លោក គីម ជុងអ៊ុន ក្នុងឆ្នាំ ២០២០ បានបង្ហាញពីផ្នែកមួយទៀតនៃមេដឹកនាំកំពូល។ លោកបានថ្លែងអំណរគុណចំពោះកងពលតូចយោធាដែលបានខិតខំប្រឹងប្រែងក្នុងពេលមានជំងឺរាតត្បាត រួមទាំងការដោះស្រាយគ្រោះមហន្តរាយធម្មជាតិ។ នៅពេលមួយ គាត់បានជូតទឹកភ្នែកក្នុងពេលនិយាយអំពីភាពលំបាករបស់ប្រទេស នេះគឺជាការបង្ហាញអារម្មណ៍ដ៏កម្រមួយពីមេដឹកនាំកូរ៉េខាងជើង ។
អ្នកសង្កេតការណ៍ខ្លះនិយាយថា លោក គីម ជុងអ៊ុន ប្រហែលជាកំពុងព្យាយាមធ្វើជាសុភាពរាបសារ នៅពេលដែលប្រទេសនេះជួបវិបត្តិសេដ្ឋកិច្ច។ លោក គីម ជុងអ៊ុន បន្តវិធីចាស់ និងប្រពៃណីនៃការធ្វើដំណើរផ្លូវឆ្ងាយតាមរថភ្លើងដ៏ប្រណីត នេះជាទំនៀមទម្លាប់ដែលបានបន្តតាំងពីជំនាន់ជីតារបស់លោក គឺលោក គីម អ៊ីលស៊ុង។
មេបញ្ជាការយោធារុស្ស៊ី ដែលបានធ្វើដំណើរតាមរថភ្លើងជាមួយលោក គីម ជុងអ៊ីល ដែលជាឪពុករបស់លោក គីម ជុងអ៊ុន ក្នុងឆ្នាំ ២០០១ ធ្លាប់បាននិយាយអំពីទ្រព្យសម្បត្តិរបស់គាត់ ខណៈរំលឹកអនុស្សាវរីយ៍របស់គាត់នៅលើរថភ្លើង Orient Express ថា៖ «វាមិនមានបញ្ហាទេដែលអ្នកបញ្ជាទិញម្ហូបពីប្រទេសណា មិនថា រុស្ស៊ី ចិន កូរ៉េខាងត្បូង ជប៉ុន ឬបារាំងទេ អាចធ្វើទៅបានទាំងអស់»។ បង្កងស្រស់ និងស្រាពី Bordeaux និងស្រា Burgundy ត្រូវបានបញ្ជូនដោយផ្ទាល់ពីប៉ារីស ។
មិនថារថភ្លើងថ្នាក់ខ្ពស់ ឬយានជំនិះប្រណីតផ្សេងទៀត ដូចជាយន្តហោះឯកជនជាដើម វាផ្ទុយស្រឡះពីជីវភាពក្រីក្ររបស់ពលរដ្ឋកូរ៉េខាងជើង។
ជនជាតិកូរ៉េខាងជើងបានប្រាប់ BBC យ៉ាងដូច្នេះថា ស្បៀងអាហារខ្វះខាតខ្លាំងណាស់ដែលអ្នកជិតខាងរបស់គាត់ឃ្លានរហូតដល់ស្លាប់។ ខណៈអ្នកជំនាញបញ្ជាក់ថា ស្ថានភាពគឺអាក្រក់បំផុតចាប់តាំងពីទសវត្សរ៍ឆ្នាំ 1990 ។
តើនេះនិយាយយ៉ាងណាអំពីអាទិភាពរបស់លោក គីម ជុងអ៊ុន?
«គាត់មិនគ្រាន់តែចង់ការពាររបបរបស់គាត់ទេ ប៉ុន្តែវាក៏រួមបញ្ចូលទាំងការដឹកនាំ និងការគ្រប់គ្រងបែបផ្តាច់ការផងដែរ។ លោកវេជ្ជបណ្ឌិត Hawell បាននិយាយថា គាត់ហាក់ដូចជាមិនយកចិត្តទុកដាក់ចំពោះប្រជាជន 26 លាននាក់នៅក្នុងប្រទេសរបស់គាត់ទេ។
«តើគាត់គិតថានេះជាយុទ្ធសាស្ត្រដែលអាចឲ្យគាត់បន្តឬអត់?»