ដោយ សូរ្យសែង៖
AFP ចេញផ្សាយថា មេដឹកនាំគណបក្សនយោបាយស្រីលង្កាមួយ ត្រូវជនល្មើសលបបាញ់ប្រហារកាលពីថ្ងៃទី ២២ មករា នៅក្នុងរថយន្ត រហូតបាត់បង់ជីវិត ៥ នាក់ ក្នុងនេះមានប្រធាន«គណបក្សកម្លាំងប្រជាជនរបស់យើង» គឺលោក សាម៉ាន ប៉េរេរ៉ា (Pereira) ដែលប៉ូលិសកំពុងបើកការស៊ើអង្កេត ។ លោក ប៉េរេរ៉ា ត្រូវបានបាញ់សម្លាប់នៅក្នុងទីក្រុង បេលីយ៉ាតា រួមទាំងសហការី ៤ នាក់របស់គាត់នៅក្នុងឡានចតនៅមុខភោជនីយដ្ឋានតាមផ្លូវ ហើយខ្មាន់កាំភ្លើងដែលជិះរថយន្តភីកអាប់បានបាញ់ប្រហារមុនពេលរត់គេចខ្លួន ។
គណបក្សរបស់លោក ប៉េរេរ៉ា ទទួលបានអាសនៈនៅក្នុងសភាដែលមានសមាជិកចំនួន 225 របស់ប្រទេសស្រីលង្កា ទោះបីជាជាគណបក្សតូចមួយក៏ដោយ។ ប៉ូលីសបានផ្តោតលើជម្លោះរវាងលោក ប៉េរេរ៉ា និងថៅកែឧក្រិដ្ឋកម្មក្នុងស្រុក ។
ហេតុការណ៍ដ៏សាហាវនេះបានកើតឡើងនៅពេលដែលប៉ូលីស និងទាហានបានចូលរួមកម្លាំងក្នុងប្រតិបត្តិការប្រឆាំងឧក្រិដ្ឋកម្មទូទាំងប្រទេស។ ជាលទ្ធផលមនុស្សជាង ៤៤.០០០ នាក់ត្រូវបានចាប់ខ្លួនក្នុងការបង្រ្កាបដ៏ធំ។ ប៉ូលីសបាននិយាយថា ប្រតិបត្តិការនេះហៅថា «Yuktiya» ភាសាស៊ិងហុល ប្រែថា «យុត្តិធម៌» បានបណ្តាលឱ្យមានការថយចុះយ៉ាងខ្លាំងនៃឧក្រិដ្ឋកម្មក្នុងរយៈពេលថ្មីៗនេះ។
ទោះយ៉ាងណាក៏ដោយ លោក វ៉ុលកឺ ទួក ប្រធានសិទ្ធិមនុស្សអង្គការសហប្រជាជាតិ រិះគន់ប្រតិបត្តិការរបស់ប៉ូលីសស្រីលង្កា ថាមានការរំលោភសិទ្ធិមនុស្សជាច្រើន រួមទាំងការចាប់ខ្លួនតាមអំពើចិត្ត ការធ្វើទារុណកម្ម និងការស្វែងរកដោយគ្មានដីកា ។
ប៉ុន្តែលោក ទីរ៉ាន អាល់ឡេស រដ្ឋមន្ត្រីក្រសួងសន្តិសុខសាធារណៈ បានប្រាប់អ្នកសារព័ត៌មាននៅទីក្រុងកូឡុំបូថា លោកមិនយល់ស្របនឹងការរិះគន់បែបនេះទេ ហើយនៅតែជឿថា វិធានការគាបសង្កត់នេះមានប្រយោជន៍បំផុតសម្រាប់ប្រទេស ៕