ខេត្តសុរិន្ទ អគ្គីឆេះការដ្ឋានចិញ្ចឹមពពែ ងាប់ជាង 4០០ ក្បាល

ព័ត៌មានអន្តរជាតិថ្ងៃអាទិត្យ ទី28 ខែមករា ឆ្នាំ2024 ម៉ោង 11:06 នាទី ព្រឹក

ពី naewna ដោយ ម៉ារ៉ា៖

ចូលឆ្នាំថ្មី ២០២៤ ភ្លាម ប្រទេសមួយចំនួនហាក់ជួបរឿងហេតុអាក្រក់ៗផ្ទួនៗ ដូចជាប្រទេសជប៉ុន មានគ្រោះរញ្ជួយដី បង្កឲ្យរលកស៊ូណាមិ យន្តហោះជល់គ្នា, សហរដ្ឋអាមេរិកជួបអាកាសធាតុត្រជាក់ខ្លាំង, ទឹកជំនន់នៅប្រទេសមួយចំនួន និងថៃជួបឧបបទ្ទហេតុផ្សេងៗ ។ល។

ជាក់ស្តែង កាសែតក្នុងស្រុកថៃរាយការណ៍ថា នៅវេលាម៉ោង៧ និង៥០នាទីយប់ ថ្ងៃទី២៧ ខែមករា ឆ្នាំ២០២៤ មានអគ្គិភ័យឆេះកសិដ្ឋានចិញ្ចឹមពពែដ៏ធំមួយកន្លែងឈ្មោះ សៃឡោមងិនហ្វាម ស្ថិតក្នុងឃុំសាំងខៈ ស្រុកសាំងខៈ ខេត្តសុរិន្ទ ប្រទេសថៃ ដោយប្រើឡានទឹកប្រមាណជាង១០គ្រឿង ។

កន្លែងកើតហេតុជាកសិដ្ឋានធំមួយចិញ្ចឹមពពែជាង ៥០០ក្បាល សង់ជាទ្រុងប្រវែងជាង៦០ម៉ែត្រ បណ្តោយប្រមាណ ៣០ម៉ែត្រ ទើបភ្លើងឆេះយ៉ាងសន្ធោសន្ធៅ ។ ក្នុងហេតុការណ៍ មានសំឡេងពពែយំដោយការឈឺចាប់យ៉ាងខ្លាំង នៅក្នុងនោះក៏មានចំបើងដាក់ជាអាហារដែរ ដែលជាមូលហេតុមួយដែលធ្វើឱ្យភ្លើងរាលដាលយ៉ាងងាយ។ ភ្លើងបានឆេះយ៉ាងរហ័ស ក្នុងនោះមានពពែជាង៤០០ក្បាលដែលត្រូវភ្លើងឆេះងាប់ ហើយក៏មានពពែចំនួន 60 ក្បាលដែលបានរួចជីវិតផងដែរ ដោយសារតែពួកគេត្រូវបានចិញ្ចឹមនៅក្នុងអគារដាច់ដោយឡែកមួយ។

មន្ត្រីជំនាញត្រូវចំណាយពេលជាង៣ម៉ោងទើបអាចគ្រប់គ្រងភ្លើងបាន។ ដំបូងឡើយគេសន្និដ្ឋានថាបណ្ដាលមកឆ្លងចរន្តអគ្គិសនី ។ ចំណែកការខូចខាតដំបូងគិតជាទឹកប្រាក់រាប់លានបាតឯណោះ។ អ្នកមើលថែឲ្យដឹងថា មានពពែជាច្រើនក្បាលដែលនាំចូលពីបរទេស ក្នុងតម្លៃ ២០ម៉ឺនបាតក្នុងមួយក្បាល ៕