ល្បីដល់បរទេស! ក្ដីស្រឡាញ់ លើកតម្កើងស្រ្តីខ្មែរ «បុរសបីស្រ្តី» ជាទីស្រឡាញ់បានច្រើនជាងគេលើពិភពលោក

ព័ត៌មានសង្គមថ្ងៃអាទិត្យ ទី10 ខែមិីនា ឆ្នាំ2024 ម៉ោង 5:30 នាទី ល្ងាច

ដោយ សាវុឌ្ឈ៖

ប្រជាជនកម្ពុជារាប់រយនាក់បានប្រមូលផ្តុំគ្នា ដើម្បីតស៊ូនឹងកម្តៅដ៏ក្តៅហួតហែង ដើម្បីបង្កើតកំណត់ត្រាពិភពលោកថ្មីមួយ គឺ«បីស្ត្រី» បានច្រើនបំផុតនៅលើពិភពលោក ។ កម្មវិធីប្រារព្ធឡើងនៅមុខមហោស្រពកោះពេជ្រ ក្នុងរាជធានីភ្នំពេញ ក្នុងព្រឹត្តិការណ៍ BOOSTRONG កាលពីយប់ថ្ងៃសុក្រ ទី៨ ខែមីនា ឆ្នាំ ២០២៤ ដែលត្រូវបានបញ្ជាក់ដោយតំណាងរបស់ Guinness World Records ។

បុរសខ្មែរ ទាំងក្មេង ទាំងចាស់ សរុប ២៤៥នាក់ បានជួបជុំគ្នា ខ្លះបីភរិយា ខ្លះបីសង្សារ បីបងស្រី-ប្អូនស្រី និងបីអ្នកម្តាយ ហើយឈរស្ងៀមរយៈពេល 1 នាទី ដើម្បីបង្កើតកំណត់ត្រាសម្រាប់ក្នុងការ«បីស្ត្រីជាទីស្រឡាញ់»របស់ខ្លួនច្រើនជាងគេលើពិភពលោក ។អ្នកទទួលឯតទគ្គកម្មម្នាក់អាយុ ២៥ឆ្នាំ បាននិយាយមុននឹង«ឱបបីប្រពន្ធ»ថា គាត់សប្បាយចិត្ត នេះជាលើកទីមួយហើយដែលបានចូលរួមបង្កើតឯតទគ្គកម្មពិភពលោកសម្រាប់ប្រទេសកម្ពុជា ។

ចំណែកស្ត្រីជាម្តាយវ័យ ៥០ឆ្នាំ ដែលកូនប្រុសបានឱបបីក្នុងរង្វង់ដៃយ៉ាងណែន រីករាយដែលរួមគ្នាបង្កើតកំណត់ត្រា គាត់បាននិយាយថា «ខ្ញុំរំភើបចិត្តណាស់» ។ចំណែកឆាណែលតេឡេក្រាមរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក៏បានចូលរួមអបអរសាទរ ព្រះរាជាណាចក្រកម្ពុជា ដែលបានបំបែកកំណត់ត្រា ឯតទគ្គកម្មពិភពលោក Guiness world record ក្នុងព្រឹត្តិការណ៍ BOOSTRONG ច្រើនជាងគេ ។

នេះបើតាមការរួមគ្នាថតឯកទកម្មពិភពលោក អ្នកចូលរួមជាច្រើនក៏បានប្រកួតប្រជែង ឈរ«ឱបបីស្ត្រី» បានរយៈពេលយូរជាងគេ ដើម្បីយករង្វាន់រថយន្តថ្មីផងដែរ ៕